ໂດຍ: ສຳນານ ພົມພັກດີ

​ຄອບ​ຄົວ​ຂອງ ປ້າ ບົວລຳ ທຳມະວົງສາ ປະຊາຊົນ ບ້ານຖິ່ນເພຍ ເມືອງຫາດຊາຍຟອງ ນະຄອນຫຼວງວຽງຈັນ ໄດ້​ຢຶດ​ຖື​ອາ​ຊີບ​ປູກ​ຜັກ​ຂາຍ ຊຶ່ງເປັນ​ຜູ້ສືບ​ທອດອາຊີບ​ດັ່ງ​ກ່າວ​ມາ​ຈາກພໍ່ ແລະ ແມ່ໃນການປູກຝັງ ແລະ ລ້ຽງສັດໃນເມື່ອກ່ອນເຮັດໃຫ້ຄອບຄົວຂອງ ປ້າ ບົວລຳ ທຳມະວົງ​ສາ ມີຢູ່ມີກິນຢ່າງອີ່ມໜຳສຳລານ ​ພ້ອມ​ທັງສົ່ງເສີມລູກ 2 ຄົນຈົນຮຽນຈົບຊັ້ນປະລິນຍາຕີ.

ປ້າ ບົວລຳ ທຳມະວົງສາ ໃຫ້ຮູ້ວ່າ: ໃນການເຮັດອາຊີບປູກຜັກຂາຍໃນປັດຈຸບັນໂດຍຕົນເອງໄດ້ສືບຕໍ່ຈາກພໍ່ ແລະ ແມ່ ທີ່ເຮັດຄ້າຂາຍ, ປູກຝັງ ແລະ ລ້ຽງສັດ ເປັນອາຊີບຜ່ານມາ ຊຶ່ງຕົນເອງເຫັນວ່າໃນການຢຶດຖືອາຊີບດັ່ງ​ກ່າວນີ້ເຮັດໃຫ້ຊີວິດການເປັນຢູ່ນັບມື້ດີຂຶ້ນຕົົນເອງຈຶ່ງໄດ້ສືບຕໍ່ນຳເອົາບົດຮຽນ ແລະ ປະສົບການທີ່ເຄີຍເຮັດມາກັບພໍ່ແມ່ ມາປະຕິບັດຈົນເຖິງປັດຈຸບັນ.

ປ້າ ບົວລຳ ທຳມະວົງສາ ໃຫ້ຮູ້ຕື່ມວ່າ: ຜ່ານມາໄດ້ລົງມື ປູກຫອມລາບ, ໝາກເຫຼັ່ນ, ຜັກບົ້ງ, ຜັກຫົມ ແລະ ພືດຜັກ ອື່ນໆແບບໜູນວຽນ ເພື່ອສ້າງລາຍຮັບໃຫ້ແກ່ກັບຄອບຄົວ ໂດຍປູກໃນເນື້ອທີ່ີ ຈຳນວນ 3 ໄລ່, ພາຍຫຼັງທີ່ໄດ້ລົງມືປູກມາແຕ່ເດືອນຜ່ານມາ, ມາຮອດປັດຈຸບັນແມ່ນກຳລັງເກັບຫອມລາບອອກຂາຍໃຫ້ແກ່ແມ່ຄ້າທີ່ມາເກັບຊື້ກັບທີ່ ສ່ວນລາຄາຂາຍຫອມລາບໃນໄລຍະ​ນີ້ແມ່ນ 60 ພັບກີບຕໍ່ໝື່ນ, ຖືວ່າໄລຍະນີ້ຫອມລາບແມ່ນຈະມີລາຖືກລົງ, ສຳລັບຜັກຫອມລາບໄດ້ເລີ່ມເກັບຂາຍມາແຕ່ເດືອນ 6 /2022, ຖ້າຫາກມີການບົວລະບັດໃນການຫົດນໍ້າ, ໃສ່ຝຸ່ນໄດ້ດີ ແມ່ນສາມາດເກັບຂາຍໄດ້ເດືອນລະເທື່ອ ໃນນັ້ນຖ້າຫາກຕົ້ນຫອມລາບບໍ່ຕາຍແມ່ນຢູ່ໄດ້ປະມານ 2-3 ປີ. ໃນຂະ​ນະ​ທີ່ລາຄາຜັກຫົມແມ່ນ 80.000-100.000 ກີບຕໍ່ໝື່ນ ຖືວ່າໄດ້ລາຄາດີ, ແຕ່ກ້າວເຂົ້າເດືຶອນ 2-3 ລາຄາ ຜັກຫົມຈະ​ເລີ່ມ​ຖືກ​ລົງ.

