ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 14 ແຂວງສາລະວັນ ເປີດກອງປະຊຸມຄົບຄະນະ ປະຈໍາປີ 2022 ແລະ ປະກາດຍ້ອງຍໍຜົນງານ 5 ປີ (2016-2020) ສະພາປະຊາຊົນແຂວງສາລະວັນ ຈັດຂຶ້ນໃນວັນທີ 7 ກຸມພານີ້ ທີ່ສະໂມສອນແຂວງ,ພາຍໃຕ້ການເປັນປະທານຂອງ ທ່ານ ສີເຮັງ ຫອມສົມບັດ ປະທານຄະນະສະມາຊິກສະພາແຫ່ຊາດ ເຂດເລືອກຕັ້ງທີ 14ປະທານສະພາປະຊາຊົນແຂວງ, ມີ ສສຊ ເຂດເລືອກຕັ້ງທີ 14,ສສຂແລະພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມ, ທ່ານ ຂັນໄຊ ລັດຖະເຮົ້າ ຮອງປະທານຄະນະສະມາຊິກສະພາແຫ່ງຊາດ ຮອງປະທານສະພາປະຊາຊົນແຂວງ ໄດ້ຜ່ານບົດສະຫຼຸບການເຄື່ອນໄຫວວຽກງານ ປະຈຳປີ 2022 ຊຶ່ງໄດ້ເອົາໃຈໃສ່ປະຕິບັດຕາມ 3 ພາລະບົດບາດ, ສິດ ແລະ ໜ້າທີ່ ຄື: ພິຈາລະນາ, ຄົ້ນຄວ້າ, ຕົກລົງຮັບຮອງເອົາບັນດານິຕິບັນຍັດ, ນິຕິກຳ ຢູ່ຂັ້ນທ້ອງຖິ່ນ ແລະ ສູນກາງ, ພິຈາລະນາຕົກລົງຮັບຮອງເອົາບັນຫາສຳຄັນຂອງຊາດຂອງແຂວງ ແລະ ການຕິດຕາມກວດກາບັນດາວຽກງານຕ່າງໆ.

ໄລຍະ 1 ປີຜ່ານມາ, ຄະນະສະມາຊິກສະພາແຫ່ງຊາດ ໄດ້ຮ່ວມຄົ້ນຄວ້າ, ພິຈາລະນາຮັບຮອງເອົາບັນດາກົດໝາຍ, ນິຕິກໍາລຸ່ມກົດໝາຍ ຢູ່ກອງປະຊຸມສະໄໝສາມັນຂອງສະພາແຫ່ງຊາດ, ທັງໄດ້ປະກອບຄຳຄິດເຫັນປັບປຸງເນື້ອໃນກົດໝາຍ ແລະ ກົດໝາຍສ້າງຂຶ້ນໃໝ່, ທາບທາມຮ່າງກົດໝາຍທັງພາຍໃນ ແລະ ຕ່າງປະເທດ. ການຕົກລົງບັນຫາພື້ນຖານສຳຄັນຂອງຊາດຂອງແຂວງ ເປັນຕົ້ນ: ພິຈາລະນາຮັບຮອງການໂຈະການປະຕິບັດໂຄງການລົງທຶນຂອງລັດ ໂຄງການກໍ່ສ້າງຝາຍນ້ຳລົ້ນ ຢູ່ 2 ເມືອງຄື: ເມືອງວາປີ ແລະ ເມືອງຕຸ້ມລານ. ນອກຈາກນັ້ນ, ກໍໄດ້ເຄື່ອນໄຫວຕິດຕາມກວດກາ, ປະເມີນຜົນການປະຕິບັດບັນດາອໍານາດຂອງລັດຂັ້ນທ້ອງຖິ່ນ ເຊັ່ນ: ປະເມີນກົດໝາຍ 4 ສະບັບທີ່ຕິດພັນກັບການຈັດຕັ້ງປະຕິບັດເນື້ອໃນ 2 ວາລະແຫ່ງຊາດ, ການປະຕິບັດມະຕິກອງປະຊຸມສະພາແຫ່ງຊາດ ແລະ ມະຕິກອງປະຊຸມສະພາປະຊາຊົນແຂວງ ກ່ຽວກັບແຜນພັດທະນາເສດຖະກິດ-ສັງຄົມ, ແຜນງົບປະມານ, ວຽກງານກວດສອບ, ວຽກງານອົງການໄອຍະການ, ສານປະຊາຊົນ ແລະ ບັນດາໂຄງການລົງທຶນຂອງລັດ ປະຈໍາປີ 2022 ຂອງແຂວງ. ນອກຈາກວຽກງານຫຼັກແລ້ວ ຍັງໄດ້ເຄື່ອນໄຫວວຽກງານປິ່ນອ້ອມຢ່າງແຂງແຮງ, ທັງໄດ້ເຄື່ອນໄຫວເຜີຍແຜ່ຜົນສຳເລັດກອງປະຊຸມສະໄໝສາມັນ ຕິດພັນກັບຢ້ຽມຢາມພົບປະປະຊາຊົນ ຜູ້ມີສິດເລືອກຕັ້ງ ສາມາດປະຕິບັດໄດ້ 68 ຈຸດ ເທົ່າກັບ 76%, ມີຜູ້ເຂົ້າຮ່ວມເກືອບ 11 ພັນເທື່ອຄົນ ຄຽງຄູ່ກັນນັ້ນ, ກໍໄດ້ຮັບຟັງຄໍາສະເໜີ, ຄວາມຂັດຂ້ອງໝອງໃຈຕໍ່ວຽກງານອື່ນໆ, ຄຳຮ້ອງຂໍຄວາມເປັນທໍາ ຂອງປະຊາຊົນ ເພື່ອເກັບກຳຂໍ້ມູນ, ລາຍງານ ແລະ ປະສານສົມທົບກັບການຈັດຕັ້ງພາກສ່ວນທີ່ກ່ຽວຂ້ອງ ຕິດຕາມກວດກາ ແລະ ປະເມີນສະພາບຄວາມເປັນຈິງ ເພື່ອແກ້ໄຂບັນຫາຕ່າງໆ ໃຫ້ຊັດເຈນ ແລະ ຖືກຕ້ອງຕາມກົດໝາຍ.

ບັນດາຜູ້ເຂົ້າຮ່ວມກອງປະຊຸມຄັ້ງນີ້ຍັງໄດ້ປະກອບຄຳຄິດເຫັນ, ແລກປ່ຽນຕໍ່ກັບການເຄື່ອນໄຫວ, ການຈັດຕັ້ງປະຕິບັດວຽກງານຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 14 ແຂວງສາລະວັນ ເພື່ອສ່ອງແສງເຖິງຄວາມເປັນຈິງ ທີ່ໄດ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່, ທັງເປັນການຕີລາຄາບັນດາຈຸດດີ, ດ້ານຕັ້ງໜ້າ, ຂໍ້ຄົງຄ້າງ ທີ່ຈະສະເໜີໃຫ້ມີການຄົ້ນຄວ້າ, ປັບປຸງ ແລະ ຊອກວິທີທາງແກ້ໄຂ ທີ່ຈະເຮັດໃຫ້ວຽກງານດັ່ງກ່າວ ນັບມື້ມີປະສິດທິຜົນ, ຮັບປະກັນການຈັດຕັ້ງປະຕິບັດວຽກງານໃນປີ 2023 ບັນລຸຕາມຄາດໝາຍທີ່ວາງໄວ້.

ຂ່າວ-ພາບ: ວິໄລວອນ ສິດທິໄຊ