ຜູ້ພັດທະນາແຫຼ່ງທ່ອງທ່ຽວນໍ້າຕົກຕາດເຍືອງໄດ້ຈັດພິທີປະກາດການສ້າງຕັ້ງກຸ່ມຜະລິດກະສິກຳອິນຊີບ້ານຫຼັກ40ເມືອງປາກຊ່ອງແຂວງຈຳປາສັກຢ່າງເປັນທາງການພາຍຫຼັງມີນິຕິກຳຂອງເມືອງອະນຸຍາດໃຫ້ຈັດຕັ້ງເຄື່ອນໄຫວມາໃນໄລຍະ1ປີຜ່ານມາ. ພິທີຈັດຂຶ້ນວັນທີ25ມັງກອນນີ້ທີ່ແຫຼ່ງທ່ອງທ່ຽວນໍ້າຕົກຕາດເຍືອງ ໂດຍການເປັນປະທານຮ່ວມຂອງທ່ານ ຊັບປະທີບໄຊຍະວົງຮອງເລຂາພັກເມືອງປາກຊ່ອງ, ທ່ານນາງສອນທິດາອຸນາພົມຜູ້ພັດທະນາແຫຼ່ງທ່ອງທ່ຽວນໍ້າຕົກຕາດເຍືອງ ປະທານຄະນະບໍລິຫານກຸ່ມຜູ້ຜະລິດກະສິກໍາອິນຊີບ້ານຫຼັກ40ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນພິທີທ່ານນາງສອນທິດາອຸນາພົມໄດ້ຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານຂອງກຸ່ມໃນຊຸມປີຜ່ານມາ ຊຶ່ງກຸ່ມຜະລິດກະສິກໍາອິນຊີບ້ານຫຼັກ40ໄດ້ຮັບອະນຸຍາດສ້າງຕັ້ງແລະຄຸ້ມຄອງໂດຍທ່ານເຈົ້າເມືອງແລະຫ້ອງການກະສິກຳແລະປ່າໄມ້ເມືອງໃນການດໍາເນີນກິດຈະການຜະລິດກະສິກໍາອິນຊີປູກພືດຜັກປອດສານພິດເປັນສິນຄ້າລວມໝູ່ຂອງປະຊາຊົນບ້ານຫຼັກ40ເມືອງປາກຊ່ອງໃນຕົ້ນປີ2021. ປັດຈຸບັນມີສະມາຊິກທັງໝົດ60ຄອບຄົວ, ສະມາຊິກສໍາຮອງ11ຄອບຄົວ, ແບ່ງເປັນ4ຈຸຜະລິດໂດຍໄດ້ປູກພືດຜັກແລະໝາກໄມ້ໃນແບບສວນປະສົມປະສານແຊມໃສ່ໃນເນື້ອທີ່ສວນກາເຟຂອງແຕ່ລະຄອບຄົວຈໍານວນ87ເຮັກຕາ, ລົງທຶນຈົດທະບຽນສ້າງຕັ້ງກຸ່ມຈໍານວນ100ລ້ານກີບຊຶ່ງບໍລິສັດພັດທະນາແຫຼ່ງທ່ອງທ່ຽວນໍ້າຕົກຕາດເຍືອງຈໍາກັດ (ຄູ່ສັນຍາ) ໄດ້ກໍານົດນະໂຍບາຍສົ່ງເສີມກຸ່ມດ້ວຍວິທີການເກັບຊື້ຜົນຜະລິດແບບຄໍ້າປະກັນລາຄາທີ່ເໝາະສົມກັບກຸ່ມໂດຍອີງຕາມສະພາບຕົວຈິງໃນແຕ່ລະໄລຍະ. ນອກນີ້ຍັງມີບໍາເນັດເພີ່ມຕື່ມໃຫ້ກິໂລລະ200ກີບເພື່ອໃຫ້ກຸ່ມມີເງິນສະສົມສ້າງກອງທຶນຄັງສະຫວັດດີການຂອງກຸ່ມ. ໃນ1ປີຜ່ານມາກຸ່ມສາມາດຈໍາໜ່າຍຜົນຜະລິດໃຫ້ບໍລິສັດ (ຄູ່ສັນຍາ) ໄດ້ຈໍານວນ48,9ໂຕນຄິດເປັນເງິນ561ລ້ານກ່ວາກີບ. ໃນນີ້, ບໍລິສັດໄດ້ວາງແຜນຈະເກັບຊື້ພືດຜັກ-ໝາກໄມ້ໃຫ້ໄດ້44ຊະນິດ/ເດືອນ, ແຕ່ການເຄື່ອນໄຫວຕົວຈິງສາມາດສະໜອງໄດ້ພຽງແຕ່24ຊະນິດ, ໃນນັ້ນປະເພດຜັກ18ຊະນິດ, ປະເພດໝາກໄມ້5ຊະນິດແລະຖ່ານດັງໄຟລວມທັງໝົດ48.994ກິໂລແລະສາມາດເກັບເງິນກອງທຶນຄັງສະສົມສະຫວັດດີການຂອງກຸ່ມກິໂລລະ200ກີບໄດ້9.798.940ກີບ; ສໍາລັບທິດທາງແຜນການໃນປີ2023, ຈະສືບຕໍ່ຜະລິດແລະຈໍາໜ່າຍຜົນຜະລິດກະສິກໍາອິນຊີພືດຜັກປອດສານພິດເປັນສິນຄ້າໃຫ້ແຂງແຮງກວ່າເກົ່າຊຶ່ງຢູ່ພາຍໃນສວນປູກຂອງແຕ່ລະຄອບຄົວຈະສູ້ຊົນສະໜອງໃຫ້ຄູ່ສັນຍາກໍຄືແຫຼ່ງທ່ອງທ່ຽວຕາດເຍືອງແລະສາມາດຈໍາໜ່າຍທົ່ວໄປຫຼືໃນຕະຫຼາດສົດກັບທີ່ຕາດເຍືອງແລະສົ່ງອອກຂາຍພາຍໃນແລະຕ່າງປະເທດໃຫ້ໄດ້75ໂຕນຕໍ່ປີເພື່ອໃຫ້ສະມາຊິກແຕ່ລະຄອບຄົວມີລາຍຮັບເພີ່ມແລະມີເງິນກອງທຶນສະສົມພາຍໃນກຸ່ມເພື່ອເປັນສະຫວັດດີການໃຫ້ສະມາຊິກ. ພ້ອມນີ້ກໍຈະຂະຫຍາຍເນື້ອທີ່ສວນລວມຂອງກຸ່ມຢູ່ໃນເນື້ອທີ່ຂອງບໍລິສັດພັດທະນາແຫຼ່ງທ່ອງທ່ຽວຕາດເຍືອງໃຫ້ຫຼາຍຂຶ້ນກ່ວາເກົ້າ.

