ພາຍຫຼັງໄດ້ຮັບການສ້າງຕັ້ງພັກປະຊາຊົນ ປະຕິວັດລາວ ໃນວັນທີ 22 ມີນາ ປີ 1955 ເປັນຕົ້ນມາ ພັກໄດ້ເປັນແກນນໍາໃນການນໍາພາ-ຊີ້ນໍາປວງຊົນລາວບັນດາເຜົ່າ ຕໍ່ສູ້ປົດປ່ອຍປະເທດຊາດ ຈົນສາມາດຍາດເອົາເອກະ ລາດ ແລະ ສະຖາປະນາ ສປປ ລາວ ຂຶ້ນໃນວັນທີ 2 ທັນວາ ປີ 1975 ຈາກນັ້ນ ກໍໄດ້ນໍາພາປົກປັກຮັກສາ ແລະ ສ້າງສາພັດທະນາປະເທດຊາດຈົນເຖິງປັດຈຸບັນ.

ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີທີ່ຈະມາເຖິງນີ້, ທ່ານນາງ ພວງມະລີ ອັກຄະມຸນຕີ ຫົວໜ້າກົມກວດກາ ຄະນະໂຄສະນາອົບຮົມສູນກາງພັກໄດ້ສະແດງທັດສະນະຕໍ່ວັນສຳຄັນດັ່ງກ່າວຕໍ່ສື່ມວນຊົນເມື່ອບໍ່ດົນມານີ້ວ່າ: ຕະຫຼອດໄລຍະ 68 ປີຜ່ານມາ ໃນຖານະທີ່ເປັນແກນນໍາພັກໄດ້ວາງແນວ ທາງອັນຖືກຕ້ອງສອດຄ່ອງກັບສະພາບຄວາມເປັນຈິງຂອງປະເທດເຮົາໃນແຕ່ລະໄລຍະ ຈຶ່ງເຮັດໃຫ້ປະເທດຊາດໄດ້ຮັບການພັດທະນາ ມີຜົນສໍາເລັດຫຼາຍດ້ານ. ເຮັດໃຫ້ ສປປ ລາວ ມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ ມີຄວາມສະຫງົບ, ເສດຖະກິດມີການຂະຫຍາຍຕົວຕໍ່ເນື່ອງ ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງປົວແປງດີຂຶ້ນເທື່ອລະກ້າວ, ພື້ນຖານໂຄງຮ່າງໄດ້ຮັບການພັດທະນາຂະ ຫຍາຍຕົວແຕ່ຕົວເມືອງຮອດຊົນນະບົດ, ຕາໜ່າງຄົມມະນາຄົມ, ໂຮງຮຽນ, ໂຮງໝໍ ມີການຂະຫຍາຍຕົວທາງດ້ານປະລິມານ ແລະ ມີການປັບປຸງຄຸນນະພາບໃຫ້ດີຂຶ້ນເລື້ອຍໆ, ມໍລະດົກ, ວັດທະນະທໍາອັນລໍ້າຄ່າຂອງຊາດໄດ້ຮັບການປົກປັກຮັກສາ, ບູລະນະ ສປປ ລາວ ໄດ້ມີການພົວພັນຮ່ວມມືກັບສາກົນນັບມື້ຫຼາຍຂຶ້ນ.

ທ່ານກ່າວເນັ້ນອີກວ່າ: ບັນດາຜົນສໍາເລັດທີ່ໄດ້ມານັ້ນ ແມ່ນຍ້ອນພັກໄດ້ເອົາໃຈໃສ່ໃຫ້ຄວາມສໍາຄັນທີ່ສຸດຕໍ່ວຽກງານການເມືອງ-ແນວຄິດ ຊຶ່ງໄດ້ກໍານົດທິດທາງ-ໜ້າທີ່ຂອງວຽກງານຢ່າງມີຈຸດສຸມ, ເປັນລະບົບສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງແຕ່ລະໄລຍະ, ໄດ້ນໍາພາ-ຊີ້ນໍາປັບປຸງບັນດາອົງການເສນາທິການ ແລະ ບໍາລຸງສ້າງບຸກຄະລາກອນທີ່ເຮັດວຽກງານການເມືອງ-ແນວຄິດ ເພື່ອຍົກສູງຄຸນນະພາບຂອງວຽກງານການ ເມືອງ-ແນວຄິດໃຫ້ສູງຂຶ້ນ, ຖືວຽກງານການເມືອງ-ແນວຄິດເປັນກົກ, ມີບົດບາດ ແລະ ສອດຫ້ອຍໄປທຸກຂົງເຂດວຽກງານເຮັດໃຫ້ລະບົບແນວຄິດ, ທິດສະດີ, ແນວທາງນະໂຍບາຍຂອງພັກ ໄດ້ຮັບຮອງການຈັດຕັ້ງປະຕິບັດທົ່ວສັງຄົມ, ປະຊາຊົນບັນດາເຜົ່າໄດ້ຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກ, ພ້ອມກັນສ້າງສາພັດທະນາປະເທດຊາດໃຫ້ຈະເລີນກ້າວໜ້າຂຶ້ນໄປເລື້ອຍໆ.

ໃນນາມສະມາຊິກພັກຜູ້ໜຶ່ງ ຍາມໃດກໍເຊື່ອໝັ້ນວ່າ: ພາຍໃຕ້ການນໍາພາ-ຊີ້ນໍາຂອງພັກ ປະເທດຊາດຂອງພວກເຮົາຈະສາມາດຜ່ານຜ່າບັນດາອຸປະສັກຄວາມຫຍຸ້ງຍາກຕ່າງໆ ນໍາພາປະເທດຊາດ ແລະ ປະຊາຊົນກ້າວເດີນໄປຕາມເສັ້ນທາງທີ່ໄດ້ກໍານົດໄວ້, ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ ຂໍອວຍພອນໃຫ້ການນໍາພັກ-ລັດທຸກໆຂັ້ນ ຈົ່ງມີສຸຂະພາບພະລານາໄມສົມບູນ ແຂງແຮງ ສືບຕໍ່ນໍາພາປະເທດຊາດ ກ້າວຂຶ້ນຢ່າງບໍ່ຢຸດຢັ້ງ.