ພິທີເຊັນສັນຍາສໍາປະທານທີ່ດິນລັດຕາງໜ້າອົງການປົກຄອງແຂວງໂດຍແມ່ນພະແນກແຜນການ ແລະ ການລົງທຶນແຂວງ ແລະ ຝ່າຍຜູ້ລົງທຶນໂດຍແມ່ນ ທະນາຄານພົງສະຫວັນ ຈໍາກັດ ໄດ້ຈັດຂຶ້ນຫວ່າງບໍ່ດົນມານີ້ ຢູ່ທີ່ໂຮງແຮມຣີເວີເຣຍ ເມືອງທ່າແຂກ ແຂວງຄຳມ່ວນ. ໂດຍການໃຫ້ກຽດເຂົ້າຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ທັງເປັນປະທານຄະນະກໍາມະການສົ່ງເສີມການລົງທຶນຂັ້ນແຂວງ (ຄລທຂ) , ທ່ານ ສົມບູນ ພົງສະຫວັນ ປະທານຄະນະສາຂາຫຸ້ນໃຫຍ່ກຸ່ມພົງສະຫວັນ ຈໍາກັດ, ບັນດາພະແນກການທີ່ກ່ຽວຂ້ອງຂັ້ນແຂວງ, ຕາງໜ້າອົງການປົກຄອງເມືອງພ້ອມດ້ວຍບັນດາແຂກທີ່ຖືກເຊີນ ແລະ ພະນັກງານວິຊາການທັງສອງຝ່າຍເຂົ້າຮ່ວມເປັນສັກຂີພິຍານ.

ເປັນກຽດລົງນາມໃນສັນຍາດັ່ງກ່າວຕາງໜ້າອົງການປົກຄອງແຂວງໂດຍແມ່ນ ທ່ານ ເດດສັກດາ ມະນີຄໍາ ຫົວໜ້າພະແນກແຜນການ ແລະ ການລົງທຶນແຂວງ, ຝ່າຍທະນາຄານ ພົງສະຫວັນໂດຍແມ່ນທ່ານ ຈັນເພັງ ຫຼວງສຸວັນນະວົງ ຮອງຜູ້ອໍານວຍການທະນາຄານພົງສະຫວັນ. ໃນການເຊັນສັນຍາຄັ້ງນີ້ແມ່ນບົນພື້ນຖານການຕົກລົງເຫັນດີຂອງທັງສອງຝ່າຍເພື່ອສຶກສາຄວາມເປັນໄດ້ຂອງໂຄງການລວມທັງຂະບວນການອອກແບບຂອງໂຄງການເພື່ອພັດທະນາໂຄງການສໍາປະທານດິນຢູ່ເຂດບ້ານທ່າແຂກເໜືອ, ເມືອງທ່າແຂກໃຫ້ໄປຕາມແຜນຍຸດທະສາດ ແລະ ແຜນພັດທະນາເສດຖະກິດ-ສັງຄົມຂອງແຂວງ ໂດຍສະເພາະຕົວເມືອງທ່າແຂກເພື່ອປະຕິບັດນະໂຍບາຍໃນການນໍາໃຊ້ທີ່ດິນຂອງລັດໃນເຂດດັ່ງກ່າວໃຫ້ກາຍເປັນສູນກາງທາງດ້ານການຄ້າ, ການລົງທຶນ, ການທ່ອງທ່ຽວ ແລະ ສິ່ງອໍານວຍຄວາມສະດວກຕ່າງໆໃຫ້ກັບສັງຄົມພາຍໃນແຂວງ.

ຜ່ານການລົງສໍາຫຼວດ ແລະ ສຶກສາຄວາມເປັນໄປໄດ້ຂອງໂຄງການເຫັນວ່າໂຄງການມີຄວາມເປັນໄປໄດ້ສູງໃນການສ້າງເຂດດັ່ງກ່າວໃຫ້ເປັນສູນກາງທາງດ້ານເສດຖະກິດ ແລະ ການຄ້າຂອງແຂວງ ຊຶ່ງທະນາຄານພົງສະຫວັນ ໄດ້ນໍາສະເໜີຄວາມເປັນໄດ້ຂອງໂຄງການ ແລະ ຜ່ານແບບໃຫ້ກັບພະແນກການທີ່ກ່ຽວຂ້ອງຂອງແຂວງໃນວັນທີ 21 ກັນຍາ 2022. ຈາກນັ້ນຈຶ່ງມີຂໍ້ຕົກລົງຂອງທ່ານເຈົ້າແຂວງຄໍາມ່ວນ ສະບັບເລກທີ 063/ຄລທຂ, ລົງວັນທີ 31 ຕຸລາ 2022 ໄດ້ອະນຸມັດໃຫ້ທະນາຄານພົງສະຫວັນ ເຊັນສັນຍາສໍາປະທານທີ່ດິນໃນເນື້ອທີ່ 11.177 ຕາແມັດ ໂດຍມີອາຍຸສໍາປະທານ 50 ປີ ເລີ່ມແຕ່ມື້ເຊັນສັນຍາເປັນຕົ້ນໄປ ແລະ ຈະໄດ້ມີການທົບທວນໃນການຕໍ່ສັນຍາອີກຄັ້ງພາຍຫຼັງຄົບອາຍຸສັນຍາ.

