ແຂວງໄຊຍະບູລີ ໄດ້ຈັດງານແຂ່ງຂັນກິລາຕີກັອບຊິີງຂັນຂອງທ່ານເຈົ້າແຂວງໄຊຍະບູລີ ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ ຄົບຮອບ 113 ປີ (8 ມີນາ 1910-8 ມີນາ 2023) ຊຶ່ງພິທີດັ່ງກ່າວ ໄດ້ຈັດຂຶ້ນໃນວັນທີ 8 ມີນາ ຜ່ານມານີ້ ທີ່ສະໜາມກັອບອ່າງນໍ້າຕຽນ. ໂດຍການເຂົ້າຮ່ວມຂອງ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ມີບັນດາການນໍາຂອງແຂວງ, ຂອງເມືອງ ພ້ອມດ້ວຍນັກກິລາຈາກພາກສ່ວນຕ່າງໆອ້ອມຂ້າງແຂວງເຂົ້າຮ່ວມ.

ໃນໂອກາດນີ້, ທ່ານ ຄໍາເພັດ ພົມມະລາດ ຫົວໜ້າພະແນກ ໂຍທາທິການ ແລະ ຂົນສົ່ງແຂວງ ໄດ້ໃຫ້ຮູ້ວ່າ: ການແຂ່ງຂັນກິລາຕີກັອບໃນຊຸດນີ້, ເພື່ອສະເຫຼີມສະຫຼອງວັນແມ່ຍິງສາກົນ ຄົບຮອບ 113 ປີ ໃຫ້ເຕັມໄປດ້ວຍຄວາມເບີກບານມ່ວນຊື່ນ ສ້າງໄດ້ຄວາມສາມັກຄີໄມຕີຈິດ ລະຫວ່າງການນໍາແຂວງ, ເມືອງ ແລະ ນັກກິລາດ້ວຍກັນ.

ການແຂ່ງຂັນໃນຄັ້ງນີ້, ມີນັກກິລາເຂົ້າຮ່ວມແຂ່ງຂັນທັງໝົດ 49 ທ່ານ ໄດ້ແບ່ງອອກເປັນ 4 ສາຍຄື: ສາຍ VIP ມີ 8 ທ່ານ, ສາຍ ກ ມີ 13 ທ່ານ, ສາຍ ຂ ມີ 7 ທ່ານ ແລະ ສາຍ ຄ ມີ 21 ທ່ານ. ຜົນການແຂ່ງຂັນສາຍ VIP ອັນດັບ 1 ແມ່ນທ່ານ ຫຸມແພງ ກອງຊັບ ມີ 10 ໂອເວີ, ທີ 2 ທ່ານ ຄໍາເພັດ ພົມມະລາດ ມີ 13 ໂອເວີ, ທີ 3 ທ່ານ ຄໍາແພງ ເພັດ ມີ 14 ໂອເວີ. ສາຍ ກ ອັນດັບ 1 ທ່ານ ນິກອນ ມີ 1 ໂອເວີ, ອັນດັບ 2 ທ່ານ ສົມບູນ ມີ 2 ໂອເວີ, ອັນດັບ 3 ທ່ານ ທະນູສິນ ມີ 3 ໂອເວີ. ສາຍ ຂ ອັນດັບ 1 ທ່ານ ວິໄຊພອນ ມີ 4 ໂອເວີ, ອັນດັບ 2 ທ່ານ ວິລະເດດ ມີ 5 ໂອເວີ, ອັນດັບ 3 ທ່ານ ບຸນເລີດ ມີ 8 ໂອເວີ. ສາຍ ຄ ອັນດັບ 1 ທ່ານ ແກ້ວວຽງສິດ ມີ 7 ໂອເວີ, ອັນດັບ 2 ທ່ານ ວິຈິດ ຂັນທະຈັກ ມີ 10 ໂອເວີ ແລະ ອັນດັບ 3 ທ່ານ ຄໍາຫຼ້າ ກອງຊັບ ມີ 14 ໂອເວີ. ໃຫ້ກຽດມອບຂັນລາງວັນແຕ່ລະສາຍ ໂດຍທ່ານ ເຈົ້າແຂວງໄຊຍະບູລີ ແລະ ທ່ານອື່ນໆຕາມລໍາດັບ.

ຂ່າວ-ພາບ: ບຸນທີ