ໃນໂອກາດມີຄໍາເຫັນໂອ້ລົມຕໍ່ກອງປະຊຸມຕິດຕາມ, ຊຸກຍູ້ຜັນຂະຫຍາຍ ແລະ ຈັດຕັ້ງປະຕິບັດ 15 ຄາດໝາຍຂອງຂະແໜງການສຶກສາ ແລະ ກິລາ ຈັດຂຶ້ນເມື່ອບໍ່ດົນມານີ້ທີ່ສະໂມສອນເມືອງກະລຶມ, ທ່ານ ຄຳສອນ ກອນເຢີ ຮອງເຈົ້າແຂວງເຊກອງ ໄດ້ເນັ້ນໃຫ້ຄະນະພັກ-ຜູ້ບໍລິຫານການສຶກສາທຸກຂັ້ນໃນທົ່ວເມືອງກະລຶມ ສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານ, ຄູ-ອາຈານໃຫ້ມີຄຸນທາດການເມືອງໜັກແໜ້ນ, ຄຸນສົມບັດສິນທໍາປະຕິວັດ, ເຮັດໜ້າທີ່ໃນການສິດສອນ ແລະ ກາຍເປັນແບບຢ່າງທີ່ດີໃຫ້ແກ່ນັກຮຽນ; ປະສານສົມທົບກັບຂະແໜງການກ່ຽວຂ້ອງແກ້ໄຂບັນຫາການປະລະການຮຽນ, ອັດຕາການຄ້າງຫ້ອງ ແລະ ປະກົດການຫຍໍ້ທໍ້ຕ່າງໆໃນຂະແໜງການສຶກສາ ແລະ ກິລາ.

ທ່ານຍັງກ່າວເນັ້ນໜັກຕື່ມ ໂດຍໃຫ້ອົງການຈັດຕັ້ງພັກ-ລັດ ແລະ ເອກະຊົນ ກໍຄືຄະນະພັກ-ອົງການປົກຄອງບ້ານ, ຄະນະພັດທະນາການສຶກສາຂັ້ນບ້ານ ຕະຫຼອດຮອດປະຊາຊົນບັນດາເຜົ່າ ຕ້ອງເປັນເຈົ້າການໃຫ້ການຮ່ວມມື, ສະໜັບສະໜູນ ແລະ ສ້າງເງື່ອນໄຂອໍານວຍຄວາມສະດວກປະກອບສ່ວນພັດທະນາຂະແໜງການສຶກສາ; ສືບຕໍ່ສ້າງ ແລະ ບໍາລຸງຄູ, ປະຕິບັດນະໂຍບາຍສົ່ງເສີມຜູ້ຮຽນເກັ່ງ, ມີພອນສະຫວັນ ແລະ ມັກອາຊີບຄູໄປຮຽນຄູ, ເອົາໃຈໃສ່ພິເສດຕໍ່ການປັບປຸງການຮຽນ-ການສອນຂອງຄູໃຫ້ມີຄຸນນະພາບ; ນໍາໃຊ້ຫຼັກສູດແຫ່ງຊາດ ແລະ ເສີມຂະຫຍາຍຫຼັກສູດທ້ອງຖິ່ນເຂົ້າໃນການຮຽນ-ການສອນ ໃຫ້ເກີດຜົນປະໂຫຍດສູງສຸດ ໂດຍເນັ້ນສະມັດຖະພາບດ້ານການຮຽນຂອງນັກຮຽນ, ພິເສດຈະໄດ້ເອົາໃຈໃສ່ການຮຽນ-ການສອນວິຊາຄຸນສົມບັດ, ວິຊາການເມືອງ ແລະ ແນະນໍາວິຊາຊີບ; ເອົາໃຈໃສ່ເລືອກເຟັ້ນ-ສົ່ງເສີມໃຫ້ໄດ້ຜູ້ຮຽນເກັ່ງມີພອນສະຫວັນໄດ້ເຂົ້າຮຽນລະດັບສູງຢູ່ພາຍໃນ ແລະ ຕ່າງປະເທດ; ເອົາໃຈໃສ່ປັບປຸງ ແລະ ແກ້ໄຂໂຄງລ່າງການສຶກສານັບທັງສິ່ງເອື້ອອໍານວຍ ແລະອຸປະກອນຮັບໃຊ້ການຮຽນ-ການສອນໃຫ້ພຽງພໍ.ປັບປຸງລະບົບການຄຸ້ມຄອງບໍລິຫານການສຶກສາໃຫ້ມີຄວາມສອດຄ່ອງເຂັ້ມແຂງ ແລະ ໜັກແໜ້ນ, ບໍາລຸງຍົກລະດັບທາງດ້ານທິດສະດີການເມືອງ, ການບໍລິຫານການສຶກສາໃຫ້ຜູ້ບໍລິຫານການສຶກສາ, ພະນັກງານ, ຄູ-ອາຈານ ປະສານສົມທົບກັບຄະນະພັກ, ອົງການປົກຄອງທ້ອງຖິ່ນ ແລະຄະນະພັດທະນາການສຶກສາທຸກຂັ້ນ; ສູ້ຊົນຈັດຕັ້ງການຮຽນ-ການສອນຊັ້ນມັດທະຍົມຕອນປາຍບຳລຸງໃຫ້ແກ່ປະຊາຊົນໃນເກນອາຍຸ 15-30 ປີໃຫ້ສໍາເລັດ ແລະ ສ້າງເງື່ອນໄຂປະກາດເມືອງຈົບມັດທະຍົມຕອນປາຍໃນປີ 2024 ແລະ ສຸມໃສ່ປະຕິບັດ 15 ຄາດໝາຍໃຫ້ບັນລຸໄດ້ຕາມແຜນການທີ່ວາງໄວ້.

ຂ່າວ-ພາບ: ຄໍາເພົ້າ