ຈຸດປະສົງກໍເພື່ອເປີດໂອກາດໃຫ້ປະຊາຊົນທີ່ຢູ່ໃນເຂດພື້ນທີ່ໃກ້ຄຽງແຫຼ່ງທ່ອງທ່ຽວນໍ້າຕົກຕາດເຍືອງໄດ້ມີຜົນປະໂຫຍດແລະປະກອບສ່ວນຮ່ວມໃນກິດຈະກໍາການພັດທະນາແຫຼ່ງທ່ອງທ່ຽວນໍ້າຕົກຕາດເຍືອງແບບຍືນຍົງປະຊາຊົນມີສ່ວນຮ່ວມຊຶ່ງຈະມີລາຍໄດ້ສໍາຮອງເພີ່ມຈາກການປູກກາເຟໂດຍການສະໜອງພືດຜັກ, ໝາກໄມ້ປອດສານພິດໃຫ້ແຫຼ່ງທ່ອງທ່ຽວນໍາມາປຸງແຕ່ງອາຫານເພື່ອສຸຂະພາບທີ່ມີເອກະລັກໃຫ້ແກ່ນັກທ່ອງທ່ຽວທັງພາຍໃນ-ຕ່າງປະເທດແລະຈໍາໜ່າຍກັບທີ່, ທົ່ວໄປແລະພາຍໃນຕະຫຼາດສົດຕາດເຍືອງແລະສົ່ງອອກໄປຂາຍພາຍໃນແລະຕ່າງປະເທດເພື່ອແກ້ໄຂຊີວິດການເປັນຢູ່ຂອງຄອບຄົວພໍ່ແມ່ປະຊາຊົນໃຫ້ດີຂຶ້ນເທື່ອລະກ້າວ. ເຮັດໃຫ້ພໍ່ແມ່ປະຊາຊົນເປັນເຈົ້າການປະກອບສ່ວນໃນການອະນຸລັກປົກປັກຮັກສາທໍາມະຊາດ, ສິ່ງແວດລ້ອມ, ປ່າໄມ້ແລະແຫຼ່ງນໍ້າໃຫ້ມີຄວາມອຸດົມສົມບູນຕິດພັນກັບການອະນຸລັກຮັກສາວັດທະນະທໍາ, ຮີດຄອງປະເພນີທີ່ມີເອກະລັກໃຫ້ຍືນຍົງໂດຍສະເພາະແຫຼ່ງທ່ອງທ່ຽວທໍາມະຊາດນໍ້າຕົກຕາດເຍືອງ,ດຶງດູດນັກທ່ອງທ່ຽວທັງພາຍໃນແລະຕ່າງປະເທດໃຫ້ເຂົ້າມາທ່ຽວຊົມຢ່າງຫຼວງຫຼາຍໃນພິທີໄດ້ມອບຂອງຂວັນແລະຍ້ອງຍໍພ້ອມນະໂຍບາຍໃຫ້ແກ່ສະມາຊິກກຸ່ມທີ່ດີເດັ່ນໃນການປູກແລະສົ່ງຜົນຜະລິດອິນຊີເຂົ້າມາຈຳໜ່າຍພາຍໃນກຸ່ມຕື່ມອີກ.

ຈາກນັ້ນ, ທ່ານ ຊັບປະທີບໄຊຍະວົງຮອງເລຂາພັກເມືອງພ້ອມຂະແໜງການ,ຫ້ອງການກ່ຽວຂ້ອງເຊັ່ນ:ຫ້ອງການຖວທເມືອງ, ຫ້ອງການກະສິກໍາ-ປ່າໄມ້ເມືອງ, ຫ້ອງການຮສສເມືອງແລະເລຂາຄະນະພັກຮາກຖານກຸ່ມບ້ານທີIII ກໍໄດ້ມີຄໍາເຫັນເປັນເອກກະພາບສູງຕໍ່ຜົນງານການເຄື່ອນໄຫວຂອງກຸ່ມໃນໄລະຍະຜ່ານມາແລະຝາກຄວາມຫວັງເຊື່ອໝັ້ນວ່າພາຍໃຕ້ການບໍລິຫານຈັດການທີ່ດີແລະມີປະສົບການສູງຂອງທ່ານນາງສອນທິດາອຸນາພົມຜູ້ພັດທະນາແຫຼ່ງທ່ອງທ່ຽວນໍ້າຕົກຕາດເຍືອງໃນຕໍ່ໜ້າຈະສາມາດຂະຫຍາຍກິດຈຳການໄດ້ຢ່າງກວ້າງຂວາງແລະເຂັ້ມແຂງນຳຜົນປະໂຫຍດຢ່າງຫຼວງຫຼາຍໃຫ້ແກ່ປະຊາຊົນສໍາເລັດຕາມຄາດໝາຍທີ່ວາງໄວ້.

(ຂ່າວ-ພາບ: ເກດສະໜາແກ້ວສຸວັນນະແສງ)