ຄະນະກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ ແຂວງບໍລິຄໍາໄຊ ນໍາໂດຍທ່ານ ທອງສະຫວັນ ວົງສຳພັນ ຮອງເລຂາພັກແຂວງ ຜູ້ຊີ້ນຳວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງຂັ້ນແຂວງ ໄດ້ເຄື່ອນໄຫວຢ້ຽມຢາມຈຸດສຸມຜາເຈົ້າ ເມືອງກາສີ ແຂວງວຽງຈັນ ເມື່ອບໍ່ດົນມານີ້.

ຄະນະຮັບຜິດຊອບກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ແລະ ວຽກງານ 3 ສ້າງປະຈຳເຂດຈຸດສູມຜາເຈົ້າເມືອງກາສີ ໄດ້ລາຍງານ ໃຫ້ຮູ້ວ່າ: ຈຸດສຸມພັດທະນາຜາເຈົ້າປະກອບມີ 7 ບ້ານ,ມີ 883 ຫຼັງຄາເຮືອນ, 1.032 ຄອບຄົວ,ມີພົນລະເມືອງທັງໝົດ 5.263 ຄົນ,ມີ 3 ຊົນເຜົ່າຄື:ເຜົ່າກຶມມຸກວມ 57,29%,ເຜົ່າມົ້ງ 37,96% ແລະ ເຜົ່າລາວລຸ່ມ 04,75%,ປະຊາຊົນສ່ວນໃຫຍ່ຢຶດຖືອາຊີບປູກຝັງ-ລ້ຽງສັດເປັນຕົ້ນຕໍ,ຈຸດພິເສດເຂດຈຸດສຸມພັດທະນາຜາເຈົ້າ 95% ເປັນເຂດພູ ແລະ ພູສູງ,ມີໂຮງຮຽນ 8ແຫ່ງ,ໃນນັ້ນໂຮງຮຽນຊັ້ນປະຖົມ 7 ແຫ່ງ,ມັດທະຍົມຕອນຕົ້ນ 1ແຫ່ງ,ອັດຕາເຂົ້າຮຽນໃນເກນອາຍຸປະຕິບັດໄດ້ 97%,ມີໂຮງໝໍນ້ອຍ 1ແຫ່ງ, ສໍາເລັດການປະກາດຮັບຮອງບ້ານສາທາລະນະສຸກ,ບ້ານວັດທະນາທໍາ,ບ້ານແມ່ຍິງ 3 ດີ ແລະ ບ້ານຊາວໜຸ່ມ 4 ບຸກໄດ້ 7 ບ້ານ, ບ້ານທຸກຍາກບໍ່ມີ,ຄອບຄົວທຸກຍາກຍັງເຫຼືອ 19 ຄອບຄົວ.

ນອກນັ້ນ, ຄະນະຮັບຜິດຊອບກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງເຂດຈຸດສູມຜາເຈົ້າ ຍັງໄດ້ຊີ້ແຈງບາງວຽກງານຈາກຄຳສະເໜີແລກປ່ຽນຈາກຄະນະກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງແຂວງ ບໍລິຄຳໄຊ ເປັນຕົ້ນແມ່ນບາດກ້າວ,ຂັ້ນຕອນວຽກງານການສຶກສາອົບຮົມການເມືອງ-ແນວຄິດ,ການປັບປຸງລະບົບການເມືອງຂັ້ນຮາກຖານບ້ານ,ການແກ້ໄຂຄອບຄົວທີ່ຍັງທຸກຍາກທີ່ຍັງເຫຼືອ,ການຊຸກຍູ້,ສົ່ງເສີມການຜະລິດກະສິກຳເປັນສິນຄ້າ,ອຸດສະຫະກຳທີ່ສ້າງຖານລາຍຮັບໃຫ້ປະຊາຊົນໃຫ້ມີຄວາມໝັ້ນຄົງ, ທັ້ງນີ້ກໍເພື່ອຈະໄດ້ນຳເອົາບົດຮຽນໄປຈັດຕັ້ງປະຕິບັດຢູ່ທ້ອງຖິ່ນຂອງຕົນ.

ຈາກນັ້ນ, ໃນເວລາຕໍ່ມາຂອງວັນດຽວກັນຄະນະກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ແລະ ວຽກງານ 3 ສ້າງແຂວງ ບໍລິຄຳໄຊ ໄດ້ລົງເບິ່ງສວນປູກໝາກໂມລະດູແລ້ງຂອງບໍລິສັດ ວີເອັດ ຢູ່ເຂດບ້ານໂພນໝີ ມີເນື້ອທີ່200 ກວ່າເຮັກຕາ ຊຶ່ງເນື້ອທີ່ດັ່ງກ່າວແມ່ນເຊົ່າສໍາປະທານທີ່ດິນຂອງປະຊາຊົນ ໂດຍດິນນາ 5 ລ້ານກີບ,ດິນສວນ 2 ລ້ານກີບຕໍ່ເຮັກຕາ,ໄດ້ສ້າງວຽກເຮັດງານທຳໃຫ້ປະຊາຊົນທ້ອງຖິ່ນໂດຍກົງ,ສ້າງຄວາມຮູ້ທາງດ້ານເຕັກນິກວິຊາການ ແລະ ສ້າງລາຍຮັບໃຫ້ເມືອງ ແລະ ແຂວງຕື່ມອີກ. ນອກຈາກນີ້ ຍັງໄດ້ລົງເບິ່ງການປູກຜັກກະລໍ່າປີ ຂອງຊາວກະສິກອນບ້ານຜາຊ້າງ ກຸ່ມປູກຜັກກະລໍ່າປີບ້ານຜາຊ້າງ ເມືອງກາສີ ເນື້ອທີ່ 35 ເຮັກຕາ,ເລີ່ມລົງມືປູກຫຼັງເກັບກ່ຽວເຂົ້ານາປີຂອງທຸກໆປີ ສະເລ່ຍສະມັດຖະພາບ 40 ໂຕນຕໍ່ເຮັກຕາ ຊຶ່ງຄອບຄົວທີ່ປູກໜ້ອຍສຸດ 2 ໄລ່,ຫຼາຍສຸດບໍ່ເກີນ 5 ໄລ່,ການຈຳໜ່າຍແມ່ນແມ່ຄ້າມາເກັບຊື້ຢູ່ສວນ, ສ່ວນລາຄາແມ່ນຂຶ້ນກັບທ້ອງຕະຫຼາດແຕ່ລະໄລຍະຂອງແຕ່ລະປີ, ສັງລວມແລ້ວການປູກກະລໍ່າປີຂອງຊາວກະສິກອນກຸ່ມບ້ານຜາຊ້າງ ມີລາຍຮັບທີ່ແນ່ນອນ.

ຂ່າວ-ພາບ: ສາຍສະໝອນ