ເພື່ອປະຕິບັດຕາມທັມມະນູນສົງລາວ ສະບັບປັບປຸງໃໝ່ປີ ພ.ສ 2561 ສະບັບເລກທີ 37/ນຍ, ລົງວັນທີ 15 ກຸມພາ 2019 ແລະ ການຈັດຕັ້ງປະຕິບັດການເຄື່ອນໄຫວວຽກງານຕົວຈິງຕາມພາລະບົດບາດ, ສິດ ແລະ ໜ້າທີ່ຂອງອົງການພຸດທະສາສະໜາສໍາພັນລາວ (ອພສ) ແຂວງຄໍາມ່ວນໃນໄລຍະຜ່ານມາ.

ໃນທ້າຍອາທິດຜ່ານມານີ້ ທີ່ສະໂມສອນຫ້ອງວ່າການປົກຄອງເມືອງທ່າແຂກ ແຂວງຄໍາມ່ວນ ໄດ້ຈັດກອງປະຊຸມສະຫຼຸບຜົນສໍາເລັດການຈັດຕັ້ງປະຕິບັດວຽກງານປະຈໍາປີ 2022 ແລະ ທິດທາງແຜນການປະຈໍາປີ 2023 ຂອງວຽກງານອົງການພຸດທະສາສະໜາສໍາພັນລາວ ໂດຍພາຍໃຕ້ການເປັນປະທານຂອງພຣະອາຈານໃຫຍ່ ໜູໄຕ ແກ້ວມະນີໄຊ ທີ່ປຶກສາ ອພສ ແຂວງ, ທ່ານ ວັນໄຊ ພອງສະຫວັນ ເຈົ້າແຂວງ, ມີແຂກຖືກ ແລະ ພາກສ່ວນກ່ຽວຂ້ອງເຂົ້າຮ່ວມ.

ພຣະອາຈານ ພອນທິບ ເພັ່ງພົມມະຈັນ ຮອງປະທານ ອພສ ແຂວງ ໄດ້ກ່າວວ່າ: ອພສ ແຂວງຄໍາມ່ວນພາຍໃຕ້ການຊີ້ນໍາຂອງສູນກາງອົງການພຸດທະສາສະໜາສໍາພັນແຫ່ງ ສປປ ລາວ ແມ່ນເປັນອົງການຈັດຕັ້ງໜຶ່ງທີ່ເປັນຕົວແທນໃຫ້ແກ່ພຣະສົງສັມມະເນນກໍຄືພຸດທະສາສະນິກະຊົນລາວໃນທົ່ວແຂວງທີ່ມີສັດທາ ແລະ ຄວາມເຫຼື້ອມໃສຕໍ່ພຣະທັມຄໍາສັ່ງສອນຂອງພຣະພຸດທະເຈົ້າຊຶ່ງມີຜູ້ເຊື່ອຖືກວມເອົາ 85% ຂອງຈໍານວນພົນລະເມືອງໃນທົ່ວແຂວງ.

ຕີລາຄາລວມຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນພຣະສົງແຂວງຄໍາມ່ວນສະໄໝທີ VIII ຮອງປະທານ ອພສ ແຂວງໄດ້ກ່າວຕື່ມວ່າ: ໃນການເຄື່ອນໄຫວປະຕິບັດວຽກງານທີ່ຜ່ານມານັ້ນເຖິງວ່າຈະປະສົບກັບຄວາມຫຍຸ້ງຍາກໃນຫຼາຍດ້ານແຕ່ກໍໄດ້ອຸດສາຫະ, ພາກພຽນພະຍາຍາມ, ບຸກໜ້າບືນຕົວຢ່າງເຕັມທີ່.

