ເຖິງແມ່ນວ່າປີ 2022 ຜ່ານມາ, ເມືອງພຽງ ແຂວງໄຊຍະບູລີຈະໄດ້ຮັບຜົນກະທົບໂດຍກົງຈາກການແຜ່ລະບາດຂອງພະຍາດໂຄວິດ-19, ເກີດໄພທຳມະຊາດ, ສັດຕູພືດ, ພະຍາດສັດ ບວກກັບສະພາບຜັນແປຂອງໂລກ. ແຕ່ພາຍໃຕ້ການຊີ້ນໍາ-ນຳພາຂອງອົງຄະນະພັກເມືອງ, ອົງການປົກຄອງທຸກຂັ້ນໄດ້ມີຄວາມພະຍາຍາມເອົາໃຈໃສ່ຈັດຕັ້ງປະຕິບັດ ແຜນພັດທະນາ-ເສດຖະກິດ-ສັງຄົມຂອງຕົນ, ເຮັດໃຫ້ສະພາບໂດຍລວມຂອງເມືອງຍັງຮັກສາໄດ້ຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍໃນສັງຄົມໂດຍພື້ນຖານ, ພ້ອມດຽວກັນນັ້ນບັນດາພື້ນຖານໂຄງລ່າງດ້ານເສດຖະກິດກໍໄດ້ຮັບການປັບປຸງດີຂຶ້ນເປັນກ້າວໆ. ປີ 2022 ຜ່ານມາ,ເສດຖະກິດຂອງເມືອງຂະຫຍາຍຕົວໃນລະດັບ 6,7% ຕໍ່ປີ,ລວມຍອດລາຍຮັບພາຍໃນເມືອງທັງໝົດ 1.762,44 ຕື້ກີບ ສະເລ່ຍໃສ່ຫົວຄົນໜຶ່ງໄດ້ 26,73 ລ້ານກີບ ຫຼື ເທົ່າກັບ 3.108 ໂດລາຕໍ່ຄົນຕໍ່ປີ ທຽບໃສ່ຄາດໝາຍປີ 5 ປີ ປະຕິບັດໄດ້ 95,87%(ຄາດໝາຍແມ່ນ 8,3%).ລາຍຮັບດ້ານກະສິກໍາ-ປ່າໄມ້ເພີ່ມຂຶ້ນ 8% ເທົ່າກັບ 519,7 ຕື້ກີບ ກວມເອົາ 30%,ລາຍຮັບດ້ານອຸດສາຫະກໍາ-ຫັດຖະກຳ ເພີ່ມຂຶ້ນ 18% ເທົ່າກັບ 414,31 ຕື້ກີບ ກວມເອົາ 25%ແລະ ລາຍຮັບດ້ານບໍລິການ-ການຄ້າ ເພີ່ມຂຶ້ນ 10% ເທົ່າກັບ 792,43 ຕື້ກີບ ກວມເອົາ 45% ຂອງລາຍຮັບທັງໝົດ.

ສໍາລັບການຈັດຕັ້ງຜັນຂະຫຍາຍ ແລະປະຕິບັດຄຳແນະນຳ ຂອງລັດຖະມົນຕີກະຊວງການເງິນ ເລກທີ 5880/ກງ, ວ່າດ້ວຍ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2022 ໂດຍສະເພາະແມ່ນການຈັດຕັ້ງຜັນຂະຫຍາຍ ແຜນວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ສະບັບເລກທີ 03/ສພຊ ແລະຄໍາສັ່ງ ສະບັບເລກທີ 18/ນຍ ວ່າດ້ວຍ ການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼ ຂອງລາຍຮັບງົບປະມານແຫ່ງລັດ. ໄລຍະ 1 ປີຜ່ານມາ,ເມືອງສາມາດຈັດເກັບລາຍຮັບໄດ້ທັງໝົດ3,89ຕື້ກີບເທົ່າກັບ110,75% ຂອງແຜນການປີ ໃນນີ້,ລາຍຮັບຈາກສ່ວຍສາອາກອນ3,53ຕື້ກີບແລະຮັບຈາກຊັບສິນ362,27ລ້ານກີບ. ປະຕິບັດລາຍຈ່າຍທັງໝົດ3,45ຕື້ກີບເທົ່າກັບ98,45% ຂອງແຜນການປີໃນນີ້,ຈ່າຍບໍລິຫານ2,81ຕື້ກີບ,ຈ່າຍດັດສົມສົ່ງເສີມ644,26ລ້ານກີບ. ເມືອງໄດ້ແກ້ໄຂການນໍາເຂົ້າພາຫະນະບໍ່ຖືກຕ້ອງປະເພດລົດຈັກໄດ້ທັງໝົດ83 ຄັນ, ລວມລາຍຮັບຄ່າພາສີ-ອາກອນ 104,03 ລ້ານກີບ,ຄ່າທໍານຽມທາງສາມາດປະຕິບັດໄດ້ 1,58 ຕື້ກີບ ເທົ່າກັບ 96,6% ຂອງແຜນການປີ, ພາສີທີ່ດິນປະຕິບັດໄດ້ 4,71 ຕື້ກີບ, ເທົ່າກັບ 69,1% ຂອງແຜນການປີ.ຫັນເປັນທັນສະໄໝ ໂດຍສະເພາະແມ່ນການນໍາໃຊ້ລະບົບ ແທັກລີສ (TaxRis)ເຂົ້າໃນການຄຸ້ມຄອງຈັດເກັບລາຍຮັບເຂົ້າງົບປະມານ.

