ໜັງສືພິມ ປະຊາຊົນ

ບໍລິສັດ ຊືເຟິງ ລ້ານຊ້າງ ມິເນໂຣນ ລິມິເຕັດ ບໍ່ຄຳ-ທອງ ເຊໂປນ ໄດ້ຮັບລາງວັນທຸລະກິດຊັ້ນນຳດີເດັ່ນ ປະຈຳປີ 2022

ເຜີຍແຜ່ໂດຍ: ວິໄລສັກ ເວລາ: 26/01/2023 10:48:19 ຈຳນວນຢ້ຽມຊົມ 395 ຄັ້ງ

ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ໄດ້ມອບໂລ້-ລາງວັນທຸລະກິດຊັ້ນນຳດີເດັ່ນ ໃຫ້ແກ່ບໍລິສັດ ຊືເຟິງ ລ້ານຊ້າງ ມິເນໂຣນ ລິມິເຕັດ (ລຊມລ) ເພື່ອຮັບຮູ້ການປະກອບສ່ວນສຳຄັນຂອງບໍ່ຄຳ-ທອງ ເຊໂປນ ຕໍ່ການພັດທະນາເສດຖະກິດ-ສັງຄົມ ໃນປີ 2022 ທີ່ຜ່ານມາ.

ທ່ານ ສະໝານ ອະເນກາ ຜູ້ອຳນວຍການໃຫຍ່ ລຊມລ ໄດ້ກ່າວວ່າ: “ຂ້າພະເຈົ້າຮູ້ສຶກເປັນກຽດ ແລະ ພູມໃຈຢ່າງຍິ່ງທີ່ໄດ້ຂຶ້ນມາຮັບລາງວັນຄັ້ງນີ້ ຕາງໜ້າໃຫ້ພະນັກງານທຸກໆຄົນ ຂອງບໍລິສັດຊືເຟິງ ລຊມລ. ລາງວັນທີ່ໄດ້ຮັບຄັ້ງນີ້ ຈະເປັນກຳລັງໃຈໃຫ້ບໍລິສັດໄດ້ຕັ້ງໜ້າສືບຕໍ່ເປັນນັກລົງທຶນທີ່ມີຄວາມຮັບຜິດຊອບ ເພື່ອຂະຫຍາຍທຸລະກິດ ແລະ ສ້າງຜົນປະໂຫຍດທີ່ດີ ໃຫ້ແກ່ທຸກພາກສ່ວນກ່ຽວຂ້ອງ.”

ໃນໄລຍະຜ່ານມາ ລຊມລ ໄດ້ຮັບ “ລາງວັນທຸລະກິດດີເດັ່ນຈາລຶກວັນຄົບຮອບ 40 ປີ” ຂອງ ສປປ ລາວ ສຳລັບການປະກອບສ່ວນຕໍ່ການພັດທະນາເສດຖະກິດ-ສັງຄົມ, ລາງວັນບໍລິສັດຂຸດຄົ້ນບໍ່ແຮ່ດິເດັ່ນຂອງອາຊຽນ ແລະ ລາງວັນບໍລິສັດທີ່ມີຄວາມຮັບຜິດຊອບຕໍ່ສັງຄົມ ແລະ ການພັດທະນາຊຸມຊົນຂອງອາຊຽນ.

ນັບແຕ່ປີ 2016 ເປັນຕົ້ນມາ, ລຊມລ ໄດ້ເປັນບໍລິສັດບໍ່ແຮ່ໜຶ່ງດຽວຢູ່ໃນ ສປປ ລາວ ທີ່ໄດ້ຮັບລາງວັນທີ່ມີກຽດໃນຂັ້ນ A+ ທີ່ເປັນລະດັບສູງສຸດຈາກ ກະຊວງພະລັງງານ ແລະ ບໍ່ແຮ່ ໂດຍການເປັນແບບຢ່າງທີ່ນຳໜ້າໃຫ້ແກ່ໂຄງການອື່ນໆ.

