ຫ້ອງການຄຸ້ມຄອງນັກສຶກສາ ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີເປີດ-ປິດງານແຂ່ງຂັນກິລານັກສຶກສາທົ່ວ ມ.ຊ ຄັ້ງທີ 13 ປະຈໍາສົກສຶກສາ 2022-2023 ຂຶ້ນໃນວັນທີ 17 ກຸມພາ ຜ່ານມາທີ່ເດີ່ນກິລາກາງ ມ.ຊ ໂດຍການເຂົ້າຮ່ວມຂອງ ທ່ານ ອຸດົມ ພອນຄໍາເພັງ ອະທິການບໍດີ ມ.ຊ,ທ່ານ ໂພສີ ທິບດາວັນ ຮອງອະທິການບໍດີ ມ.ຊ ທັງເປັນປະທານຈັດການແຂ່ງຂັນ,ມີຫົວໜ້າຫ້ອງການຄຸ້ມຄອງນັກສຶກສາ ແລະບັນດາຄະນະບໍດີ, ຫົວໜ້າຫ້ອງການ, ຕາງໜ້າບໍລິສັດ, ທະນາຄານ, ຫ້າງຮ້ານ ທີ່ໃຫ້ການສະໜັບສະໜູນງານກິລາ, ແຂກຖືກເຊີນ, ພ້ອມດ້ວຍພະນັກງານ, ຄູ-ອາຈານ ແລະນັກສຶກສາຈາກຄະນະວິຊາ ແລະສະຖາບັນ ມ.ຊເຂົ້າຮ່ວມຢ່າງເປັນຂະບວນການຟົດຟື້ນ.

ທ່ານ ສະຫວັນ ເງິນງາມ ຮອງຫົວໜ້າຫ້ອງການຄຸ້ມຄອງນັກສຶກສາ ທັງເປັນຮອງປະທານຈັດການແຂ່ງຂັນໄດ້ຂຶ້ນຜ່ານບົດສະຫຼຸບການຈັດການແຂ່ງຂັນກິລານັກສຶກສາທົ່ວ ມ.ຊ ຄັ້ງທີ 13 ປະຈໍາສົກສຶກສາ 2022-2023 ນີ້,ມີຈຸດປະສົງເພື່ອຈັດຕັ້ງການເຄື່ອນໄຫວ ແລະແຂ່ງຂັນກິລາປະເພດຕ່າງໆ ໃຫ້ເປັນຂະບວນຟົດຟື້ນທົ່ງ ມ.ຊ, ເປັນການສ້າງເງື່ອນໄຂສົ່ງເສີມໃຫ້ນັກສຶກສານໍາໃຊ້ເວລາວ່າງມາຝຶກແອບ ແລະພັດທະນາຕົນເອງທາງດ້ານປະເພດກິລາໃດໜຶ່ງ ໃນລະດັບສາຍສູງ ແລະສ້າງຊື່ສຽງໃຫ້ກັບຕົນເອງ ກໍຄື ມ.ຊ ແລະປະເທດຊາດ, ເປັນການສ້າງໂອກາດໃຫ້ພະນັກງານ,ຄູ-ອາຈານ ແລະນັກສຶກສາຄະນະວິຊາ ແລະສະຖາບັນຕ່າງໆ ໄດ້ພົບປະກັນສ້າງຄວາມສາມັກຄີຊຶ່ງກັນ ແລະກັນ, ເປັນການຄັດເລືອກເອົານັກກິລາດີເດັ່ນປະເພດຕ່າງໆ ເຂົ້າເປັນນັກກິລາຂອງສະໂມສອນກິລາ ມ.ຊ, ເພື່ອພັດທະນາຂະບວນການກິລາຂອງ ມ.ຊໃຫ້ເຕີບໃຫຍ່ຂະຫຍາຍຕົວ ແລະໃຫ້ສາມາດເຂົ້າຮ່ວມແຂ່ງຂັນກິລາລະດັບຊາດ ກໍຄືພາກພື້ນ ແລະສາກົນໃຫ້ນັບມື້ນັບຫຼາຍຂຶ້ນ.

ການຈັດການແຂ່ງຂັນຄັ້ງນີ້ ແມ່ນໄດ້ເລີ່ມແຂ່ງຂັນມາແຕ່ວັນທີ 11 ມັງກອນ 2023 ຫາ 17 ກຸມພາ 2023 ຊຶ່ງມີ 13 ຄະນະວິຊາ ແລະ 1 ສະຖາບັນເຂົ້າຮ່ວມການແຂ່ງຂັນ, ມີຄະນະຄູຝຶກ ແລະນັກກິລາເຂົ້າຮ່ວມທັງໝົດຈໍານວນ 1.534 ຄົນ ຍິງ 427 ຄົນ. ການຈັດການແຂ່ງຂັນກິລາລວມມີ 6 ປະເພດກິລາຄື 1. ກິລາ ບານເຕະ ຍິງ-ຊາຍ, 2. ກິລາ ຟຸດຊໍ ຊາຍ, 3. ກິລາ ບານສົ່ງໃນຮົ່ມ ຍິງ-ຊາຍ, 4. ກິລາ ກະຕໍ້ຫວາຍ ຍິງ-ຊາຍ, 5. ກິລາເປຕັງ ທີມຍິງ-ທີມຊາຍ ແລະທີມປະສົມ ແລະ 6. ກິລາແລ່ນ. ສໍາລັບການຈັດລໍາດັບການແຂ່ງຂັນ ທີ 1 ໄດ້ແກ່ຄະນະວິທະຍາສາດການກິລາ-ກາຍະກໍາ, 2 ຄະນະສຶກສາສາດ, 3 ຄະນະກະເສດສາດ.

ໃນພິທີໄດ້ຮັບຊົມການຍ່າງເດີ່ນຂະບວນກ້ອນກໍາລັງຂອງນັກກິລາ, ຮັບຊົມການສະແດງສິລະປະເປັນຕົ້ນແມ່ນການຮ້ອງເພງລວມໝູ່, ການສະແດງມວຍລາຍລາວ ແລະການສະແດງບົດຟ້ອນ ນອກຈາກນັ້ນຍັງໄດ້ຮັບຊົມການແຂ່ງຂັນບານເຕະຊາຍ ຄູ່ຊີງຊະນະເລີດລະຫວ່າງ ນັກກິລາຄະນະວິທະຍາສາດການກິລາ-ກາຍະກໍາ ແລະນັກກິລາຄະນະວິສະວະກໍາສາດ ຊຶ່ງບັນຍາກາດຂອງງານແມ່ນເຕັມໄປດ້ວຍຄວາມຄຶກຄື້ນມ່ວນຊື່ນທ່າມກາງສຽງຂອງກອງເຊຍແຕ່ລະພາກສ່ວນທີ່ເຂົ້າຊົມເຕັມຂອບສະໜາມທີ່ເຕັມໄປດ້ວຍຄວາມເບີກບານມ່ວນຊື່ນຕະຫຼອດການແຂ່ງຂັນ ແລະຕອນທ້າຍພິທີໄດ້ມີການມອບລາງວັນໃຫ້ນັກກິລາບານເຕະຊາຍ ໂດຍການມອບຂອງທ່ານ ອຸດົມ ພອນຄໍາເພັງ ອະທິການບໍດີ ມ.ຊ.

ຂ່າວ: ພູວັນ ນ້ອຍສິນນາລັກ