ໃນວັນທີ 21 ກຸມພາຜ່ານມາ ທີ່ສະໂມສອນເມືອງຫີນເຫີບແຂວງວຽງຈັນໄດ້ຈັດກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ປະຈຳສົກປີ 2022 ແລະ ທິດທາງແຜນການປະຈໍາປີ 2023 ໂດຍການເປັນປະທານຂອງທ່ານ ວອນ ວໍລະສານ ເຈົ້າເມືອງຫີນເຫີບ, ມີທ່ານນາງ ອ່ອນ ຈັນທະວົງ ຮັກສາການຫົວໜ້າສ່ວຍສາອາກອນປະຈໍາແຂວງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ແສງມະນີ ອຸໄທ ຫົວໜ້າຫ້ອງການໆເງິນເມືອງ ກ່າວວ່າ: ທົ່ວເມືອງມີພື້ນຖານວິສາຫະກິດທັງໝົດ 234 ພື້ນຖານ, ອອກໃບຕາດິນ 2.000 ຕອນ, ເມືອງຄຸ້ມຄອງ 63 ພື້ນຖານ, ແຜນງົບປະມານປີ 2022 2.467.100.000 ກີບ ປະຕິບັດຕົວຈິງໄດ້ 3.579.991.958 ກີບ ເທົ່າກັບ 145,11% ຂອງແຜນການປີປະຕິບັດລື່ນແຜນການ 1.112.891.958 ກີບ, ໃນນີ້ອາກອນປົກກະຕິ 1.967.100. ກີບ ເທົ່າກັບ 104,54%, ຄ່າທໍານຽມ 30.000.000 ກີບ ເທົ່າກັບ 110,45%, ຄ່າບໍລິການ (ວິຊາການ) 457.100.000 ກີບ ເທົ່າກັບ 106,23%, ພາສີທີ່ດິນ 600.000.000 ກີບ ເທົ່າກັບ 93,81% ແລະ ຊັບສິນແຫ່ງລັດ 500.000.000 ກີບ ເທົ່າກັບ 163,10% ກອງປະຊຸມຍັງໄດ້ຮັບຟັງການປະກອບຄຳຄິດຄຳເຫັນຈາກຄະນະພັກ, ຄະນະນໍາ, ຕາງໜ້າຂະແໜງການຂັ້ນແຂວງ, ຂະແໜງວິຊາການເມືອງ ແລະ ຮາກຖານບ້ານ ເພື່ອພ້ອມກັນສຸມໃສ່ປະຕິບັດແຜນງົບປະມານໃນປີ 2023ໃຫ້ບັນລຸຕາມຄາດໝາຍທີ່ວາງໄວ້.

ທ່ານ ວອນ ວໍລະສານ ໄດ້ໃຫ້ກຽດໂອ້ລົມ ໂດຍຮຽກຮ້ອງໃຫ້ຄະນະນຳຫ້ອງການໆເມືອງເອົາໃຈໃສ່ສຶກສາອົບຮົມການເມືອງ-ແນວຄິດ, ຍົກລະດັບຄວາມຮູ້-ຄວາມສາມາດໃຫ້ພະນັກງານ-ລັດຖະກອນຂອງຂະແໜງການເງິນທຸກຂັ້ນຢ່າງເລິກເຊິ່ງເປັນປົກກະຕິ, ປັບປຸງກົງຈັກການຈັດຕັ້ງສັບຊ້ອນຈັດວາງພະນັກງານ, ບຸກຄະລາກອນຄືນໃໝ່ໃຫ້ມີຄວາມເຂັ້ມແຂງຮອບດ້ານ, ເພີ່ມທະວີຄວາມຮັບຜິດຊອບໃຫ້ມີຈັນຍາບັນໃນການປະຕິບັດໜ້າທີ່ວຽກງານ, ການບໍລິການປະຊາຊົນໃນຖານະເປັນຜູ້ຄຸ້ມຄອງການເງິນ ແລະ ຊັບສິນຂອງລັດ, ແກ້ໄຂປະກົດການຫຍໍ້ທໍ້

ໃນຖັນແຖວພະນັກງານຢ່າງເຂັ້ມງວດ, ສ້າງລະບົບຕິດຕາມກວດກາການປະຕິບັດໜ້າທີ່ວິຊາສະເພາະຂອງພະນັກງານຢ່າງເປັນລະບົບຕໍ່ເນື່ອງ.

ຂ່າວ-ພາບ: ເມືອງຫີນເຫີບ