ວັນທີ 21 ມີນາ ນີ້, ກອງພັນໃຫຍ່ 202 ຂຶ້ນກັບກອງພົນທີ 2 ໄດ້ຈັດພິທີປາຖະກະຖາມູນເຊື້ອ 2 ວັນປະຫວັດສາດຄື: ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ (22/3/1955-22/3/2023) ແລະ ວັນຄຽດແຄ້ນຂອງປະຊາຊົນລາວ ຄົບຮອບ 77 ປີ (21/3/1946-21/3/2023), ໂດຍການເປັນປະທານຂອງ ສະຫາຍ ພັທ ອູ່ທອງ ມະໂນລາດ ຄະນະພັກ ຫົວໜ້າພະແນກການເມືອງ ກອງພັນໃຫຍ່ 202, ມີຄະນະພັກ,ຄະນະບັນຊາຈາກພະແນກການ, ກົມກອງ ພ້ອມດ້ວຍພະນັກງານເຂົ້າຮ່ວມຮັບຟັງ.

ໃນພິທີ, ໄດ້ທົບທວນຫວນຄືນປະຫວັດສາດຄວາມເປັນມາ, ມູນເຊື້ອຕົ້ນກຳເນີດຂອງພັກປະຊາຊົນປະຕິວັດລາວໃນໄລຍະຜ່ານມາ ຊຶ່ງມູນເຊື້ອການຕໍ່ສູ້ຕີເອົາຊະນະຈັກກະພັດຕ່າງດ້າວຜູ້ຮຸກຮານ, ມູນເຊື້ອໃນການປົກປັກຮັກສາ ແລະ ສ້າງສາພັດທະນາປະເທດຊາດ, ຜົນສຳເລັດແຫ່ງການຊີ້ນຳ-ນຳພາຂອງພັກປະຊາຊົນປະຕິວັດລາວ ພາຍຫຼັງພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນ ກໍໄດ້ປະເຊີນໜ້າກັບພວກລ່າເມືອງຂຶ້ນຝຣັ່ງ ແລະ ຈັກກະພັດອາເມຣິກາ, ພັກເຮົາໄດ້ແບກຫາບເອົາພາລະກຳອັນໜັກໜ່ວງ ເພື່ອຊີ້ນຳ-ນຳພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດ ແລະ ລູກແຫຼ່ງຕີນມືປະຕິການຂາຍຊາດຢ່າງດຸເດືອດຂ້ຽວຂາດເຕັມໄປດ້ວຍຄວາມເສຍສະຫຼະກ້າວໄປເຖິງການປົດປ່ອຍປະເທດຊາດຢ່າງສົມບູນໃນປີ 1975 ແລະ ສ້າງສາພັດທະນາຢ່າງມີໝາກຜົນເປັນແຕ່ລະໄລຍະ, ນັບແຕ່ການຕໍ່ສູ້ປົດປ່ອຍຊາດ, ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ, ການຈັດຕັ້ງປະຕິບັດແນວທາງປ່ຽນແປງໃໝ່ ຕະຫຼອດ 68 ປີຜ່ານມາ ພັກປະຊາຊົນ ປະຕິວັດລາວ ໄດ້ເອົາໃຈໃສ່ຊີ້ນຳ-ນຳພາກອງທັບເຮົາດ້ວຍຄວາມເດັດດ່ຽວ, ສະຫຼຽວສະຫຼາດສ່ອງໃສ, ສ້າງກອງທັບໃຫ້ມີຄວາມເຕີບໃຫຍ່ເຂັ້ມແຂງໃນທຸກດ້ານເປັນກ້າວໆມາ. ຈາກນັ້ນ, ຍັງໄດ້ຍົກໃຫ້ເຫັນເຖິງສະພາບການ ແລະ ການຕໍ່ສູ້ຕ້ານພວກລ່າເມືອງຂຶ້ນຝຣັ່ງທີ່ເຂົ້າມາຮຸກຮານລາວໂດຍສະເພາະແມ່ນຕົວເມືອງທ່າແຂກຂອງທະຫານ ແລະ ປະຊາຊົນເມືອງທ່າແຂກ.

ທັງນີ້, ກໍເພື່ອແນໃສ່ເຮັດໃຫ້ຄະນະພັກ-ຄະນະບັນຊາ, ພະນັກງານ-ນັກຮົບພາຍໃນກົມກອງໄດ້ຮັບຮູ້ເຂົ້າໃຈແຈ້ງຕໍ່ທາດແທ້ມູນເຊື້ອອັນດີງາມ ແລະ ວິລະກຳອັນລ້ຳເລີດຂອງພັກ ເພື່ອພ້ອມກັນສືບຕໍ່ເສີມຂະຫຍາຍມູນເຊື້ອດັ່ງກ່າວ ແລະ ນຳໃຊ້ເຂົ້າໃນໜ້າທີ່ວຽກງານຂອງຕົນໃຫ້ສຳເລັດຜົນເປັນຢ່າງດີ.

(ຂ່າວ-ພາບ: ຮ້ອຍຕີ ຄຳຊາຍ ກ່ວາງຄຸນສີ)