ຮຽບຮຽງໂດຍ:ຕຸໄລເພັດ ພິມເມືອງ

ບົນເສັ້ນທາງປະຈົນໄພແຫ່ງເມືອງປາກຊ່ອງ ນໍ້າຕົກຕາດກະມຶດ ສະຖານທີ່ທ່ອງທ່ຽວທີ່ເປັນທີ່ຮູ້ຈັກກັນໃນນາມ “ທີທ໋ອບ”ນໍ້າຕົກຕາດກະມຶດ ຕັ້ງຢູ່ບ້ານດົງຫຼວງຫ່າງຈາກເທດສະບານເມືອງປາກຊອງ ແຂວງຈຳປາສັກປະມານ 10 ກິໂລແມັດ ເປັນນ້ຳຕົກຕາດທີ່ສູງຊັນ ແລະ ມີຫຼາຍຊັ້ນ, ຊ່ອນຕົວຢູ່ໃນກາງປ່າສະຫງວນແຫ່ງຊາດດົງຫົວສາວ. ຄວາມພິເສດຂອງສະຖານທີ່ດັ່ງກ່າວນັກທ່ອງທ່ຽວຈະຕ້ອງໄດ້ຂີ່ສະລິງ ເພື່ອຊົມນໍ້າຕົກດັ່ງກ່າວໂດຍຂີ່ຕັດຜ່ານນ້ຳຕົກຕັ້ງແຕ່ຊັ້ນເທິງລົງຫາຊັ້ນລຸ່ມສຸດ ລວມທັງໝົດ 8 ເສັ້ນ ຫຼັງຈາກສິ້ນສຸດກິດຈະກໍາດັ່ງກ່າວແລ້ວດ້ານລຸ່ມຂອງນໍ້າຕົກຍັງມີເຮືອນຕົ້ນໄມ້ໄວ້ບໍລິການທ່ານ ໄດ້ພັກຜ່ອນດື່ມກາເຟ ແລະ ຜ່ອນຄາຍກັບບັນຍາກາດທີ່ອ້ອມຮອບໄປດ້ວຍປ່າໄມ້ທໍາມະຊາດອັນງົດງາມທັງຍັງເປັນຈຸດຄົບກັນລະຫວ່າງນໍ້າສອງສາຍ ທີ່ໄຫຼມາຈາກຕາດກະມຶດ ແລະ ຕາດເສື້ອ ເຮັດໃຫ້ຮູ້ສຶກສະບາຍຫ່າງໄກທຸກສິ່ງ ແລະ ທີ່ຂາດບໍ່ໄດ້ສຳລັບນັກທ່ອງທ່ຽວທີ່ມາຮອດແມ່ນການເຂົ້າຮ່ວມກິດຈະການຍ່າງປ່າຈາກສະຖານທີ່ພັກໄປຍັງນໍ້າຕົກຕາດເສືອ ນໍ້າຕົກທີ່ສວຍງາມອີກແຫ່ງມີລວງສູງປະມານ 40 ແມັດ ແລະ ສາມາດຍ່າງລອດຜ່ານນໍ້າຕົກໄດ້ອີກດ້ວຍ.

ຂໍ້ມູນຈາກ: ກົມໂຄສະນາການທ່ອງທ່ຽວກະຊວງ ຖວທ