ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ (ສພຂ) ເຊກອງ ຊຸດທີ II ໃນວັນທີ 25 ມັງກອນ ນີ້ ກ່ຽວກັບການເຄື່ອນໄຫວວຽກງານທີ່ພົ້ນເດັ່ນຂອງອົງການປົກຄອງແຂວງປະຈໍາປີ 2022 ແລະ ສະເໜີທິດທາງແຜນວຽກຈຸດສຸມປີ 2023 ໂດຍຈະປະຕິບັດ 11 ວຽກຈຸດສຸມໃຫ້ບັນລຸຜົນສໍາເລັດຄື: ປັບປຸງກົນໄກການຄຸ້ມຄອງການລົງທຶນຂອງລັດ, ເອກະຊົນພາຍໃນ ແລະ ຕ່າງປະເທດ ແລະ ການຄຸ້ມຄອງທຶນຊ່ວຍເຫຼືອເພື່ອການພັດທະນາໃຫ້ມີປະສິດທິພາບ ແລະ ປະສິດທິຜົນສູງຂຶ້ນກ່ວາເກົ່າ; ສູ້ຊົນເກັບລາຍຮັບເຂົ້າງົບປະມານໃຫ້ໄດ້ຕາມແຜນ ແລະ ລື່ນຄາດໝາຍແຜນການທີ່ວາງໄວ້ຕິດພັນກັບມາດຕະການຕ້ານການຮົ່ວໄຫຼຂອງລາຍຮັບງົບປະມານຢ່າງເຄັ່ງຄັດ, ເຂັ້ມງວດ ແລະ ນໍາໃຊ້ເຄື່ອງມືທັນສະໄໝເຂົ້າຊ່ວຍໃນການຄຸ້ມຄອງງົບປະມານໃຫ້ຫຼາຍກວ່າເກົ່າ, ຍົກສູງຄຸນນະພາບການຄຸ້ມຄອງລາຍຈ່າຍງົບປະມານ, ການປະຕິບັດມາດຕະການປະຢັດຕ້ານການຟຸ່ມເຟືອຍໃນກົງຈັກລັດໃຫ້ເກີດຜົນເປັນຈິງຫຼາຍຂຶ້ນ; ພ້ອມນີ້ ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໂດຍສະເພາະສຸມໃສ່ປະຕິບັດບັນດາໂຄງການຕ່າງໆທີ່ໄດ້ກຳນົດໄວ້ໃຫ້ເປັນຮູບປະທຳ; ຊຸກຍູ້ສົ່ງເສີມການຜະລິດເປັນສິນຄ້າ ແລະ ການພັດທະນາສິນຄ້າໂອດັອບ; ພັດທະນາຕົວເມືອງເທດສະບານຂອງແຂວງ ແລະ ເທດສະບານເມືອງຕ່າງໆໃຫ້ໄດ້ 4 ສ 3 ຄ; ຄຸ້ມຄອງສິ່ງແວດລ້ອມທຳມະຊາດ-ສັງຄົມ, ການຟື້ນຟູປ່າໄມ້ ແລະ ປົກປັກຮັກສາປ່າໄມ້ປະເພດຕ່າງໆໃຫ້ຍືນຍົງ ຕິດພັນກັບການແກ້ໄຂຜົນກະທົບຂອງໂຄງການລົງທຶນຕ່າງປະເທດຕໍ່ສະພາບແວດລ້ອມ ແລະ ສັງຄົມໃຫ້ມີປະສິດທິພາບ; ຍົກສູງຄຸນນະພາບໃນການຄຸ້ມຄອງບໍລິຫານລັດ, ການຫັນເປັນທັນສະໄໝ, ການສ້າງເມືອງໃໝ່ ແລະ ກະກຽມສະເຫຼີມສະຫຼອງວັນສ້າງຕັ້ງແຂວງເຊກອງ ຄົບຮອບ 40 ປີ; ພັດທະນາການທ່ອງທ່ຽວ, ພັດທະນາພື້ນຖານໂຄງລ່າງ, ຄຸນນະພາບຂອງການບໍລິການຮ້ານອາຫານ, ໂຮງແຮມ, ເຮືອນພັກ ເພື່ອຮອງຮັບການພັດທະນາແຫຼ່ງທ່ອງທ່ຽວຕ່າງໆໃຫ້ສຳເລັດ ເພື່ອຕ້ອນຮັບນັກທ່ອງທ່ຽວທີ່ຈະມາທ່ຽວແຂວງເຊກອງນັບມື້ນັບເພີ່ມຂຶ້ນ; ປະຕິບັດຄາດໝາຍຕົວຊີ້ວັດຕ່າງໆຂອງຂົງເຂດສຶກສາ, ສາທາລະນະສຸກ ແລະ ຂົງເຂດອື່ນໆໃຫ້ໄດ້ຕາມແຜນການທີ່ວາງໄວ້; ປະຕິບັດວາລະແຫ່ງຊາດ ວ່າດ້ວຍມາດຕະການແກ້ໄຂບັນຫາຢາເສບຕິດ, ສ້າງຄວາມເຂັ້ມແຂງໂປ່ງໃສໃນກຳລັງປ້ອງກັນຄວາມສະຫງົບ, ປາບປາມຜູ້ຄ້າຂາຍ-ຜູ້ເສບໃຫ້ແຂງແຮງກວ່າເກົ່າ, ກໍ່ສ້າງ-ສ້ອມແປງສູນບຳບັດຢາເສບຕິດໃຫ້ສຳເລັດໂດຍໄວ, ສ້າງຂະແໜງການກົມກອງຂັ້ນແຂວງ-ເມືອງ ແລະ ສ້າງຄອບຄົວສ້າງບ້ານປອດຢາເສບຕິດ, ເພີ່ມທະວີການໂຄສະນາຜົນຮ້າຍຂອງຢາເສບຕິດໃຫ້ແຂງແຮງກວ່າເກົ່າ ແລະ ຜັນຂະຫຍາຍບົດບັນທຶກການຮ່ວມມືລະຫວ່າງແຂວງເຊກອງ ກັບ ແຂວງແຮກສ່ຽວ ແລະ ກັບບັນດາແຂວງຕ່າງໆຂອງ ສສ ຫວຽດນາມ ທີ່ການນຳຂັ້ນສູງຂອງແຂວງໄດ້ມີການພົວພັນໃນປີ 2022 ຜ່ານມາ ແລະ ປະເທດອື່ນໆທີ່ເປັນຄູ່ຮ່ວມມືໃຫ້ເກີດເປັນຮູບປະທຳຫຼາຍກວ່າເກົ່າ.

(ຂ່າວ-ພາບ: ເຊກອງ)