ເນື່ອງໃນໂອກາດ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ (22/3/1955-22/3/2023), ສະຫາຍ ອຸດຕະແກ້ວ ແກ້ວດວງສິນ ກໍາມະການພັກ ຫົວໜ້າຫ້ອງການ ເລຂາຊາວໜຸ່ມປະຊາຊົນ ປະຕິວັດລາວ ກະຊວງແຜນການ ແລະ ການລົງທຶນ ໄດ້ສະແດງທັດສະນະຕໍ່ວັນດັ່ງກ່າວວ່າ: ເວລາໃດພັກກໍເປັນແກນນໍາ, ເປັນຜູ້ຖືທຸງໄຊປະຕິວັດນໍາໜ້າພາທາງໃນພາລະກິດປະຕິວັດ ຢູ່ປະເທດເຮົາໂດຍກົງ ໃນການຕໍ່ສູ້ປົດປ່ອຍຊາດ ຕ້ານການຈັກກະພັດຜູ້ຮຸກຮານນໍາເອົາຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ ມາສູ່ປະຊາຊົນລາວບັນດາເຜົ່າ.

ຕະຫຼອດ 68 ປີຜ່ານມາ ການນໍາພາຂອງພັກແມ່ນມີຜົນສຳເລັດ ໂດຍສະເພາະພາລະກິດປົກປັກຮັກສາ ແລະ ສ້າງສາປະເທດຊາດ ໃນພາລະກິດປ່ຽນແປງໃໝ່ຮອບດ້ານ ຢ່າງມີຫຼັກການຂອງພັກ, ພັກໄດ້ຮັບເອົາສິ່ງຍອດຍິ່ງແຫ່ງສະຕິປັນຍາທີ່ກ້າວໜ້າຂອງມວນມະນຸດ ເພື່ອກໍານົດແນວທາງ ແຜນນະໂຍບາຍຂອງພັກ, ມາຮອດປັດຈຸບັນໄດ້ມີການຢັ້ງຢືນຜ່ານພຶດຕິກຳຕົວຈິງທີ່ເຫັນໄດ້ຈາກການກຳນົດທິດທາງການນໍາພາຢ່າງຖືກຕ້ອງ, ພາວະວິໄສ ແລະ ສອດຄອງກັບພາລະກິດປະຕິວັດຂອງປະເທດເຮົາໂດຍນໍາໃຊ້ທິດສະດີມາກ-ເລນິນ ແລະ ແນວຄິດໄກສອນ ພົມວິຫານ ເປັນເຂັມທິດ ເຍືອງທາງຢ່າງຄອງແຄ້ວໃນການນໍາພາທຸກຂົງເຂດ ນັບແຕ່ຂົງເຂດວຽກງານດ້ານເສດຖະກິດ-ວັດທະນະທຳ ສັງຄົມ, ປ້ອງກັນຊາດ-ປ້ອງກັນຄວາມສະຫງົບ ມີຜົນສຳເລັດເປັນເປັນໆກ້າວມາ. ຮັກສາໄດ້ຈັງຫວະການພັດທະນາເສດຖະກິດຢ່າງໜັ້ນທ່ຽງ ໃນແຕ່ລະໄລຍະ, ມີສະຖຽນລະພາບດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບ ແລະ ຍົກສູງບົດບາດຂອງ ສປປ ລາວ ຢູ່ເທິງເວທີສາກົນໃຫ້ສູງເດັ່ນຂຶ້ນ. ພາລະກິດຂອງພັກບໍ່ມີອຸດົມການອື່ນໃດໄປກວ່າຜົນປະໂຫຍດລວມຂອງຊາດ ແລະ ປະຊາຊົນ ເພື່ອນໍາພາສ້າງລະບອບສັງຄົມນິຄົມທີ່ເປັນຈຸດໝາຍຂອງພາລະກິດປະຕິວັດ.

ຈາກຜົນສຳເລັດດັ່ງກ່າວ ເປັນການຢັ້ງຢືນໃຫ້ເຫັນການນໍາພາທີ່ຖືກຕ້ອງ ແລະ ສະຫຼາດ

ສອງໃສຂອງພັກໃນໄລຍະຜ່ານມາ ແລະ ເພື່ອຮັກສາໄວ້ມູນເຊື້ອອັນດີງາມຂອງພັກ ແລະ ການຈັດຕັ້ງພາລະກິດຂອງພັກໃຫ້ບັນລຸເປົ້າໝາຍພວກເຮົາຕ້ອງສືບຕໍ່ເອົາໃຈໃສ່ຈັດຕັ້ງປະຕິບັດຄື: ສືບຕໍ່ເຕົ້າໂຮມ ແລະ ເພີ່ມທະວີຄວາມສາມັກຄີພາຍໃນພັກໃຫ້ເຂັ້ມແຂງ, ລວມທັງສະມາຊິກຊາວໜຸ່ມປະຊາຊົນ ປະຕິວັດລາວ ຮຸ່ນສືບທອດ ເພື່ອເປັນກຳລັງແຮງໃນການຈັັດຕັ້ງຜັນຂະຫຍາຍແນວທາງຂອງພັກໃຫ້ປະກົດຜົນເປັນຈິງ; ຕັ້ງໜ້າສຶກສາຮໍ່າຮຽນທິດສະດີມາກ-ເລນິນ, ແນວຄິດໄກສອນ ພົມວິຫານ ແລະ ຈັດຕັ້ງປະຕິບັດບັນດາມະຕິຂອງພັກໃນຂົງເຂດວຽກງານຕ່າງໆ ໃນແຕ່ລະໄລຍະ ເພື່ອຜັນຂະຫຍາຍແນວທາງດັ່ງກ່າວເຂົ້າສູ່ການຈັດຕັ້ງປະຕິບັດຕົວຈິງ; ສືບຕໍ່ປັບປຸງ ແລະ ກໍ່ສ້າງພັກໃຫ້ມີຄວາມປອດໄສ, ໜັກແໜ້ນ, ເຂັ້ມແຂງ ເປັນແບບຢ່າງໃຫ້ ສະມາຊິກພັກ ແລະ ມາຫາຊົນໃຫ້ມີຄວາມໄວ້ເນື້ອເຊື່ອໃຈສູງຂຶ້ນ.