ຮຽບຮຽງໂດຍ:ຕຸໄລເພັດ ພິມເມືອງ

“ເອກະລັກວັດພູ ກຸຫຼາບປາກເຊ ກາເຟປາກຊ່ອງ ນ້ຳຂອງໂຕນຄອນ ສີພັນດອນລືນາມ” ເປັນຄຳຂວັນຂອງ ແຂວງຈຳປາສັກ, ດິນແດນທີ່ອຸດົມສົມບູນໄປດ້ວຍຊັບພະຍາກອນທຳມະຊາດ ແລະ ສະຖານທີ່ທ່ອງທ່ຽວທີ່ມີຊື່ສຽງໂດ່ງດັງຫຼາຍແຫ່ງ ບໍ່ວ່າຈະເປັນຜາສາດຫີນວັດພູອັນເກົ່າແກ່, ມະຫານະທີສີ່ພັນດອນທີ່ຂຶ້ນຊື່ໄປທົ່ວໂລກາ, ສວນກາເຟປາກຊ່ອງ ອັນສວຍງາມເຢັນສະບາຍ ແລະ ບ່ອນອື່ນໆອີກຈົນນັບບໍ່ໄຂ່ວ, ປຽບເໝືອນ ສະຫວັນຂອງນັກທ່ອງທ່ຽວເລີຍກໍວ່າໄດ້ ບໍ່ວ່າຈະເປັນນັກທ່ອງທ່ຽວທັງພາຍໃນ ແລະ ຕ່າງປະເທດກໍລ້ວນແລ້ວແຕ່ຢາກເດີນທາງມາທ່ຽວຊົມນະຄອນຈໍາປາສັກແຫ່ງນີ້. ແຂວງຈໍາປາສັກຕັ້ງຢູ່ຕອນໃຕ້ສຸດຂອງປະເທດເຮົາ, ມີເນື້ອທີ່ທັງໝົດ 15.415 ກິໂລຕາແມັດ, ມີຊາຍແດນຕິດກັບປະເທດກຳປູເຈຍຢູ່ທິດໃຕ້ ແລະ ທິດຕາເວັນຕົກຕິດກັບປະເທດໄທ. ແຂວງຈໍາປາສັກປະກອບມີ 10ເມືອງຄື: ເມືອງປາກເຊ, ເມືອງຊະນະສົມບູນ, ເມືອງບາຈຽງຈະເລີນສກ, ເມືອງປາກຊ່ອງ, ເມືອງປະທຸມພອນ, ເມືອງໂພນທອງ, ເມືອງຈໍາປາສັກ, ເມືອງສຸຂຸມາ, ເມືອງໂຂງ ແລະ ເມືອງມຸນລາປະໂມກຊຶ່ງມີປະຊາຊົນຫຼາຍຊົນເຜົ່າອາໄສຢູ່ທັງໝົດປະມານ 7 ແສນຄົນ ແລະ ແຂວງນີ້ເອງ ກໍເປັນຕົ້ນຕໍາລັບຂັບລໍາສີ່ພັນດອນອັນໂດ່ງດັງ, ແຂວງຈໍາປາສັກ ຍັງຂຶ້ນຊື່ລືຊາດ້ານອາຫານທີ່ແຊບຫຼາກຫຼາຍເຍື່ອງອີ່ຫຼີ ຕ້ອງໄດ້ໃຊ້ເວລາຫຼາຍມື້ເລາະກິນຈຶ່ງຈະໄຂ່ວ, ໂດດເດັ່ນກໍແມ່ນປານໍ້າຂອງສົດໆ ທີ່ນໍາມາປຸງແຕ່ງອາທານແຊບໆໄດ້ຫຼາກຫຼາຍປະເພດ.

ຂໍ້ມູນຈາກ: ກົມໂຄສະນາການທ່ອງທ່ຽວກະຊວງ ຖວທ