ໂຮງຮຽນສາມັນກິນນອນຊົນເຜົ່າອຸດົມໄຊ ແຂວງອຸດົມໄຊ ໄດ້ຈັດງານກິລາ, ສິລະປະ-ວັນນະຄະດີປະຈຳສົກຮຽນ 2023-2024 ຂຶ້ນເມື່ອບໍ່ດົນມານີ້, ໂດຍການເຂົ້າຮ່ວມຂອງທ່ານບຸນຄົງຫຼ້າຈຽມພອນ ເຈົ້າແຂວງອຸດົມໄຊ, ມີຄະນະພັກແຂວງ, ຫົວໜ້າພະແນກ, ຄູ-ອາຈານ, ນັກຮຽນເຂົ້າຮ່ວມ.

ທ່ານສົມຈັນ ພົນທະສິດ ອຳນວຍການໂຮງຮຽນສາມັນກິນນອນຊົນເຜົ່າ ໄດ້ຂຶ້ນລາຍງານການເຄື່ອນໄຫວວຽກງານກິລາ, ສິລະປະ-ວັນນະຄະດີສົກຮຽນ 2021-2022ແລະ ຄາດໝາຍສູ້ຊົນສົກຮຽນ 2023-2024 ຊຶ່ງການແຂ່ງຂັນກິລາລະຫວ່າງຫ້ອງຕໍ່ຫ້ອງປະຈຳສົກຮຽນ 2023-2024 ໄດ້ເລີ່ມແຕ່ກາງເດືອນຕຸລາ ປີ2023 ເຖິງທ້າຍເດືອນມີນາ ປີ 2024 ຊຶ່ງຈັດຂຶ້ນໃນທຸກໆຕອນແລງຂອງວັນອັງຄານ ແລະ ວັນພະຫັດມີກິລາບານເຕະຊາຍ-ຍິງ, ບານຕີຊາຍ-ຍິງ, ກະຕໍ້ຍິງ-ຊາຍ, ເປຕັງຍິງ-ຊາຍ, ປິງປ໋ອງຍິງ-ຊາຍ ແລະ ກິລາໝາກເສີກຍິງ-ຊາຍ, ນອກນີ້ຍັງມີວຽກງານການແຂ່ງຂັນສິລະປະ-ວັນນະຄະດີຕື່ມອີກ, ການຈັດງານຄັ້ງນີ້ ເພື່ອສ້າງໃຫ້ນັກຮຽນມີສຸຂະພາບແຂງແຮງດີ, ມີການພັດທະນາທາງດ້ານຮ່າງກາຍ,ຈິດໃຈ, ອາລົມ, ສັງຄົມ ແລະ ສະຕິປັນຍາທີ່ດີ ເພື່ອພັດທະນາໃຫ້ນັກຮຽນມີພອນສະຫວັນໃນການຫຼິ້ນກິລາ, ການສະແດງສິລະປະ-ວັນນະຄະດີຄຽງຄູ່ກັບການປົກປັກຮັກສາວັນນະຄະດີພື້ນເມືອງຂອງແຕ່ລະເຜົ່າໃຫ້ໝັ້ນຄົງຕະຫຼອດໄປ.

ໂອກາດນີ້, ທ່ານ ບຸນຄົງ ຫຼ້າຈຽມພອນ ໄດ້ໂອ້ລົມເນັ້ນໃຫ້ນັກຮຽນທຸກຄົນເອົາໃຈໃສ່ເຂົ້າໃນການຄົ້ນຄວ້າຮ່ຳຮຽນ ແລະ ຮຽນຮູ້ວິຊາຕ່າງໆ.ຈາກນັ້ນໄດ້ມອບເຂົ້າສານຈຳນວນ 2 ໂຕນໃຫ້ແກ່ໂຮງຮຽນດັ່ງກ່າວຕື່ມອີກ.

ຂ່າວ-ພາບ: ແສງອາທິດ