ບໍລິສັດຈໍາປາ ເອັນເທີພຣາຍ (Champa Private Enterprise) ໄດ້ຈັດກອງປະຊຸມປະຈໍາປີ ສະຫຼຸບຜົນງານ-ຜົນສໍາເລັດປະຈໍາປີ 2022, ຜ່ານແຜນການວຽກງານສົກປີ 2023 ແລະ ຍົກລະດັບປະສົບການທີ່ດີເດັ່ນ ແລະ ທັນສະໄໝດ້ວຍເຕັກໂນໂລຊີ ກ່ຽວກັບການພັດທະນາເລື່ອງຂອງເຕັກໂນໂລຢີທາງດ້ານໄອທີ (IT) ຂຶ້ນໃນຫວ່າງແລ້ວນີ້, ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ນາງ ວີນາ ຍົມມະລາດ ປະທານວິສາຫະກິດສ່ວນບຸກຄົນ ຈໍາປາເອັນເທີພຣາຍ, ມີອາຈານສອນ ດ້ານໄອທີ ຈາກມະຫາວິທະຍາໄລແຫ່ງຊາດ (ມ.ຊ), ທະນາຄານອາເຮັສບີ (RHB), ພາກວິຊາວິສະວະກໍາຄອມພີວເຕີ ແລະ ເຕັກໂນໂລຊີຂໍ້ມູນຂ່າວສານ, ຄະນະວິສະວະກໍາສາດ (ຄວສ ມຊ) ພ້ອມດ້ວຍແຂກຖືກເຊີນຈາກບໍລິສັດ ກ່ຽວຂ້ອງເຂົ້າຮ່ວມ.

ທ່ານ ນາງ ວີນາ ຍົມມະລາດ ໄດ້ກ່າວວ່າ: ບໍລິສັດຈໍາປາ ເອັນເທີພຣາຍ ສ້າງຕັ້ງຂຶ້ນໃນປີ 2013 ຊຶ່ງມີສໍານັກງານຕັ້ງຢູ່ຖະໜົນກໍາແພງເມືອງ, ໜ່ວຍ 18, ບ້ານ ໂພນປາເປົ້າ ເມືອງ ສີສັດຕະນາກ ຊຶ່ງຈັດຈໍາໜ່າຍສິນຄ້າ ແລະ ດໍາເນີນທຸລະກິດກ່ຽວກັບການບໍລິການທາງດ້ານເຄື່ອງ ໄອທີ, ແບ່ງອອກເປັນ 2 Line ຫຼື 2 ຂະແໜງການໃຫຍ່ ຄື: ສະໜອງອຸປະກອນ ໄອທີ ທັງ Hardware ແລະ Software ທີ່ໄດ້ມາດຕະຖານ; ອອກແບບ Solution ທີ່ເປັນງານລະບົບ ສໍາລັບວຽກງານ Enterprise ບໍ່ວ່າຈະເປັນລະບົບ Server System, Data Center, Network and on Cloud or on permission; ຈໍາໜ່າຍ Software ທີ່ເປັນ Solution ທີ່ສາມາດ customine ໄດ້ຕາມຄວາມຕ້ອງການຂອງລູກຄ້າ ຊຶ່ງແມ່ນທີມງານ Developer ທີ່ມີປະສົບການປະຈໍາຢູ່ ແລະ ສາມາດແກ້ໄຂບັນຫາໄດ້ທັນທີ. ນອກນັ້ນ, ບໍລິສັດ ຍັງເປັນຕົວແທນຈໍາໜ່າຍເຄື່ອງສີດວັນທີ, ຍີ່ຫໍ້ ແລະ ວິດີໂອເຈັດ (Videojet) ພຽງຜູ້ດຽວ ໃນ ສປປ ລາວ ຊຶ່ງມີທີມງານເອັນຈິເນຍ ທີ່ີມີປະສົບການໃນການຕິດຕັ້ງເຄື່ອງຈັກ ເພື່ອຕອບສະໜອງເຂົ້າໃນຂົງເຂດໂຮງງານອຸດສາຫະກໍາປະເພດເຄື່ອງດື່ມ, ທໍ່, ເຄື່ອງອຸປະໂພກ-ບໍລິໂພກ.

ກອງປະຊຸມສໍາມະນາຄັ້ງ​ນີ້, ຜູ້ເຂົ້າຮ່ວມ ຍັງໄດ້ຮຽນຮູ້ທາງດ້ານລະບົບງານເອັນເທິພຣາຍ ໂດຍມີຫົວຂໍ້ສໍາຄັນ ໃນການສໍາມະນາດັ່ງນີ້: ຮຽນຮູ້ທ່າອ່ຽງໃນຕໍ່ໜ້າທາງດ້ານເຕັກໂນໂລຊີ, ໂຄງສ້າງພື້ນຖານ (Infrastructure Technology Trends); ຄວາມປອດໄພທາງໄຊເບີ (Cyber Security); ເຕັກໂນໂລຊີທີ່ພົ້ນເດັ່ນຂຶ້ນ ແລະ ທ່າອ່ຽງຂອງດີຈີຕອນໃນປີ 2023 (Emerging Technologies and Digital Trends In 2023); ປັນຍາປະດິດ (Artificial Intelligent), ລະບົບຄລາວ (Cloud System); ຫຸ່ນຍົນ (Robotics), ທ່າອ່ຽງຂອງເຕັກໂນໂລຊີທະນາຄານ (Trending Bank Technology) ແລະ ຮຽນຮູ້ເຕັກ​ໂນ​ໂລ​ຊີ​ທີ່​ເຊື່ອ​ຖື​ໄດ້ (trusted tech).