ປັດຈຸບັນ ປ້າ ບົວລຳ ທຳມະວົງສາ ພ້ອມຄອບຄົວແມ່ນກຳລັງສຸມໃສ່ໃນການຄາດ ແລະ ໄຖ ເພື່ອກະກຽມລົງມືປູກຜັກຫົມ, ຜັກຫອມປ້ອມ, ຜັກສະລັດ, ຜັກບົ້ງ ເພື່ອໃຫ້ທ່ວງທັນກັບການເກັບຜົນ​ຜະ​ລິດອອກຂາຍໃນເດືອນ 5, ສຳລັບການຂາຍແມ່ນບໍ່ມີຄວາມຫຍຸ້ງຍາກ ເພາະຈະມີແມ່ຄ້າມາຊື້ກັບທີ່ເລີຍ ແຕ່ໃນການຂາຍແມ່ນອີງຕາມລາຄາຕາມ​ທ້ອງຕະຫຼາດ, ປ້າ ບົວຄຳ ໃຫ້ຮູ້ຕື່ມວ່າ: ຖ້າທຽບໃສ່ໃນໄລຍະມີການລະບາດຂອງພະຍາດໂຄວິດ-19 ຜ່ານມາ ກັບປັດຈຸບັນ ໃນການເຮັດອາຊີບປູກຜັກຂາຍແມ່ນມີຄວາມສະດວກດີຂຶ້ນກວ່າເກົ່າ ໂດຍສະເພາະເມື່ອຮອດເວລາເກັບຜົນລະປູກອອກຂາຍກໍຈະມີແມ່ຄ້າຈຳນວນຫຼາຍມາເກັບຊື້ຕາມລາຄາທ້ອງຕະຫຼາດ, ສ່ວນການເກັບຜົນຜະລິດອອກຂາຍຖ້າຜົນຜະລິດຢູ່ໃນໄລຍະລາຄາຖືກ ຄອບຄົວຈະເກັບຂາຍເອງ, ຖ້າ​ຫາກວ່າ​ເມື່ອ​ໃດຜົນຜະລິດມີລາຄາສູງ ແມ່ນໄດ້ຈ້າງແຮງງານທາງນອກມາຊ່ວຍ​ເກັບເພື່ອໃຫ້ທັນກັບຄວາມຕ້ອງການຂອງແມ່ຄ້າ, ສຳລັບໃນການຈ້າງແມ່ນຄິດໄລ່ເປັນໝື່ນຕາມລາຄາຂຶ້ນ ແລະ ລົງຂອງລາ​ຄາ​ຜັກ, ສະເລ່ຍລາຍຮັບທີ່ໄດ້ຈາກການຂາຍຜົນຜະລິດປະມານ 50 ລ້ານຕໍ່ປີ ຈາກລາຍໄດ້ທີ່ໄດ້ຮັບໃນແຕ່ລະປີ ປ້າ ບົວລຳ ທຳມະວົງສາ ມີຄວາມເພິ່ງພໍໃຈກັບອາຊີບດັ່ງກ່າວ ເພາະລາຍໄດ້ຈາກ​ການ​ຂາຍ​ຜັກໃນແຕ່ລະປີ ພຽງ​ພໍ​ກັບ​ການ​ໃຊ້​ຈ່າຍ​ຂອງ​ຄອບ​ຄົວ (ເນື່ອງ​ຈາກ​ຕ້ອງ​ໃຊ້​ຈ່າຍ​ປະ​ຢັດ) ພ້ອມ​ທັງສົ່ງເສີມລູກ 2 ຄົນຮຽນຈົນຈົບຊັ້ນປະລິນຍາຕີ, ອີກ​ທັງຍັງເຮັດໃຫ້ຄອບຄົວຂອງຕົນມີຄວາມຢູ່ດີກິນດີຢ່າງອີ່ມໜຳສຳລານ.

ຖືວ່າໃນການຢຶດຖືອາຊີບໃນການປູກຝັງ, ລ້ຽງສັດ ຂອງຄອບຄົບ ປ້າ ບົວລຳ ທຳມະວົງສາ ເປັນຕົວແບບໜຶ່ງທີ່ດີໃຫ້ແກ່ສັງຄົມ ເປັນອາຊີບທີ່ສຸດຈະລິດ ຊຶ່ງພັກ ແລະ ລັດ​ຖະ​ບານ​ກໍ​ໄດ້​ຊຸກ​ຍູ້ ສົ່ງ​ເສີມ​ໃຫ້​ປະ​ຊາ​ຊົນປູກຝັງ ແລະ ລ້ຽງສັດເປັນສິນຄ້າ, ນອກ​ຈາກ​ຈະ​ເປັນ​ການຫຼຸດ​ຜ່ອນ​ຄວາມ​ທຸກ​ຍາກ​ຂອງ​ປະ​ຊາ​ຊົນ​ແລ້ວ ຍັງ​ເປັນ​ການ​ສົ່ງ​ເສີມ​ການ​ຜະ​ລິດ​ພາຍ​ໃນ ຫຼຸດ​ຜ່ອນ​ການ​ນຳ​ເຂົ້າ​ອີກ​ດ້ວຍ.