ຂ່າວສານຊີອາໄອລາຍງານ ເມື່ອບໍ່ດົນມານີ້, ກະຊວງອຸດສາຫະກຳ ແລະ ຂໍ້ມູນຂ່າວສານຈີນໄດ້ເປີດເຜີຍບົດລາຍງານ ໂດຍສະແດງໃຫ້ເຫັນວ່າ ຍອດຈຳນວນການຜະລິດກຳປັ່ນຂອງຈີນ ປີ 2022 ສຳເລັດກວມ 47,3% ຂອງຍອດຈຳນວນທົ່ວໂລກ, ອັດຕາສ່ວນໃນຕະຫຼາດສາກົນຂອງຂະແໜງການຜະລິດກຳປັ່ນຂອງຈີນໄດ້ຮັກສາອັນດັບໜຶ່ງໃນໂລກ.

ໃນປີ 2022, ວິສາຫະກິດຜະລິດກຳປັ່ນຈີນສືບຕໍ່ເພີ່ມທະວີການປະດິດສ້າງໃໝ່ດ້ານວິທະຍາສາດເຕັກນິກ ຊຶ່ງຜົນສຳເລັດຕົ້ນຕໍລວມມີ ການເລີ່ມຜະລິດກຳປັ່ນໂດຍສານຂະໜາດໃຫຍ່ທີ່ຜະລິດໂດຍຈີນລຳທີ 2, ມອບ-ຮັບກຳປັ່ນລ້ຽງປາຂະໜາດໃຫຍ່ອັດສະລິຍະຂັ້ນ 1 ແສນໂຕນ ລຳທຳອິດໃນທົ່ວໂລກ, ມອບ-ຮັບກຳປັ່ນບັນທຸກຕູ້ຄອນເທັນເນີຂະໜາດໃຫຍ່ທີ່ສຸດໃນທົ່ວໂລກ. ຜະລິດສຳເລັດ ແລະ ມອບ-ຮັບກຳປັ່ນຂົນສົ່ງອາຍແກັສທຳມະຊາດທາດແຫຼວ (LNG) ທີ່ໃຫຍ່ທີ່ສຸດໃນທົ່ວໂລກທັງເປັນລຳທຳອິດຂອງຈີນເປັນຕົ້ນ.

ນອກຈາກນີ້, ວິສາຫະກິດຜະລິດກຳປັ່ນຈີນໄດ້ຮັບໃບສັ່ງຈອງກໍາປັ່ນຂົນສົ່ງ LNG ຂະໜາດໃຫຍ່ທັງໝົດ 55 ລຳໃນຕະຫຼອດປີ 2022, ໄດ້ກວມເອົາຫຼາຍກວ່າ 30% ຂອງຍອດຈຳນວນໃບສັ່ງຈອງທົ່ວໂລກ ໂດຍໄດ້ສ້າງສະຖິຕິໃໝ່ຄັ້ງປະຫວັດສາດ.