ໃນວັນທີ 22 ມີນາ ນີ້ ແຂວງຈໍາປາສັກ ໄດ້ຈັດພິທີໂຮມຊຸມນຸມ ລະນຶກ ແລະ ສະເຫຼີມສະຫຼອງວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ ຂຶ້ນທີ່ສະໂມສອນຫຼັກ 4 ຂອງແຂວງ ພາຍໃຕ້ການເປັນປະທານຂອງ ສະຫາຍ ວິໄລວົງ ບຸດດາຄໍາ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈໍາປາສັັັັັັັັກ ເຂົ້າຮ່ວມມີບັນດາສະຫາຍຮອງເລຂາພັກແຂວງ, ຄະນະປະຈຳພັກແຂວງ,ກຳມະການພັກແຂວງ, ຫົວໜ້າພະແນກການກົມກອງອອມຂ້າງແຂວງ, ຂົງເຂດກໍາລັງປ້ອງກັນຊາດ-ປ້ອງກັນຄວາມສະຫງົບແຂວງ, ຄະນະນໍາຈາກຂົງເຂດການເມືອງ, ນິຕິບັນຍັດ-ຕຸລາການ, ເສດຖະກິດ ແລະ ຂົງເຂດວັດທະນະທໍາ-ສັງຄົມ ເຂົ້າຮ່ວມ

ໃນພິທີ ສະຫາຍ ວິໄລວົງ ບຸດດາຄໍາ ກ່າວວ່າ: ມື້ນີ້, ອົງຄະນະພັກ, ອົງການປົກຄອງທຸກຂັ້ນ ຕະຫຼອດພໍ່ແມ່ປະຊາຊົນຊາວແຂວງຈໍາປາສັກ ສຸດທີ່ມີຄວາມເບີກບານມ່ວນຊື່ນ ໄດ້ພ້ອມກັນຈັດພິທີໂຮມຊຸມສະເຫຼີມສະຫຼອງ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ (ວັນທີ 22 ມີນາ 1955-22 ມີນາ 2023) ດ້ວຍຄວາມເອກອ້າງທະນົງໃຈ ຕໍ່ການນຳພາຂອງພັກປະຊາຊົນ ປະຕິວັດລາວ ກໍຄື ຕໍ່ອານາຄົດອັນສະຫວ່າງສະໄຫວຂອງປະເທດຊາດ.

ໃນໂອກາດອັນມີຄວາມໝາຍຄວາມສໍາຄັນ ແຫ່ງປະຫວັດສາດນີ້ ຕາງໜ້າອົງຄະນະພັກ, ອົງການປົກຄອງແຂວງ ຂໍສົ່ງຄວາມຢ້ຽມຢາມຖາມຂ່າວອັນອົບອຸ່ນ, ຄວາມສາມັກຄີຮັກແພງ, ຄວາມຮູ້ບຸນຄຸນຢ່າງເລິກເຊິ່ງ ແລະ ອວຍພອນໄຊອັນປະເສີດມາຍັງບັນດາທ່ານອະດີດການນໍາຂອງແຂວງ, ພະນັກງານປະຕິວັດອາວຸດໂສ, ນັກຮົບແຂ່ງຂັນ, ວິລະຊົນແຫ່ງຊາດ, ສະມາຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າຊາວແຂວງຈໍາປາສັກທຸກຖ້ວນໜ້າ ທີ່ໄດ້ເຊີດຊູນ້ຳໃຈແຫ່ງຄວາມສາມັກຄີເປັນປຶກແຜ່ນ ພາຍໃຕ້ການນຳພາຂອງອົງຄະນະພັກແຂວງ ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ພັດທະນາແຂວງຈຳປາສັກ ໃນຕະຫຼອດໄລຍະທີ່ຜ່ານມາ, ເຮັດໃຫ້ແຂວງຂອງພວກເຮົາສືບຕໍ່ມີຄວາມສະຫງົບດ້ານການເມືອງ, ມີຄວາມເປັນລະບຽບຮຽບຮ້ອຍດ້ານສັງຄົມ, ເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ ແລະ ກ້າວຂຶ້ນຢ່າງບໍ່ຢຸດຢັ້ງ.