ທົ່ວແຂວງມີພຣະສົງສັມມະເນນທັງໝົດ 941 ອົງ. ໃນນັ້ນ, ເປັນພຣະພິກຂຸສົງ 541 ອົງ, ສັມມະເນນ 400 ອົງ, ມີພຣະສົງບວດໃໝ່ 32 ອົງ, ສັມມະເນນບວດໃໝ່ 80 ອົງ, ມີພຣະພິກຂຸສົງລາສິກຂາ 24 ອົງ, ສັມມະເນນລາວິກຂາ 36 ອົງ, ມີພຣະພິກຂຸສົງມໍຣະນະພາບ 6 ອົງ, ສັມມະເນນມໍຣະນະພາບ 1 ອົງ, ແມ່ຂາວ 19 ຕົນ, ສັງກະລີ 7 ຄົນ, ທົ່ວແຂວງມີວັດທັງໝົດ 455 ວັດ, ວັດທີ່ມີພຣະສົງອາໄສຢູ່ປະຈໍາ 360 ວັດ, ວັດທີ່ບໍ່ມີພຣະສົງອາໄສຢູ່ (ວັດຮ້າງ) 95 ວັດ. ມີໂຮງຮຽນສຶກສາສົງຢູ່ 2 ແຫ່ງຄື: ໂຮງຮຽນ ມ.ຕ ສຶກສາສົງຕັ້ງຢູ່ສີບຸນເຮືອງ ເມືອງຫີນບູນ 1 ແຫ່ງ, ມີ 4 ຂັ້ນຮຽນແຕ່ ມ.1-ມ.4; ໂຮງຮຽນ ມ.ສ ສຶກສາສົງຕັ້ງຢູ່ວັດນັນທະຄາມ (ວັດກາງ) 1 ແຫ່ງ, ມີ 7 ຂັ້ນຮຽນ ( ມ.1-ມ.7 ) ແລະ ວຽກງານອື່ນໆກໍມີຜົນສໍາເລັດ.

ສໍາລັບທິດທາງແຜນການໃນຊຸມປີຕໍ່ໜ້າຕ້ອງໄດ້ເພີ່ມທະວີປະສານສົມທົບກັບ ອພສ ຂັ້ນຕ່າງໆໃຫ້ດີກວ່າເກົ່າ ແລະ ເພີ່ມທະວີປະສານສົມທົບກັບທຸກພາກສ່ວນ, ອົງການຈັດຕັ້ງຝ່າຍບ້ານເມືອງທີ່ກ່ຽວຂ້ອງໃຫ້ມີຄວາມໜັກແໜ້ນຂຶ້ນຕື່ມ, ຕ້ອງກໍາແໜ້ນເຊື່ອມຊຶມແນວທາງນະໂຍບາຍຂອງພັກ-ລັດຕໍ່ວຽກງານສາສະໜາພ້ອມທັງສຶກສາຮຽນຮູ້ພາລະບົດບາດ, ສິດ ແລະ ໜ້າທີ່ຂອງອົງການຈັດຕັ້ງຂອງຕົນໃຫ້ເລິກເຊິ່ງ.

ໃນຕອນທ້າຍ, ທ່ານເຈົ້າແຂວງຄໍາມ່ວນ ໄດ້ນໍາເອົາເງິນຈໍານວນໜຶ່ງທີ່ໄດ້ມາຈາກການປະກອບສ່ວນຂອງພາກສ່ວນຕ່າງໆຢູ່ໃນສັງຄົມເພື່ອຖະໜຸບໍາລຸງພຸດທະສາສະໜາໃຫ້ມີຄວາມຈະເລີນວັດທະນາສືບຕໍ່ໄປ. ພ້ອມນັ້ນ ຍັງໄດ້ມີການມອບໃບຍ້ອງຍໍ ແລະ ໃບກຽດຕິຄຸນໃຫ້ແກ່ຜູ້ທີ່ມີຜົນງານດີເດັ່ນໃນການປະກອບສ່ວນເຫື່ອແຮງ, ສະຕິປັນຍາ ແລະ ວັດຖຸປັດໄຈເຂົ້າໃນວຽກງານພຸດທະສາສະໜາຕື່ມອີກ .

(ຂ່າວ-ພາບ: ແດງສະຫວັດ ແສນພານິດ).