ຄະນະຮັບຜິດຊອບໂຄງການປັບປຸງ ແລະ ກໍ່ສ້າງ ຊົນລະປະທານນໍ້າຫາວ ເມືອງແບງ ແຂວງອຸດົມໄຊ ຊຶ່ງນຳໂດຍທ່ານ ຄຳດີ ວົງລ້ອມ ຄະນະປະຈຳພັກແຂວງ ປະທານສະພາປະຊາຊົນແຂວງ, ທ່ານ ຄຳພອນ ມຸນລະໄມ ຫົວໜ້າພະແນກ ກະສິກຳ ແລະ ປ່າໄມ້ແຂວງ, ທ່ານ ສີສະຫວັນ ຫານມົນຕີ ປະທານ ບໍລິສັດ ອະພິສິດ ວິສະວະກຳ ກໍ່ສ້າງ ຈຳກັດ, ພ້ອມຄະນະຮັບຜິດຊອບຂັ້ນແຂວງ, ຂັ້ນເມືອງ, ອົງການປົກຄອງບ້ານ ທີ່ໄດ້ຮັບຜົນປະໂຫຍດຈາກໂຄງການ ຕະຫຼອດຮອດ ວິຊາການທີ່ກ່ຽວຂ້ອງ ພ້ອມກັນລົງຕິດຕາມ, ກວດກາຄືນໂຄງການປັບປຸງ ແລະ ກໍ່ສ້າງຊົນລະປະທານນໍ້າຫາວ ຫວ່າງບໍ່ດົນມານີ້.

ທ່ານ ຄໍາພອນ ມຸນລະໄມ ກ່າວວ່າ: ການລົງຕິດຕາມ, ກວດກາໃນຄັ້ງນີ້ ແມ່ນເປັນການກວດກາຄວາມສຳເລັດ 100% ຂອງໂຄງການກ່ອນຈະມີພິທີເຊັນສັນຍາມອບ-ຮັບ ຊົ່ວຄາວ. ໂຄງການດັ່ງກ່າວ ເປັນໂຄງການໜຶ່ງທີ່ນອນໃນແຜນການກໍ່ສ້າງ ແລະ ຟື້ນຟູຊົນລະປະທານທີ່ໄດ້ຮັບຜົນກະທົບຈາກໄພພິບັດນ້ຳຖ້ວມໄລຍະປີ 2018 ໂດຍໄດ້ຮັບທຶນຊ່ວຍເຫຼືອຈາກທະນາຄານພັດທະນາອາຊີ (ADB) ມູນຄ່າ 1.216.000 ໂດລາ (1 ລ້ານ 2 ແສນ 1 ຫມື່ນ 6 ພັນ ໂດລາ) ໂດຍແມ່ນບໍລິສັດອະພິສິດວິສະວະກຳ ກໍ່ສ້າງຈຳກັດ ເປັນຜູ້ຮັບເຫມົາໂຄງການກໍ່ສ້າງ ໂຄງການໄດ້ເລີ່ມກໍ່ສ້າງມາແຕ່ວັນທີ 13 ມີນາ 2022 ແລະ ສຳເລັດ ໃນວັນທີ 7 ມີນາ 2023. ຜ່ານການລົງຕິດຕາມ, ກວດກາຕົວຈິງ ເຫັນວ່າ: ວຽກງານແຕ່ລະດ້ານແມ່ນສຳເລັດ 100% ຕາມການອອກແບບ ດັ່ງນັ້ນ ຈຶ່ງຮຽກຮ້ອງໃຫ້ອົງການປົກຄອງບ້ານ ລວມທັງປະຊາຊົນທີ່ໄດ້ຮັບຜົນປະໂຫຍດຈາກໂຄງການດັ່ງກ່າວ ສືບຕໍ່ເອົາໃຈໃສ່ໃນການຄຸ້ມຄອງ ແລະ ນຳໃຊ້ ໃຫ້ມີປະສິດທິພາບ ແລະ ໃຊ້ໄດ້ຍາວນານ.

ທ່ານ ສີສະຫວັນ ຫານມົນຕີ ກ່າວວ່າ: ພາຍຫຼັງສຳເລັດການກວດກາ ແລະ ເຊັນບົດບັນທຶກ ມອບ-ຮັບ ຊົ່ວຄາວ ທາງບໍລິສັດ ຍັງຈະໄດ້ສືບຕໍ່ຕິດຕາມ ແລະ ປັບປຸງ ສ້ອມແປງຄືນຕື່ມບາງຈຸດທີ່ໄດ້ຮັບຄວາມເສຍຫາຍ ແລະ ເປ່ເພ ໃຫ້ຄົບຕາມກຳນົດ 1 ປີ ຈາກນັ້ນ ຈຶ່ງຈະມີພິທີ ມອບ-ຮັບ ໂຄງການ ຢ່າງເປັນທາງການ. ໂຄງການນີ້ ເປັນໂຄງການໃຫຍ່ ຊຶ່ປະກອບມີ 5 ໂຄງການຍ່ອຍ ຄື: ນໍ້າຫາວ 1,2 ແລະ ນ້ຳຫາວ 3, ໂຄງການນໍ້າແຫງ ແລະ ນໍ້າແບງ 2. ມີຝາຍນ້ຳລົ້ນ 4 ແຫ່ງ ໃນນີ້ກໍ່ສ້າງໃໝ່ 1 ແຫ່ງ, ປັບປຸງ 3 ແຫ່ງ, ມີຄອງເໝືອງ 14 ເສັ້ນ, ຍາວ 21 ພັນກວ່າແມັດສາມາດສະໜອງນ້ຳໃຫ້ປະຊາຊົນ ຫົດເນື້ອທີ່ການຜະລິດໄດ້ທັງໝົດ 600 ກວ່າເຮັກຕາ ໃນລະດູຝົນ, ສ່ວນລະດູແລ້ງ ສາມາດສະໜອງນ້ຳເຂົ້າໃນການເຮັດນາແຊງ ໄດ້ 200 ກວ່າເຮັກຕາ ແລະ ເນື້ອທີ່ປູກພືດອື່ນໆ ຈຳນວນ 250 ເຮັກຕາ. ໃນນີ້ ມີ 9 ບ້ານ 1.123 ຄອບຄົວ ທີ່ໄດ້ຮັບຜົນປະໂຫຍດຈາກໂຄງການຄື: ບ້ານນາຫ້ວຍ, ແບງຄຳ, ແບງຫຼວງ, ໂພແກ້ວ, ທ່າກາດ, ນາບອນ, ສາມກາງ, ຫ້ວຍລູກ ແລະ ບ້ານພູຄຳ.

ຂ່າວ: ຄານມະນີ ຮຽນດໍຈັນ