ຕະຫຼອດໄລຍະເກືອບ 1 ສະຕະວັດ ແຫ່ງການຕໍ່ສູ້ອັນພິລາດອາດຫານ ຕ້ານຈັກກະພັດລ່າເມືອງຂຶ້ນແບບເກົ່າ, ແບບໃໝ່ຢ່າງດຸເດືອດຂ້ຽວຂາດ, ສັບສົນ ແລະ ຫຍຸ້ງຍາກລໍາບາກທີ່ສຸດ ແຕ່ເປັນໄລຍະອັນສະຫງ່າອົງອາດ ແລະ ມີໄຊຍິ່ງໃຫຍ່ກວ່າໝູ່ໝົດໃນປະຫວັດສາດຂອງຊາດລາວເຮົາ, ພວກເຮົາລະນຶກເຖິງຜູ້ນໍາພາສ້າງຕັ້ງພັກ, ນໍາພາສ້າງຕັ້ງກອງທັບປະຊາຊົນລາວ, ນໍາພາຕໍ່ສູ້ປະຕິວັດຊາດ ປະຊາທິປະໄຕ, ນໍາພາສ້າງຕັ້ງລະບອບປະຊາທິປະໄຕ ປະຊາຊົນລາວ, ນໍາພາພາລະກິດປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ພ້ອມນັ້ນ ກໍສະແດງຄວາມຮູ້ບຸນຄຸນຈົດຈໍາລໍາລຶກ, ຕໍ່ວິລະກໍາອັນລໍ້າເລີດ, ຄຸນງາມຄວາມດີ ແລະ ຄວາມເສຍສະຫຼະອັນໃຫຍ່ຫຼວງຂອງບັນດາຜູ້ນໍາແຕ່ລະຮຸ່ນນັກຮົບປະຕິວັດຜູ້ຮັກຊາດ ປະຊາຊົນບັນດາເຜົ່າຜູ້ທີ່ອຸທິດຊີວິດ, ເລືອດເນື້ອເຫື່ອແຮງ, ສະຕິປັນຍາ ເສຍສະຫຼະຄວາມສຸກສ່ວນຕົວ ເພື່ອພາລະກິດຕໍ່ສູ້ກູ້ຊາດ ປົກປັກຮັກສາ ແລະ ສ້າງສາພັດທະນາປະເທດຊາດ.

ໃນພິທີອັນມີຄວາມໝາຍຄວາມສໍາຄັນທາງປະຫວັດສາດນີ້ ພວກເຮົາ ຂໍສະແດງຄວາມອາໄລຮັກຢ່າງສຸດຊຶ້ງເຖິງປະທານ ໄກສອນ ພົມວິຫານ ຜູ້ນໍາທີ່ປີຊາສາມາດ ແລະ ສະຫຼາດສ່ອງໃສ, ຜູ້ນໍາພາສ້າງຕັ້ງພັກປະຊາຊົນ ປະຕິວັດລາວ, ຜູ້ນໍາພາກໍ່ຕັ້ງກອງທັບປະຊາຊົນ ປະຕິວັດລາວ, ຜູ້ນໍາພາສ້າງຕັ້ງແຫ່ງລັດ ປະຊາທິປະໄຕ ປະຊາຊົນລາວ, ຜູ້ນໍາພາພາລະກິດປ່ຽນແປງໃໝ່ຢ່າງມີຫຼັກຂອງພັກ, ພວກເຮົາຈົດຈໍາຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງທ່ານ ແລະ ບັນດາຜູ້ນໍາພັກ-ລັດ, ພະນັກງານ, ສະມາຊິກພັກ, ນັກຮົບປະຕິວັດ, ປະຊາຊົນບັນດາເຜົ່າ ຜູ້ທີ່ເສຍສະຫຼະ ເພື່ອຊາດ ເພື່ອອຸດົມການຂອງຊາດລາວເຮົາ

ດັ່ງທີ່ພວກເຮົາຮັບຮູ້ນໍາກັນແລ້ວວ່າ: ພັກປະຊາຊົນ ປະຕິວັດລາວ ແມ່ນອົງການຈັດຕັ້ງເສນາທິການທາງການເມືອງ, ເປັນກອງນໍາໜ້າ ແລະ ເປັນຕົວແທນແຫ່ງສິດຜົນປະໂຫຍດ ຂອງຊົນຊັ້ນກໍາມະກອນ, ຊາວຜູ້ອອກແຮງງານລາວບັນດາເຜົ່າ, ພັກປະຊາຊົນປະຕິວັດລາວ ໄດ້ນໍາພາປະຊາຊົນລາວບັນດາເຜົ່າ ເຮັດສໍາເລັດພາລະກິດປະຕິວັດປົດປ່ອຍຊາດ, ລຶບລ້າງລະບອບລ່າເມືອງຂຶ້ນ, ສ້າງສັງກາດ ໃໝ່ໃຫ້ແກ່ປະເທດຊາດ.

ຂ່າວ-ພາບ: ເກດສະໜາ ແກ້ວສຸວັນນະແສງ