ເມື່ອບໍ່ດົນມານີ້ ທີ່ສະໂມສອນເມືອງຫີນເຫີບແຂວງວຽງຈັນໄດ້ຈັດພິທີສອບເສັງຄັດເລືອກນັກຮຽນເກັ່ງຊັ້ນປ.5, ມ.4 ແລະມ.7 ທົ່ວເມືອງ ໂດຍການເຂົ້າຮ່ວມຂອງທ່ານໂອລົດສີສູນທອນຮອງເຈົ້າເມືອງຫີນເຫີບ, ມີທ່ານຄຳສອນຈັນທະລັງສີຫົວໜ້າຫ້ອງການສຶກສາທິການແລະກິລາເມືອງ,ຄູ-ອາຈານ, ຄະນະກໍາມະການສອບເສັງແລະນັກຮຽນທົ່ວເມືອງເຂົ້າຮ່ວມ.

ການສອບເສັງຄັ້ງນີ້ມີນັກສອບເສັງທີ່ມາຈາກໂຮງຮຽນມັດທະຍົມຕົ້ນ, ມັດທະຍົມສົມບູນແລະໂຮງຮຽນປະຖົມຈາກ 5 ເຂດເຂົ້າຮ່ວມທັງໝົດ91 ຄົນຍິງ63 ຄົນ, ໃນນັ້ນຊັ້ນປະຖົມປ.5 ມີ 30 ຄົນຍິງ 25 ຄົນ, ຊັ້ນມັດທະຍົມຕົ້ນມ.4 ມີ 45 ຄົນຍິງ 29 ຄົນແລະຊັ້ນມັດທະຍົມປາຍມ.7 ມີ 16 ຄົນຍິງ 9 ຄົນ. ເພື່ອຄັດເລືອກເອົານັກຮຽນເກັ່ງໃນແຕ່ລະວິຊາຕາງໜ້າໃຫ້ເມືອງຫີນເຫີບເຂົ້າຮ່ວມການສອບເສັງໃນລະດັບແຂວງ ຊຶ່ງຈະຈັດຂຶ້ນໃນເດືອນມີນາທີ່ຈະມາເຖິງນີ້ທີ່ໂຮງຮຽນມັດທະຍົມສົມບູນໂພນໝີ. ສຳລັບວິຊາສອບເສັງຊັ້ນປະຖົມມີ 3 ວິຊາຄື:ວິຊາພາສາລາວ-ວັນນະຄະດີ, ຄະນິດສາດ, ໂລກອ້ອມຕົວ; ຊັ້ນມັດທະຍົມຕົ້ນມ.4 ສອບເສັງໃນ 5 ວິຊາຄື:ວິຊາພາສາລາວ-ວັນນະຄະດີ, ຄະນິດສາດ, ເຄມີສາດ, ຟີຊິກສາດ,ພາສາອັງກິດ, ໃນນັ້ນຊັ້ນມັດທະຍົມປາຍມ.7 ສອບເສັງໃນ 5 ວິຊາຄື:ພາສາລາວ-ວັນນະຄະດີ, ຄະນິດສາດ, ເຄມີສາດ,ຟິຊິກສາດ, ພາສາອັງກິດ.

ໃນວັນດຽວກັນທ່ານນາງລັດຕະນາສໍພາບມີໄຊຜູ້ປະສານງານມູນນິທິຮ່ວມໃຈສເກົາຫຼີໄດ້ນໍາເອົາອຸປະກອນການຮຽນ, ທຶນການສຶກສາມາມອບໃຫ້ບັນດານັກຮຽນແລະທຶນຄູສອນດີເດັ່ນມອບໃຫ້ຄູ-ອາຈານຈໍານວນ 2 ທ່ານລວມມູນຄ່າເປັນເງິນ 10 ລ້ານກວ່າກີບ.

ຂ່າວ-ພາບ:ເມືອງຫີນເຫີບ