ສໍາລັບປີ 2023ນີ້ເມືືອງພຽງຈະສືບຕໍ່ຍູ້ແຮງການພັດທະນາເສດຖະກິດໃຫ້ຂະຫຍາຍຕົວຢ່າງຕໍ່ເນື່ອງ ສະເລ່ຍ 8,4%ໂດຍສຸມໃສ່ຊຸກຍູ້ສົ່ງເສີມພັດທະນາວິສາຫະກິດຂະໜາດນ້ອຍ ແລະ ຂະໜາດກາງ ໃຫ້ເຂັ້ມແຂງກາຍເປັນກໍາລັງສໍາຄັນໃນການຂັບເຄື່ອນເສດຖະກິດຂອງເມືອງ.ສືບຕໍ່ຈັດຕັ້ງປະຕິບັດວາລະແຫ່ງຊາດວ່າດ້ວຍຄວາມຫຍຸ້ງຍາກດ້ານເສດຖະກິດການເງິນ ແລະ ວາລະແຫ່ງຊາດວ່າດ້ວຍການຕ້ານການຮົ່ວໄຫຼລາຍຮັບງົບປະມານ.ສູ້ຊົນຈັດເກັບລາຍຮັບໃຫ້ໄດ້ 3,53 ຕື້ກີບ ໃນນີ້,ຮັບຈາກຊ່ວຍສາອາກອນ 3,33 ຕື້ກີບ,ຮັບຈາກຊັບສິນ 204,03 ລ້ານກີບ, ປະຕິບັດລາຍຈ່າຍໃຫ້ໄດ້ 3,91 ຕື້ກີບ ໃນນີ້,ຈ່າຍບໍລິຫານ 3,14 ຕື້ກີບ,ຈ່າຍດັດສົມສົ່ງເສີມ 764 ລ້ານກີບ. ຈັດຕັ້ງພະນັກງານລົງຊຸກຍູ້ຈັດເກັບລາຍຮັບຂັ້ນເມືອງຄຸ້ມຄອງ, ການເງິນຂັ້ນບ້ານເລັ່ງທວງ ອາກອນຄ້າງມອບນໍາຜູ້ປະກອບການຕ່າງໆ ພາຍໃນເມືອງ. ປະສານສົມທົບກັບຂະແໜງການທີ່ກ່ຽວຂ້ອງພາຍໃນເມືອງ ເພື່ອລົງເກັບກໍາຂໍ້ມູນຖານລາຍຮັບພາຍໃນເມືອງໃຫ້ມີຄວາມຊັດເຈນ ຖືກຕ້ອງ ແລະ ຄົບຖ້ວນ.ເບີກຈ່າຍເງິນບໍລິຫານ, ເງິນດັດສົມ ໃຫ້ແກ່ບັນດາຫ້ອງການ ຕາມການຈັດແບ່ງລາຍຈ່າຍງົບປະມານເປັນແຕ່ລະງວດ ແລະ ຕາມຄວາມອາດສາມາດຕົວຈິງ ຂອງລະບົບຄັງເງິນສົດ.ກະກຽມປິດສະຫຼຸບບັນດາຫົວໜ່ວຍງົບປະມານຢູ່ຂັ້ນເມືອງ ປະຈໍາປີ 2022 ເພື່ອເປັນບ່ອນອີງ ໃນການໄລ່ລຽງປິດບັນຊີຢູ່ຂັ້ນແຂວງ.

ຂ່າວ:ຕະວິນຍາ