ເມືອງຄອບ ແຂວງໄຊຍະບູລີ ໄດ້ຈັດພິທີສອບເສັງນັກຮຽນເກັ່ງຂັ້ນເມືອງ ປະຈໍາສົກຮຽນ 2022-2023 ຂຶ້ນໃນວັນທີ 21 ກຸມພາຜ່ານມາທີ່ຫ້ອງການສຶກສາທິການ ແລະ ກິລາເມືອງ, ໂດຍການເປັນປະທານຂອງທ່ານ ສະໝັກ ລິດສະຖານ ຮອງເຈົ້າເມືອງໆຄອບ, ມີທ່ານ ຄໍາເລັກ ມາໄລວັນ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ມີຜູ້ອໍານວຍການໂຮງຮຽນ, ແຂກຖືກເຊີນ,ຄູ-ອາຈານ, ນັກຮຽນເຂົ້າຮ່ວມ.

ການສອບເສັງຄັ້ງນີ້, ມີນັກສອບເສັງເຂົ້າຮ່ວມທັງໝົດ 53 ຄົນຍິງ 32 ຄົນ, ມີພະສົງ 4 ອົງ; ໃນນັ້ນ ຊັ້ນປະຖົມສຶກສາ ປ.5 ມີ 21 ຄົນຍິງ 11 ຄົນ, ພະສົງ 1 ອົງ; ຊັ້ນມັດທະຍົມສຶກສາຕອນຕົ້ນ ມ.4 ມີ 16 ຄົນຍິງ 12 ຄົນ; ຊັ້ນມັດທະຍົມສຶກສາສົມບູນ ມ.7 ມີ 16 ຄົນຍິງ 9 ຄົນ ແລະ ພະສົງ 3 ອົງ. ວິຊາທີ່ນໍາມາສອບເສັງຂັ້ນ ປ.5 ມີ 3 ວິຊາຄື: ວິຊາພາສາລາວ, ວິຊາຄະນິດສາດ ແລະ ວິຊາໂລກອ້ອມຕົວ; ຂັ້ນ ມ.4 ແລະ ຂັ້ນ ມ.7 ມີ 4 ວິຊາຄື: ວິຊາຄະນິດສາດ, ວິຊາພາສາລາວ-ວັນນະຄະດີ, ວິຊາຟີຊິກສາດ ແລະ ວິຊາເຄມີສາດ.

ຜົນການສອບເສັງຊັ້ນປະຖົມ ປ.5 ອັນດັບທີ 1 ວິຊາຄະນິດສາດໄດ້ແກ່ນາງ ນິດາວັນ ໄຊຍະວົງ ມາຈາກໂຮງຮຽນປະຖົມສົມບູນບ້ານສະຖານ, ວິຊາພາສາລາວ ອັນດັບທີ 1 ໄດ້ແກ່ນາງ ນ້ອງຝ້າຍ ໄຊຍະວົງ ມາຈາກໂຮງຮຽນປະຖົມສົມບູນບ້ານສະຖານ, ວິຊາໂລກອ້ອມຕົວ ອັນດັບທີ 1 ໄດ້ແກ່ນາງ ສຸນີ ແສນສົມບັດ ມາຈາກໂຮງຮຽນປະຖົມສົມບູນບ້ານມ່ວງດອນມູນ; ຊັ້ນມັດທະຍົມຕອນຕົ້ນ ມ.4 ວິຊາຄະນິດສາດ ອັນດັບທີ 1 ໄດ້ແກ່ ທ້າວ ລອງ ພົມມະນີ ມາຈາກໂຮງຮຽນມັດທະຍົມຕອນຕົ້ນນໍ້າຄ່າ, ວິຊາພາສາລາວ-ວັນນະຄະດີ ອັນດັບທີ 1 ໄດ້ແກ່ນາງ ສີພັນ ອິນຕະພັນ ມາຈາກໂຮງຮຽນມັດທະຍົມສົມບູນປາງໄຮ, ວິຊາຟີຊິກສາດ ອັນດັບທີ 1 ໄດ້ແກ່ນາງ ບົວວັນ ແສນຄໍາລື ມາຈາກໂຮງຮຽນມັດທະຍົມສົມບູນປາງໄຮ, ວິຊາເຄມີສາດ ອັນດັບທີ 1 ໄດ້ແກ່ນາງ ອັກສອນ ມານາທໍາ ມາຈາກໂຮງຮຽນມັດທະຍົມຕອນຕົ້ນນໍ້າຄ່າ ແລະ ຊັ້ນມັດທະຍົມສຶກສາສົມບູນ ມ.7 ວິຊາຄະນິດສາດ ອັນດັບທີ 1 ໄດ້ແກ່ນາງ ຕຸກຕາ ອະລິຍະຄໍາ ມາຈາກໂຮງຮຽນມັດທະຍົມສົມບູນດອນຕັນ, ວິຊາພາສາລາວ-ວັນນະຄະດີ ອັນດັບທີ 1 ໄດ້ແກ່ນາງ ຕັອດ ກອງແກ້ວ ມາຈາກໂຮງຮຽນມັດທະຍົມສົມບູນປາງໄຮ, ວິຊາຟີຊິກສາດ ອັນດັບທີ 1 ໄດ້ແກ່ນາງ ນາລິນ ກັນຍາ ມາຈາກໂຮງຮຽນມັດທະຍົມສົມບູນເມືອງຄອບ ແລະ ວິຊາເຄມີສາດ ອັນດັບທີ 1 ໄດ້ແກ່ ສ.ນ ນົບ ບໍ່ແສງ ມາຈາກໂຮງຮຽນມັດທະຍົມສົມບູນມ່ວງດອນມູນ.ໂອກາດນີ້, ທ່ານ ສະໝັກ ລິດສະຖານ ໄດ້ໃຫ້ກຽດມອບຂອງຂວັນລາງວັນໃຫ້ແກ່ນັກຮຽນເກັ່ງທີ່ສາມາດຍາດໄດ້ອັນທີ 1 ແລະ ຄູ-ອາຈານທີ່ມີຜົນງານສອນດີ-ຮຽນເກັ່ງນໍາອີກ.

ການສອບເສັງນັກຮຽນເກັ່ງຄັ້ງນີ້ເພື່ອສົ່ງເສີມຂະບວນການສອນດີ-ຮຽນເກັ່ງແນໃສ່ປັບປຸງຄຸນນະພາບການສຶກສາໃຫ້ດີຂຶ້ນ, ເຮັດໃຫ້ການສຶກສາຢູ່ພາຍໃນເມືອງຫຍັບເຂົ້າໃກ້ກັບລະດັບແຂວງ, ລະດັບຊາດ ແລະ ສາກົນເທື່ອລະກ້າວ, ສ້າງໂອກາດໃຫ້ນັກຮຽນໄດ້ສະແດງອອກທາງດ້ານພອນສະຫວັນ, ດ້ານຄວາມຮູ້-ຄວາມສາມາດ ແລະ ຫົວຄິດປະດິດສ້າງທີ່ໄດ້ຮຽນມາ,ເພື່ອຄັດເລືອກເອົານັກຮຽນເກັ່ງໃນແຕ່ລະຂັ້ນແຕ່ລະວິຊາເຂົ້າຮ່ວມການສອບເສັງນັກຮຽນເກັ່ງຢູ່ຂັ້ນແຂວງທີ່ຈະຈັດຂຶ້ນໃນມໍ່ໆນີ້.

ຂ່າວ: ພົມມະນີ ອິນສະຫວັນ