ກອງປະຊຸມຄົບຄະນະບໍລິຫານງານພັກແຂວງສາລະວັນ ຄັ້ງທີ 9 ສະໄໝທີ IX ໂດຍຕິດພັນກັບການດຳເນີນຊີວິດການເມືອງ ປະຈຳປີ 2022 ດຳເນີນມາເປັນເວລາ 2 ວັນ ຊຶ່ງຈັດຂຶ້ນໃນວັນທີ 23 ມັງກອນ 2023 ແລະ ໄດ້ປິດລົງດ້ວຍຜົນສຳເລັດອັນຈົບງາມ ໃນວັນທີ 24 ມັງກອນ ນີ້ ໂດຍພາຍໃຕ້ການເປັນປະທານຂອງ ສະຫາຍ ໂພໄຊ ໄຊຍະສອນ ກໍາມະການສູນກາງພັກ ເລຂາພັກແຂວງ ເຈົ້າແຂວງສາລະວັນ ມີບັນດາສະຫາຍຄະນະບໍລິຫານງານພັກແຂວງ ເລຂາພັກເມືອງ-ເຈົ້າເມືອງ 8 ເມືອງ, ເລຂາພັກຮາກຖານ, ໜ່ວຍພັກຮາກຖານພະແນກການ ແລະ ກົມກອງອ້ອມຂ້າງແຂວງເຂົ້າຮ່ວມ.

ກອງປະຊຸມໄດ້ສະຫຼຸບ ແລະ ວາງແຜນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ກໍຄືມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີຂອງແຂວງ, ວຽກງານ 2 ວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ; ສະຫຼຸບຕີລາຄາການຊີ້ນຳ-ນຳພາຂອງຄະນະບໍລິຫານງານພັກແຂວງ ປະຈຳປີ 2022 ແລະ ທິດທາງແຜນການປີ 2023; ໄດ້ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ XI; ຜ່ານຮ່າງບົດສໍາຫຼວດການນຳພາລວມຂອງຄະນະບໍລິຫານງານພັກແຂວງ ແລະ ດຳເນີນຊີວິດການເມືອງປະຈຳປີ 2022 ພາຍໃນຄະນະບໍລິຫານງານພັກແຂວງ, ຄະນະພັກຮາກຖານ, ໜ່ວຍພັກເພື່ອກວດກາຕີລາຄາຄືນການຈັດຕັ້ງປະຕິບັດໜ້າທີ່, ຜ່ານການສະຫຼຸບຜົນການດຳເນີນຊີວິດການເມືອງ ແລະ ສໍາຫຼວດກວດກາພາຍໃນຄະນະບໍລິຫານງານພັກແຂວງກໍເຫັນວ່າໃນໄລຍະ 1 ປີຜ່ານມາ ບົນພື້ນຖານຄວາມສາມັກຄີເປັນເອກະພາບພາຍໃນຢ່າງໜັກແໜ້ນ, ມີຄວາມຮັບຜິດຊອບຕໍ່ໜ້າທີ່ການເມືອງ ໃນການປະຕິບັດມະຕິ XI ຂອງພັກ ແລະ ມະຕິ IX ຂອງອົງຄະນະພັກແຂວງ.

ໃນວາລະຂອງການດໍາເນີນກອງປະຊຸມ ສະຫາຍ ໂພໄຊ ໄຊຍະສອນ ໄດ້ມີຄໍາເຫັນເນັ້ນໃຫ້ຜູ້ເຂົ້າຮ່ວມກອງປະຊຸມ, ສືບຕໍ່ນໍາພາດ້ານການເມືອງ-ແນວຄິດໃນຖັນແຖວການນໍາ, ສະມາຊິກພັກ, ພະນັກງານແຕ່ລະຂັ້ນ, ພ້ອມທັງຈັດຕັ້ງເຊື່ອມຊຶມ, ຜັນຂະຫຍາຍ ແລະ ກໍາແໜ້ນທັດສະນະພື້ນຖານ ຂອງມະຕິ ແລະ ກົດລະບຽບພັກສະໄໝທີ XI ໃຫ້ເລິກເຊິ່ງ, ສືບຕໍ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ເພື່ອຮັກສາສະຖຽນລະພາບທາງດ້ານການເມືອງ, ຄວາມສະຫງົບຄວາມເປັນລະບຽບຮຽບຮ້ອຍຂອງສັງຄົມ, ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມປີ 2023 ໂດຍເນັ້ນໃສ່ການສ້າງຖານການຜະລິດ ຕິດພັນກັບການສ້າງຖານລາຍຮັບໃໝ່, ການອັດຊ່ອງຫວ່າງການຮົ່ວໄຫຼຂອງງົບປະມານ, ຂຸດຄົ້ນແຫຼ່ງລາຍຮັບຄຽງຄູ່ກັບການຄຸ້ມຄອງລາຍຈ່າຍ ແລະ ຕ້ານການຟຸ່ມເຟືອຍໃນການໃຊ້ຈ່າຍງົບປະມານຂອງລັດ, ເພີ່ມທະວີການປັບປຸງກົງຈັກອຳນາດລັດແຕ່ລະຂັ້ນໃຫ້ກະທັດຮັດ ແລະ ເຂັ້ມແຂງ, ນອກຈາກນີ້ທ່ານຍັງໄດ້ເນັ້ນໜັກຄືນຕື່ມໃຫ້ທຸກສະຫາຍໃນກອງປະຊຸມໄດ້ນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ໄປຜັນຂະຫຍາຍ ແລະ ໝູນໃຊ້ເຂົ້າໃນການຈັດຕັ້ງປະຕິບັດ ເພື່ອສູ້ຊົນໃຫ້ໄດ້ຕາມຄາດໝາຍທີ່ວາງໄວ້.

(ຂ່າວ-ພາບ: ກິນດາວັນ ອ້ວນນາຄູ)