ໃນວັນທີ 21 ມີນານີ້, ຫ້ອງວ່າສູນກາງພັກ (ຫສພ) ໄດ້ຈັດພິທີສະເຫຼີມສະຫຼອງວັນສ້າງຕັ້ງຫ້ອງ​ວ່າການສູນ​ກາງ​ພັກ ຄົບຮອບ 68 ປີ(24/3/1955-24/3/2023)ພາຍໃຕ້ການເປັນປະທານຂອງ ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກຜູ້ປະຈໍາການຄະນະເລຂາທິການສູນກາງພັກຮອງປະທານປະເທດແຫ່ງ ສປປ ລາວ, ໂດຍມີສະຫາຍ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ ເລຂາຄະນະພັກ ຫົວໜ້າຫ້ອງວ່າການສູນກາງພັກ, ບັນດາສະຫາຍ ການນຳຫສພ, ຕະຫຼອດຮອດ ພະນັກງານ-ລັດຖະກອນ ທົ່ວຫສພ ແລະ ແຂກຖືກເຊີນຈາກ ບັນດາອົງການພັກ ອ້ອມຂ້າງຫສພ ເຂົ້າຮ່ວມ.

ໃນພິທີ ສະຫາຍ ທອງສະລິດ ມັງໜໍ່ເມກ ໄດ້ກ່າວຫວນຄືນ ປະຫວັດມູນເຊື້ອ ແລະ ຜົນສຳເລັດ ຂອງຫສພ ຕະຫຼອດໄລຍະ 68 ປີຜ່ານມາ ໂດຍໄດ້ຍົກໃຫ້ເຫັນຄວາມເປັນມາ, ວິລະກຳອັນລ້ຳເລີດ, ຜົນສຳເລັດອັນໃຫຍ່ຫຼວງ ແລະ ບົດຮຽນອັນອຸດົມສົມບູນ,ລະອິດລະອ້ຽວເຕັມໄປດ້ວຍສິ່ງທ້າທາຍທົດສອບນາໆປະການໃນແຕ່ລະໄລຍະຂອງຂະບວນວິວັດແຫ່ງການເຕີບໃຫຍ່ຂະຫຍາຍຕົວ ຂອງຫສພ ກໍຄືການປະຕິບັດໜ້າທີ່ ທີ່ຕິດພັນກັບວຽກງານການເປັນເສນາທິການໃຫ້ແກ່ຄະນະບໍລິຫານງານສູນກາງພັກ,ກົມການເມືອງສູນກາງພັກ ແລະ ຄະນະເລຂາທິການສູນກາງພັກໄດ້ຍົກເອົາມູນເຊື້ອທາດແທ້ປະຕິວັດ, ບົດຮຽນຂອງຫ້ອງວ່າການສູນກາງພັກຈຳນວນໜຶ່ງ ເປັນຕົ້ນບົດບາດຄວາມສຳຄັນ ໃນການເປັນເສນາທິການໃຫ້ກັບສູນກາງພັກ, ໜ້າທີ່ຄວາມຮັບຜິດຊອບ ແລະ ຜົນງານທີ່ຍາດມາໄດ້ຕະຫຼອດໄລຍະ 68ປີທີ່ຜ່ານມາ;ພ້ອມນັ້ນໄດ້ມີ ພິທີມອບໃບຍ້ອງຍໍ ໃຫ້ຜູ້ທີ່ມີຜົນງານດີເດັ່ນປະຈໍາປີ2022ຊຶ່ງປະເພດ I ມີ 123 ສະຫາຍ; ປະເພດ II ມີ 134 ສະຫາຍ; ປະເພດ III ມີ 16 ສະຫາຍ.

ໃນໂອກາດອັນມີຄວາມໝາຍສຳຄັນນີ້,ສະຫາຍ ບຸນທອງ ຈິດມະນີ ໄດ້ມີບາງຄໍາເຫັນເນັ້ນໜັກ, ໃຫ້ຫ້ອງວ່າການສູນກາງພັກພ້ອມກັນສືບຕໍ່ປົກປັກຮັກສາ ແລະ ເສີມຂະຫຍາຍທາດແທ້ມູນເຊື້ອ ແລະ ຜົນງານ ທີ່ຍາດມາໄດ້ໃນໄລຍະຜ່ານມາ ໃຫ້ເຂົ້າສູ່ລວງເລິກ ແລະ ແຂງແຮງກວ່າເກົ່າ; ສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ-ລັດຖະກອນ ກຳແໜ້ນແນວທາງຂອງພັກ; ລະບຽບກົດໝາຍ; ສືບຕໍ່ປັບປຸງກົງຈັກການຈັດຕັ້ງ ຕາມທິດກະທັດຮັດ, ມີປະສິດທິຜົນ, ກຳນົດພາລະບົດບາດ, ສິດໜ້າທີ່, ຄົ້ນຄວ້າຕຳແໜ່ງງານໃຫ້ຈະແຈ້ງ ແລະ ປະກອບພະນັກງານໃຫ້ແທດເໝາະ, ສ້າງພະນັກງານ ຫສພ ໃຫ້ເປັນມືອາຊີບ, ເປັນຜູ້ຊ່ຽວຊານຊຳນານງານແຕ່ລະດ້ານ; ກໍານົດກົນໄກ, ລະບອບລະບຽບການເຄື່ອນໄຫວວຽກງານ ໃຫ້ມີຄວາມໂລ່ງລ່ຽນ, ທັນສະໄໝ, ວ່ອງໄວ;ໃນນີ້ ຕ້ອງເພີ່ມທະວີການປະສານສົມທົບ ກັບບັນດາອົງການຂອງພັກ ເພື່ອຊ່ວຍກົມການເມືອງ, ຄະນະເລຂາທິການສູນກາງພັກ ຕິດຕາມ, ຊຸກຍູ້, ຊີ້ນໍາການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິຕ່າງໆ ຂອງຄະນະບໍລິຫານງານສູນກາງພັກ, ຂອງກົມການເມືອງ ແລະ ຄະນະເລຂາທິການສູນກາງພັກ; ເພີ່ມທະວີການນໍາພາຂອງຕົນຕໍ່ທຸກຂົງເຂດວຽກງານໃຫ້ແທດເຖິງ, ສ້າງການຫັນປ່ຽນ ທີ່ແຂງແຮງ, ເລິກເຊິ່ງ ແລະ ຮອບດ້ານ, ໃນນີ້ ຕ້ອງຫັນໃຫ້ເປັນລະບຽບການ, ເປັນຂໍ້ແຂ່ງຂັນ ເພື່ອໃຫ້ແຕ່ລະກົມ ແລະ ສະມາຊິກພັກ, ພະນັກງານ-ລັດຖະກອນ ສູ້ຊົນປະຕິບັດ; ເພີ່ມຄວາມເອົາໃຈໃສ່ໃນການນຳພາ-ຊີ້ນຳບັນດາອົງການຈັດຕັ້ງມະຫາຊົນຢູ່ພາຍໃນຫ້ອງວ່າການສູນກາງພັກໃຫ້ມີການເຄື່ອນໄຫວທີ່ແຂງແຮງກວ່າເກົ່າ.

(ຂ່າວ: ຫສພ)