ສໍາລັບແຜນພັດທະນາໂຄງການຢູ່ເຂດດັ່ງກ່າວທະນາຄານພົງສະຫວັນ ໄດ້ແບ່ງການພັດທະນາອອກເປັນ 3 ໄລຍະຄື: ໄລຍະທີ 1 ແມ່ນການປັບໜ້າດິນເພື່ອກໍ່ສ້າງອາຄານສາຂາທະນາຄານພົງສະຫວັນ, ຕິດຕັ້ງຢ້າຍ ແລະ ສ້າງບ່ອນຈອດລົດ; ໄລຍະທີ 2 ແມ່ນກໍ່ສ້າງສູນການຄ້າພ້ອມດ້ວຍຫ້ອງປະຊຸມ, ຮ້ານອາຫານ, ຕະຫຼາດກາງຄືນ, ບ່ອນຍ່າງຫຼິ້ນ ແລະ ບ່ອນນັ່ງຫຼິ້ນ; ສ່ວນໄລຍະທີ 3 ຈະກໍ່ສ້າງໂຮງແຮມລະດັບສາມດາວ.

ທະນາຄານພົງສະຫວັນ ໄດ້ຮັບການສ້ງຂຶ້ນໃນວັນທີ 29 ມີນາ 2007 ເປັນທະນາຄານເອກະຊົນແຫ່ງທໍາອິດຂອງ ສປປ ລາວ ໂດຍແມ່ນຄົນລາວເປັນເຈົ້າຂອງ ຊຶ່ງເປົ້າໝາຍຂອງການສ້າງຕັ້ງທະນາຄານພົງສະຫວັນ ແມ່ນເພື່ອປະກອບສ່ວນທາງດ້ານທຶນຮອນເຂົ້າໃນການພັດທະນາເສດຖະກິດ-ສັງຄົມຕາມແນວທາງນະໂຍບາຍຂອງພັກ-ລັດວາງອອກ ແລະ ສ້າງໃຫ້ມີລະບົບການບໍລິການທາງດ້ານການເງິນ, ການທະນາຄານທີ່ມີຄວາມຫຼາກຫຼາຍເຮັດໃຫ້ຄົນລາວໄດ້ຮັບຜົນປະໂຫຍດສູງສຸດຈາກການບໍລິການດັ່ງກ່າວ. ປັດຈຸບັນລະບົບທະນາຄານໄດ້ຮັບການພັດທະນາຢ່າງຮອບດ້ານ, ເຂັ້ມແຂງ ແລະ ໜັກແໜ້ນເປັນຕົ້ນດ້ານບຸກຄະລາກອນ, ເຕັກໂນໂລຊີ, ມີຫຼາຍຜະລິດຕະພັນ ແລະ ເຄື່ອງມືໃຫ້ເລືອກໃຊ້ບໍລິການເຊັ່ນ : ເງິນກູ້, ເງິນຝາກ, ດອກເບ້ຍ, ບໍລິຫານທຶນ, ອັດຕາແລກປ່ຽນ, ຕູ້ ATM, ບັດ MASTER CARD ແລະ ອື່ນໆ. ທະນາຄານພົງສະຫວັນມີສໍານັກງານໃຫຍ່ຕັ້ງຢູ່ ນະຄອນຫຼວງວຽງຈັນ, ປະກອບມີ 4 ສາຂາ, 46 ໜ່ວຍບໍລິການ, ຕູ້ ATM ຈໍານວນ 100 ກວ່າເຄື່ອງ ແລະ ມີພະນັກງານທັງໝົດ 800 ກວ່າຄົນທົ່ວລະບົບ. ນອກຈາກນັ້ນຍັງມີການບໍລິການຜະລິດຕະພັນທາງດ້ານການເງິນຜ່ານຊ່ອງທາງມືຖືເພື່ອອໍານວຍຄວາມສະດວກໃຫ້ລູກຄ້າໃນການເຮັດທຸລະກໍາທາງດ້ານການເງິນເຊັ່ນ: ການໂອນເງິນ, ການຊໍາລະຄ່າໄຟຟ້າ, ນໍ້າປະປາ, ຕື່ມບັດໂທລະສັບ, ການຂໍສິນເຊື່ອ, ໄລ່ເງິນເດືອນ ແລະ ທຸລະກໍາອື່ນໆໃຫ້ລູກຄ້າໄດ້ເຂົ້າເຖິງການບໍລິການທີ່ສະດວກສະບາຍ.

ຂ່າວ-ພາບ: ແດງສະຫວັດ ແສນພານິດ