ວິທະຍາໄລຄູປາກເຊ ແຂວງຈໍາປາສັກໄດ້ຈັດງານນິທັດສະການວາງສະແດງອຸປະກອນສື່ການຮຽນການສອນ ເພື່ອພັດທະນາຄວາມຮູ້ຄວາມສາມາດທາງດ້ານວິຊາການໃຫ້ແກ່ນັກສຶກສາ, ຄູ-ອາຈານຂຶ້ນໃນວັນທີ 25 ມັງກອນ ນີ້ໂດຍເປັນກຽດເຂົ້າຮ່ວມ ມີທ່ານ ສົມໄຊ ເທບສົມບັດ ຜູ້ອຳນວຍການວິທະຍາໄລຄູປາກເຊ, ມີແຂກຖືກເຊີນຈາກສູນກາງ ແລະ ອ້ອມຂ້າງແຂວງເຂົ້າຮ່ວມ.

ການຈັດງານຄັ້ງນີ້, ແມ່ນບັນດາຫ້ອງການຕ່າງໆ ທີ່ຂຶ້ນກັບວິທະຍາໄລຄູປາກເຊຄື:ຫ້ອງການອະນຸບານ-ປະຖົມ,ຫ້ອງການພາສາຕ່າງປະເທດ,ຫ້ອງການວິທະຍາສາດທຳມະຊາດ ແລະຫ້ອງການວິທະຍາສາດສັງຄົມຊຶ່ງໄດ້ຮວບຮວມເອົາຜົນງານການຜະລິດສື່ການຮຽນການສອນ ແລະ ນະວັດຕະກຳຈາກກິດຈະກໍາການຮຽນການສອນໃນແຕ່ລະສາຂາວິຊາຮຽນ ນໍາມາວາງສະແດງໃຫ້ໄດ້ເບິ່ງ,ໄດ້ຮັບຮູ້ເຖິງໝາກຜົນ ຜົນງານຂອງສະພາບການຈັດການຮຽນການສອນໃນໄລຍະຜ່ານມາ ເຫັນວ່າໄດ້ມີການພັດທະນາປັບປຸງຢ່າງມີຄຸນນະພາບ,ຊຶ່ງໄດ້ມີການສາທິດສື່ ແລະ ວິທີນໍາໃຊ້ ຂອງແຕ່ລະຫ້ອງການ ທີ່ປະດິດຄິດແຕ່ງສື່ການຮຽນການສອນດ້ວຍຫຼາກຫຼາຍວິທີແຕກຕ່າງກັນ, ມີຈິນຕະນາການເຮັດໃຫ້ຜູ້ສອນຜູ້ຮຽນສາມາດສື່ສານກັນ ແລະສົ່ງຄວາມຮູ້ໃຫ້ກັນມີຄວາມເຂົ້າໃຈງ່າຍຂຶ້ນກ່ວາເກົ່າ. ສຳລັບວັດສະດຸທີ່ນຳໃຊ້ເຂົ້າໃນການປະດິດສື່ການຮຽນການສອນນັ້ນແມ່ນໄດ້ນຳເອົາວັດສະດຸທີ່ຫາໄດ້ງ່າຍ ເຊັ່ນ:ເຈ້ຍເສດ,ກະຕຸກນໍ້າສະອາດ,ຂວດແກ້ວ,ແຜ່ນຜັດສະຕິກ ແລະອື່ນໆ.

ນອກຈາກນີ້, ຍັງຈັດໃຫ້ມີການແຂ່ງຂັນຍິງຈະລວດນ້ຳ, ການສະແດງສິລະປະແລະ ການນຳສະເໜີຜົນງານການວິໄຈຂອງຄູ-ອາຈານ.ທັງນີ້ເພື່ອພັດທະນາຄວາມຮູ້ຄວາມສາມາດທາງດ້ານວິຊາການໃຫ້ແກ່ນັກສຶກສາທີ່ຈະເປັນຄູຮູ້ປະດິດສື່ການຮຽນ-ການສອນໃນວິຊາຕ່າງໆສ້າງໃຫ້ເຂົາເຈົ້າມີທັກສະທາງດ້ານການສອນ,ການນຳໃຊ້ສື່ການສອນເຂົ້າໃນການເຮັດກິດຈະກຳການສອນໃນໂຮງຮຽນພ້ອມນັ້ນກໍສາມາດຜະລິດແລະນຳໃຊ້ອຸປະກອນທີ່ຫາໄດ້ງ່າຍໃນທ້ອງຖິ່ນເພື່ອເຮັດໃຫ້ເກີດຄວາມເຂົ້າໃຈງ່າຍ ແລະມີຄວາມຄ່ອງຕົວທັງສ້າງໃຫ້ມີປະສົບການທັກສະໃນການຝຶກປະຕິບັດການນຳໃຊ້ສື່ການສອນເຂົ້າໃນການສອນພາກປະຕິບັດຕົວຈິງໄດ້ຫຼາຍຂຶ້ນ ເຮັດໃຫ້ການສອນທິດສະດີ ໄດ້ຕິດພັນກັບພາກປະຕິບັດຕົວຈິງ ແລະການນຳໃຊ້ເຂົ້າໃນຊີວີດປະຈຳວັນທັງເປັນການຖ່າຍທອດຄວາມສາມາດ ແລະປະສົບການໃຫ້ແກ່ຮຸ່ນຕໍ່ໆໄປ.

(ຂ່າວ-ພາບ: ຂາວພອນ ມ້າວຄຳຜິວ)