ໃນວັນທີ 27 ກຸມພາ ຜ່ານມາ, ພະແນກການເງິນແຂວງບໍ່ແກ້ວ ໄດ້ຈັດກອງປະຊຸມສະຫຼຸບວຽກງານແຜນການ-ການເງິນທົ່ວແຂວງປະຈຳປີ 2022 ແລະ ທິດທາງແຜນການປີ 2023 ຂຶ້ນທີ່ຫ້ອງປະຊຸມຂອງພະແນກ, ໂດຍການເປັນປະທານຂອງ ທ່ານ ເຄື່ອນເພັດ ວົງຈັນ ຮອງເຈົ້າແຂວງບໍ່ແກ້ວ, ມີຄະນະນຳ, ພະ ແນກການຂອງແຂວງ-ເມືອງເຂົ້າຮ່ວມ.

ທ່ານ ສົມຫວັງ ລໍວັນໄຊ ຫົວໜ້າພະແນກການເງິນແຂວງ ກ່າວວ່າ: ການຈັດຕັ້ງແຜນງົບປະມານແຫ່ງລັດໃນໄລຍະ 1 ປີຜ່ານມາດ້ານລາຍຮັບ: ສະພາປະຊາຊົນແຂວງໄດ້ຮັບຮອງໂຕເລກລາຍຮັບສູນກາງ ແລະ ທ້ອງຖິ່ນໃນເບື້ອງຕົ້ນຈຳນວນ 440,27 ຕື້ກີບ, ໂຕເລກແຜນການດັດແກ້ 6 ເດືອນທ້າຍປີ ຈຳນວນ 439,63 ຕື້ກີບ. ການຈັດຕັ້ງປະຕິບັດຮອດວັນທີ 30 ທັນວາ 2022 ລາຍຮັບສູນກາງ ແລະ ທ້ອງຖິ່ນແຜນ ການດັດແກ້ປີ 2022 ຈຳນວນ 439,63 ຕື້ກີບ, ປະຕິບັດໄດ້ 435,78 ຕື້ກີບ ເທົ່າກັບ 99,12% ຂອງແຜນ ການດັດແກ້, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 29,60% ເປັນຈໍານວນເງິນ 99,53 ຕື້ກີບ. ລາຍຮັບທ້ອງຖິ່ນແຜນການດັດແກ້ປີ 2022 ຈໍານວນ 144,46 ຕື້ກີບ, ປະຕິບັດໄດ້ຈຳນວນ 153,79 ຕື້ກີບ, ເທົ່າກັບ 106,46% ຂອງແຜນການດັດແກ້, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 12,14%, ເປັນຈຳນວນເງິນ 17,34 ຕື້ກີບ. ດ້ານລາຍຈ່າຍ: ສະພາປະຊາຊົນແຂວງ ຮັບຮອງໂຕເລກລາຍຈ່າຍທ້ອງຖິ່ນໃນເບື້ອງຕົ້ນຈຳນວນ 266,50 ຕື້ກີບ, ໂຕເລກແຜນດັດແກ້ 6 ເດືອນທ້າຍປີຈຳນວນ 301,29 ຕື້ກີບ. ການຈັດຕັ້ງປະຕິບັດລາຍຈ່າຍຮອດວັນທີ 30 ທັນວາ 2022 ຕາມແຜນການດັດແກ້ປີ 2022 ຈໍານວນ 301,29 ຕື້ກີບ, ປະຕິບັດໄດ້ 298,53 ຕື້ກີບ ເທົ່າກັບ 99,09% ຂອງແຜນການດັດແກ້, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 4,06%; ເປັນຈຳນວນເງິນ 13,05 ຕື້ກີບ. ລາຍຈ່າຍອະນຸມັດຢູ່ສູນກາງບ້ວງເງິນ ເດືອນຈຳນວນ 5,60 ຕື້ກີບ, ເງິນອຸດໜູນນະໂຍບາຍຈໍານວນ 3,30 ຕື້ກີບ. ແຜນລາຍຈ່າຍລົງທຶນຂອງລັດປີ 2022 ຈໍານວນ 26,66 ຕື້ກີບ, ປະຕິບັດໄດ້ຈໍານວນ 26,66 ຕື້ກີບ, ເທົ່າກັບ 100% ຂອງແຜນການປີ. ໂຕເລກລາຍຈ່າຍຄ້າງອະນຸມັດປີ 2022 ຈໍານວນ 2,75 ຕື້ກີບ. ທາງກະຊວງການເງິນໄດ້ຫັກເຂົ້າຄັງສະສົມຂອງລັດຖະບານຢູ່ສູນກາງ.

ສຳລັບທິດທາງແຜນການປີ 2023 ຄາດຄະເນດ້ານການຈັດເກັບລາຍຮັບລວມທັງສູນກາງ ແລະ ທ້ອງຖິ່ນຈຳນວນ 466,43 ຕື້ກີບ, ທຽບໃສ່ແຜນຂອງປີຜ່ານມາເພີ່ມຂຶ້ນ 6% (ເປັນເງິນ 26,80 ຕື້ກີບ), ຄາດຄະເນດ້ານລາຍຈ່າຍງົບປະມານແຫ່ງລັດປີ 2023 ຈຳນວນ 291,11 ຕື້ກີບ (ໃນນີ້ບໍ່ລວມລາຍຈ່າຍການລົງທຶນຂອງລັດ). ພ້ອມນັ້ນຍັງໄດ້ຜ່ານບົດແນະນຳຂອງທ່ານເຈົ້າແຂວງ ສະບັບເລກທີ 198/ຈຂ.ບກ ວ່າດ້ວຍການຈັດຕັ້ງປະຕິບັດແຜນງົບປະມານຂອງແຂວງປະຈຳປີ 2023.

ໂອກາດດຽວກັນນີ້ຜູ້ເຂົ້າຮ່ວມກອງປະຊຸມໄດ້ປະກອບຄຳຄິດເຫັນຢ່າງກົງໄປກົງມາເພື່ອຄວາມເປັນເອກະພາບໃນການຈັດຕັ້ງປະຕິບັດໃນຕໍ່ໜ້າ.

ຂ່າວ-ພາບ: ສອນໄຊ