ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງສະຫະພັນກຳມະບານ 1 ກຸມພາ ຄົບຮອບ67ປີ(1 ກຸມພາ1956 - 1 ກຸມພາ2023), ທ່ານ ນາງ ອາລີຍາວັນ ອັກຄະວົງຮອງເລຂາຄະນະພັກ ຮອງປະທານຄະນະບໍລິຫານງານ ສູນກາງສະຫະພັນກໍາມະບານລາວ ໄດ້ຖະແຫຼງຂ່າວວ່າ: ຄືດັ່ງພວກເຮົາໄດ້ຮັບຮູ້ນຳກັນແລ້ວວ່າ ວັນທີ 1 ກຸມພາ ຂອງທຸກໆປີ ສູນກາງສະຫະພັນກຳມະບານລາວ ກໍຄືສະຫະພັນກຳມະບານແຕ່ລະຂັ້ນ ໄດ້ມີການຈັດຕັ້ງສະເຫຼີມສະຫຼອງວັນດັ່ງກ່າວ ດ້ວຍບັນຍາກາດທີ່ມີຄວາມໝາຍ ຄວາມສຳຄັນ ສຳລັບຖັນແແຖວຄະນະນຳກຳມະບານ, ພະນັກງານ-ລັດຖະກອນ, ສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວບັນດາເຜົ່າເພື່ອລະນຶກເຖິງມູນເຊື້ອ ຜົນງານການເຄື່ອນໄຫວໃນແຕ່ລະໄລຍະ ຂອງອົງການຈັດຕັ້ງກຳມະບານກໍຄື ສະຫະພັນກຳມະບານລາວ.

ພາຍຫຼັງການສ້າງຕັ້ງພັກປະຊາຊົນປະຕິວັດລາວເກືອບ 1 ປີ; ມາເຖິງວັນທີ 1 ກຸມພາ ປີ 1956 ກົມການເມືອງສູນກາງພັກໄດ້ມີມະຕິຕົກລົງສ້າງຕັ້ງອົງການຈັດຕັ້ງກຳມະບານຂຶ້ນຢ່າງເປັນທາງການຢູ່ເຂດທີ່ໝັ້ນແຂວງຫົວພັນໂດຍແມ່ນທ່ານ ສີສົມພອນ ລໍວັນໄຊ ເປັນຜູ້ຊີ້ນຳ. ໂດຍມີຈຸດປະສົງເພື່ອສືບຕໍ່ໂຄສະນາຂົນຂວາຍເຕົ້າໂຮມກຳມະກອນ, ຜູ້ອອກແຮງງານລາວບັນດາເຜົ່າໃຫ້ມີຄວາມຕື່ນຕົວປະຕິວັດນ້ຳໃຈຮັກຊາດ, ມີລະບຽບແບບແຜນ, ເປັນພົນລະເມືອງດີຂອງຊາດ, ສົ່ງເສີມການມີວຽກເຮັດງານທຳ ແລະ ເປັນຕົວແທນໃຫ້ແກ່ການປົກປ້ອງສິດຜົນປະໂຫຍດອັນຊອບທຳໃຫ້ແກ່ກຳມະກອນ, ຜູ້ອອກແຮງງານລາວບັນດາເຜົ່າ, ກາຍເປັນກຳລັງແຮງເຂົາຮ່ວມຢ່າງຕັ້ງໜ້າ ແລະ ເປັນເຈົ້າການໃນການຕໍ່ສູ້ກູ້ຊາດ, ປົກປັກຮັກສາ ແລະ ພັດທະນາປະເທດຊາດຕາມເສັ້ນທາງກ້າວຂຶ້ນສັງຄົມນິຍົມ.

ປີ 1966 ສູນກາງພັກໄດ້ປັບປຸງການຈັດຕັ້ງກຳມະບານຢ່າງເປັນທາງການໂດຍມອບຄວາມຮັບຜິດຊອບໃຫ້ທ່ານໜູຮັກ ພູມສະຫວັນ ເປັນຜູ້ຊີ້ນຳ. ເພື່ອສືບຕໍ່ເສີມຂະຫຍາຍສິດເປັນເຈົ້າຂອງມະຫາຊົນ, ປະກອບສ່ວນໃນພາລະກິດຕໍ່ສູ້ປະຕິວັດເພື່ອກໍ່ສ້າງເຂດປົດປ່ອຍເປັນລັດໜຶ່ງ, ກຽມທຸກເງື່ອນໄຂ ເພື່ອປົດປ່ອຍປະເທດຊາດຢ່າງສົມບູນ. ຢູ່ເຂດປົດປ່ອຍພັກໄດ້ເອົາໃຈໃສ່ຊີ້ນຳກໍ່ສ້າງເສດຖະກິດຢ່າງເປັນລະບົບ ສ້າງໂຮງຈັກ, ໂຮງງານຈຳນວນໜຶ່ງເຊັ່ນ: ໂຮງງານຕີເຫຼັກ, ໂຮງງານຕ່ຳແຜ່ນ, ໂຮງງານປຸງແຕ່ງສະບຽງອາຫານ, ໂຮງພິມ, ໄປສະນີ, ສື່ສານ, ການກໍ່ສ້າງຖະໜົນຫົນທາງ ແລະ ອື່ນໆ, ອັນໄດ້ເຮັດໃຫ້ກຳມະກອນນັບມື້ນັບເພີ່ມຂຶ້ນ, ອົງການກຳມະບານກໍໄດ້ສ້າງຕັ້ງຮາກຖານຂຶ້ນຢູ່ແຕ່ລະຫົວໜ່ວຍການຜະລິດ, ແຕ່ລະສຳນັກງານອົງການຂອງລັດ, ໂຮງຮຽນ, ໂຮງໝໍ. ໜ້າທີ່ຕົ້ນຕໍຂອງກຳມະບານ: ຖືເອົາການໂຄສະນາປະຕິບັດແນວທາງຂອງພັກແຕ່ລະໄລຍະເປັນເນື້ອໃນໃຈກາງຂອງການເຄື່ອນໄຫວສ້າງຂະບວນການຕ່າງໆ, ທຸກສິ່ງທຸກຢ່າງເພື່ອຮັບໃຊ້ແນວໜ້າ, ຕີເອົາຊະນະສັດຕູ ແລະ ປົກປັກຮັກສາເຂດປົດປ່ອຍໃຫ້ເຂັ້ມແຂງ ສຶກສາອົບຮົມມະຫາຊົນ, ເຮັດຫຼ້ອນໜ້າທີ່ວິຊາສະເພາະລົງຂົນຂວາຍກໍ່ສ້າງຮາກຖານ, ເຂົ້າຮ່ວມການກໍ່ສ້າງກຳລັງກົມກອງທ້ອງຖິ່ນຕ່າງໆ, ປຸກລະດົມຊຸກຍູ້ຂະບວນການຕໍ່ສູ້ຂອງມະຫາຊົນໃຫ້ຟົດຟື້ນຢ່າງຕໍ່ເນື່ອງໂດຍຢຶດໝັ້ນແນວທາງນະໂຍບາຍຂອງພັກ: ສັນຕິພາບ, ເອກະລາດ ປະຊາທິປະໄຕ ແລະ ເອກະພາບ.