ນັບຕັ້ງແຕ່ດຳເນີນການຂຸດຄົ້ນ-ຜະລິດຄຳ-ທອງໃນປີ 2003, ບໍ່ຄຳ-ທອງ ເຊໂປນ ໄດ້ຜະລິດຄຳຫຼາຍກວ່າ 1,5 ລ້ານ ອອນສ ແລະ ຜະລິດແຜ່ນທອງຫຼາຍກວ່າ 1,1 ລ້ານໂຕນ ອັນໄດ້ປະກອບສ່ວນລາຍຮັບໂດຍກົງຫຼາຍກວ່າ 1,6 ຕື້ໂດລາ ໃຫ້ແກ່ ສປປ ລາວ ໂດຍຜ່ານການຈ່າຍພາສີ-ອາກອນ, ຄ່າພາສີຊັບພະຍາກອນແຮ່ທາດ ແລະ ເງິນປັນຜົນ. ນອກຈາກນັ້ນ ຍັງໄດ້ສ້າງຜົນປະໂຫຍດທາງອ້ອມຫຼາຍຮ້ອຍລ້ານໂດລາ ດ້ວຍການສ້າງວຽກເຮັດງານທຳ, ຜ່ານການຝຶກອົບຮົມຕ່າງໆ, ການພັດທະນາຊຸມຊົນ ແລະ ການຈ່າຍເງິນໃຫ້ແກ່ ຄູ່ຮ່ວມທຸລະກິດ ແລະ ຜູ້ສະໜອງທ້ອງຖິ່ນ. ລຊມລ ໄດ້ລົງທຶນປະມານ 50 ລ້ານໂດລາ ໃສ່ການພັດທະນາໂຄງລ່າງພື້ນຖານແຫ່ງຊາດ ແລະ ທ້ອງຖິ່ນ, ປະກອບສ່ວນ 56 ລ້ານໂດລາ ໃສ່ການເກັບກູ້ລະເບີດບໍ່ທັນແຕກ ແລະ ຫຼາຍລ້ານໂດລາ ເຂົ້າໃນການອະນຸລັກ ມໍລະດົກທາງດ້ານວັດທະນະທຳ ແລະ ແຜນງານອື່ນໆ.

ນອກຈາກນີ້ ຍັງມີປະຊາຊົນເມືອງວິລະບູລີ ແຂວງສະຫວັນນະເຂດ ຫຼາຍກວ່າ 40.000 ຄົນ ໄດ້ຮັບຜົນປະໂຫຍດຈາກ ໂຄງການພັດທະນາຊຸມຊົນຂອງ ໂຄງການຄຳ-ທອງ ເຊໂປນ ລວມມູນຄ່າ 20 ລ້ານໂດລາ. ມາຮອດປັດຈຸບັນ, ລາຍໄດ້ຂອງຊຸມຊົນທ້ອງຖິ່ນຜ່ານກຸ່ມທຸລະກິດທ້ອງຖິ່ນໄດ້ເພີ່ມຂຶ້ນເປັນ 50 ລ້ານໂດລາ ຕະຫຼອດອາຍຸການສຳປະທານບໍ່ແຮ່ຄຳ-ທອງ ເຊໂປນ.

ທ່ານ ສະໝານ ອະເນກາ ກ່າວຕື່ມວ່າ: “ພວກເຮົາຈະສືບຕໍ່ປະກອບສ່ວນຢ່າງຕັ້ງໜ້າ ໃນຖານະຄູ່ຮ່ວມພັດທະນາ ຢູ່ ໃນ ສປປ ລາວ.”

ພິທີມອບ-ຮັບລາງວັນດັ່ງກ່າວ ໄດ້ມີຂຶ້ນເມື່ອບໍ່ດົນມານີ້ ທີ່ຫໍປະຊຸມແຫ່ງຊາດ

ຂ່າວ: ບໍ່ຄຳ-ທອງ ເຊໂປນ

ຂ່າວທີ່ໄດ້ຮັບຄວາມນິຍົມ