ໂຮງຮຽນອະນຸບານ-ປະຖົມ-ມັດທະຍົມສຶກສາສົມບູນສະຖາພອນ ໄດ້ຈັດງານສັບປະດາວິທະຍາສາດໂຮງຮຽນ ຄັ້ງທີ III ຂຶ້ນໃນວັນທີ 7 ມີນາ ຜ່ານມານີ້ ທີ່ໂຮງຮຽນດັ່ງກ່າວ ໂດຍການເຂົ້າຮ່ວມຂອງ ທ່ານ ນາງ ສຸກສະຖາພອນ ສູນທະວົງ ປະທານໂຮງຮຽນອະນຸບານ-ປະຖົມ-ມັດທະຍົມສຶກສາສົມບູນສະຖາພອນ, ພ້ອມດ້ວຍຜູ້ອໍານວຍການໂຮງຮຽນອະນຸບານ-ປະຖົມ-ມັດທະຍົມສຶກສາສົມບູນ ສະຖາພອນ; ທ່ານ ອາພິເດດ ໄພສະຫວັດ ຜູ້ບໍລິຫານໂຮງຮຽນ, ມີທ່ານນາຍບ້ານບຶງຂະຫຍອງ ແລະ ແຂກຖືກເຊີນ, ພະນັກງານ-ຄູອາຈານ, ຜູ້ປົກຄອງ ແລະ ນັກຮຽນຊັ້ນອະນຸບານ, ປະຖົມ, ມັດທະຍົມ ພາຍໃນໂຮງຮຽນເຂົ້າຮ່ວມຢ່າງເປັນຂະບວນຟົດຟື້ນ.

ທ່ານ ນາງ ຄໍາສິລິພອນ ສູນທະວົງ ກ່າວວ່າ: ການຈັດງານວິທະຍາສາດຄັ້ງນີ້ ແມ່ນເປັນຄັ້ງທີ 3 ທີ່ໂຮງຮຽນສະຖາພອນໄດ້ຈັດຂຶ້ນ ໂດຍພາຍໃຕ້ການຊີ້ນໍາ, ນໍາພາຂອງຄະນະບໍລິຫານໂຮງຮຽນສົມທົບກັນລະຫວ່າງຄູ-ອາຈານ ຊຶ່ງຄວາມຄິດລິເລີ່ມ ແມ່ນມາຈາກການຄົ້ນຄວ້າ ທຸກກິດຈະກໍາ ການຮຽນ-ການສອນ ໃຫ້ເປັນການລົງພາກປະຕິບັດຕົວຈິງ, ຝຶກທັກສະໃຫ້ນັກຮຽນໄດ້ຮູ້ຄົ້ນຄິດ, ວິເຄາະ, ວິໄຈຜົນດ້ວຍຕົນເອງ ຜ່ານຜົນການທົດລອງ ໂດຍມີຫຼັກການທາງວິທະຍາສາດເປັນສິ່ງຢັ້ງຢືນ. ນອກຈາກນັ້ນແລ້ວ; ຍັງສ້າງກິດຈະກໍາການຮຽນ-ການສອນ ທີ່ເຮັດໃຫ້ນັກຮຽນ ເກີດມີຈິນຕະນາການ ແລະ ແນວຄິດສ້າງສັນໂດຍສະແດງ ອອກທາງດ້ານຜົນງານການປະດິດ, ການກ້າສະແດງຄວາມສາມາດຂອງນັກຮຽນຢູ່ເທິງເວທີ ແລະ ການເຄື່ອນໄຫວຕ່າງໆພາຍໃນໂຮງຮຽນ ປັດຈຸບັນພວກເຮົາພ້ອມແລ້ວ ທີ່ຈະນໍາສະເໜີສູ່ສາຍຕາຂອງມວນຊົນທັງຫຼາຍ ແລະ ເພື່ອເປັນການວາງສະແດງຜົນງານຂອງນັກຮຽນທີ່ສະແດງອອກທາງດ້ານແນວຄິດ ທັກສະ ຈິນຕະນາການຜ່ານກິດຈະກໍາຕ່າງໆ ໂດຍການຈັດຮ້ານວາງສະແດງຜົນຂອງການຮຽນ-ການສອນຂອງຄູ-ນັກຮຽນ ແລະ ຮ້ານອາຫານຂອງນັກຮຽນ ທັງເປັນສະເຫຼີມສະຫຼອງວັນແມ່ຍິງສາກົນ ວັນທີ 8 ມີນາ 2023 ປີນີ້ ຄົບຮອບ 113 ປີ. ພາຍໃນງານປະກອບມີຫຼາຍກິດຈະກໍາເປັນຕົ້ນແມ່ນ: ການສະແດງສິລະປະຂອງນັກຮຽນຊັ້ນອະນຸບານ; ພິທີໄຫວ້ແມ່ ໂດຍເຊີນຜູ້ປົກຄອງເຂົ້າຮ່ວມ; ຮ້ານວາງສະແດງ-ຂາຍເຄື່ອງຂອງນັກຮຽນ ແລະ ການເດີນແບບຂອງນັກຮຽນແຕ່ລະຊັ້ນ ໂດຍອອກແບບຈາກວັດສະດຸເສດເຫຼືອ ທີ່ບໍ່ໃຊ້ແລ້ວ ນໍາເອົາມາໃຊ້ຄືນໃໝ່ເພື່ອໃຫ້ເກີດປະໂຫຍດ ເຊັ່ນ: ເຈ້ຍໜັງສືພິມ, ຖົງຢາງ, ເຊືອກຝາງ, ແຜ່ນຊີດີ ແລະ ອື່ນໆ.

ຂ່າວ-ພາບ: ຍຸພິນທອງ-ວັນເພັງ