ພາຍຫຼັງສ້າງຕັ້ງລະບອບໃໝ່ (ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ)ກົມການເມືອງສູນກາງພັກໄດ້ສືບຕໍ່ຊີ້ນຳການເຄື່ອນໄຫວຂອງສະຫະພັນກຳມະບານລາວມີຄວາມໜັກແໜ້ນ ແລະ ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ປັບປຸງການຈັດຕັ້ງ ສະຫະພັນກຳມະບານລາວເປັນລະບົບ ແຕ່ສູນກາງລົງຮອດຮາກຖານໃນທົ່ວປະເທດ, ໃນນີ້ເພື່ອກະກຽມໃຫ້ການດຳເນີນກອງປະຊຸມໃຫຍ່ກຳມະບານທົ່ວປະເທດຄັ້ງທີ I ສູນກາງພັກໄດ້ແຕ່ງຕັ້ງຄະນະຄົ້ນຄວ້າປັບປຸງການຈັດຕັ້ງກຳມະບານລາວຂຶ້ນປະກອບມີ 5 ທ່ານ ໂດຍແມ່ນທ່ານ ສະນັ່ນສຸດທິຈັກ ກຳມະການສູນກາງພັກເປັນປະທານໃນເວລານັ້ນ.

ນັບແຕ່ມີການສ້າງຕັ້ງອົງການຈັດຕັ້ງກຳມະບານລາວກໍຄືສະຫະພັນກຳມະບານລາວໄດ້ເອົາໃຈໃສ່ປະຕິບັດຕາມພາລະບົດບາດໃນການໂຄສະນາສຶກສາອົບຮົມທາງດ້ານການເມືອງ-ແນວຄິດໃຫ່ແກ່ສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວບັນດາເຜົ່າ, ປົກປ້ອງສິດຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນ ແລະຜູ້ອອກແຮງງານລາວໄດ້ມີຜົນສຳເລັດຫຼາຍໆດ້ານເປັນຕົ້ນ ໃນປີ 2022 ໄດ້ສະເໜີລັດຖະບານຂຶ້ນຄ່າແຮງງານຂັ້ນຕ່ຳຊຸດໃໝ່ໃນພາກວິສາຫະກິດຈາກ 1.100.000 ກີບມາເປັນ 1.200.000 ກີບ ໄດ້ເລີ່ມຈັດຕັ້ງປະຕິບັດຕັ້ງແຕ່ວັນທີ 1 ສິງຫາ 2022 ເປັນຕົ້ນມາ ແລະ ໃນວັນທີ 1 ພຶດສະພາ 2023 ທີ່ຈະມາເຖິງຈະເພີ່ມຈາກ 1.200.000 ກີບ ຂຶ້ນເປັນ 1.300.000 ກີບ ແລະ ໄດ້ລົງຊຸກຍູ້ການເຄື່ອນໄຫວວຽກງານກຳມະບານຢູ່ສະຫະພັນກຳມະບານກະຊວງ, ອົງການ, ນະຄອນຫຼວງ ແລະ ແຂວງ.

ນະໂອກາດອັນມີຄວາມໝາຍສຳຄັນນີ້ຂ້າະພະເຈົ້າຂໍອວຍພອນໄຊອັນປະເສີດມາຍັງການນຳພັກ-ລັດທຸກທ່ານຈົ່ງມີພະລານາໄມສົມບູນ, ມີຄວາມສຸກໃນຊີວິດສ່ວນຕົວ ແລະສືບຕໍ່ນຳພາປະເທດຊາດກ້າວຂຶ້ນຢ່າງມີໄຊ.

ຂໍອວຍພອນໄຊ ໃຫ້ຄະນະພັກ, ອົງການປົກຄອງ, ຄະນະນຳກຳມະບານລາວແຕ່ລະຂັ້ນຕະຫຼອດເຖິງສະມາຊິກກຳມະບານ, ກຳມະກອນ ແລະຜູ້ອອກແຮງງານລາວບັນດາເຜົ່າຈົ່ງມີສຸຂະພາບທີ່ເຂັ້ມແຂງ, ປະສົບຜົນສຳເລັດໃນໜ້າທີ່ອັນມີກຽດ ແລະສູງສົ່ງຂອງບັນດາທ່ານ.