ຄະນະຊາວໜຸ່ມປະຊາຊົນ ປະຕິວັດລາວ ເມືອງສະມັກຄີໄຊ ແຂວງອັດຕະປື ໄດ້ຈັດພິທີປະກາດເປັນເມືອງ 4 ບຸກ ແລະ 3 ດີ 4 ຮູ້ ປະຈໍາປີ 2022 ສະໄໝທີ VIII ຂຶ້ນເມື່ອບໍ່ດົນມານີ້ ທີ່ຫ້ອງປະຊຸມ ຫ້ອງວ່າການປົກຄອງເມືອງ, ໂດຍການເຂົ້າຮ່ວມເປັນປະທານຂອງ ສະຫາຍ ເພັດມີໄຊ ຄໍາພັກດີ ຄະນະປະຈໍາພັກແຂວງ ເລຂາພັກເມືອງ ເຈົ້າເມືອງສາມັກຄີໄຊ, ມີສະຫາຍ ໄຊລະຄອນ ອິນທິວົງ ຮອງເລຂາຄະນະບໍລິຫານງານຊາວໜຸ່ມແຂວງ, ສະຫາຍ ຫັດອານົງ ຂາວມີໄຊ ກໍາມະການພັກເມືອງ ຄະນະບໍລິຫານງານຊາວໜຸ່ມແຂວງ ເລຂາຄະນະບໍລິຫານງານຊາວໜຸ່ມເມືອງ, ມີແຂກຖືກເຊີນ ແລະ ຊາວໜຸ່ມ-ເຍົາວະຊົນ ຈາກບັນດາໂຮງຮຽນອ້ອມຂ້າງເມືອງເຂົ້າຮ່ວມ.

ໃນພິທີໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ ແລະ 3 ດີ 4 ຮູ້ ຂອງເຍົາວະຊົນທັນວາ ປະຈໍາປີ 2022. ເມືອງສາມັກຄີໄຊ ມີໜ່ວຍຊາວໜຸ່ມທັງໝົດ 55 ໜ່ວຍ, ໜ່ວຍອ້ອມຂ້າງເມືອງມີ 16 ໜ່ວຍ, ໜ່ວຍໂຮງຮຽນມັດທະຍົມມີ 11 ໜ່ວຍ, ຊາວໜຸ່ມບ້ານ 28 ໜ່ວຍ, ມີກອງຊາວໜຸ່ມອາສາສະໝັກຕະລຸມບອນ 3 ກອງ ມີສະມາຊິກ 160 ສະຫາຍ ຍິງ 40 ສະຫາຍ, ມີກອງເຍົາວະຊົນທັນວາ 37 ກອງ, ມີເຍົາວະຊົນທີ່ມີອາຍຸ 9 ຫາ 14 ປີ ທັງໝົດ 3.272 ຄົນ ຍິງ 1.656 ຄົນ, ມີເຍົາວະຊົນທັນວາ 2.813 ຄົນ ຍິງ 1.457 ຄົນ, ເຍົາວະຊົນຂະຫຍາຍໃໝ່ 643 ຄົນ, ຍິງ 301 ຄົນ. ໃນ 37 ກອງ ໄດ້ແບ່ງອອກເປັນ 133 ໝວດ ມີ 401 ໝູ່, ມີກອງ 3 ດີ 4 ຮູ້ ຂອງກອງເທົ່າກັບ 78,37% ຂອງຈໍານວນກອງທັງໝົດໃນທົ່ວເມືອງ, ມີກອງນໍາໜ້າຈໍານວນ 20 ກອງ.

ຕະຫຼອດໄລຍະ 1 ປີ ຜ່ານມາ, ຄະນະຊາວໜຸ່ມເມືອງ ທຸກຂັ້ນ ໄດ້ເອົາໃຈໃສ່ຊຸກຍູ້ ສະມາຊິກຊາວໜຸ່ມ-ເຍົາວະຊົນ ພາຍໃນເມືອງ ດ້ວຍຫຼາຍຮູບການ ໂດຍສະເພາະກໍແມ່ນການເອົາໃຈໃສ່ໃນການສຶກສາອົບຮົມການເມືອງ ນໍາພາແນວຄິດ ຢ່າງເປັນປົກກະຕິ ແລະ ຕໍ່ເນື່ອງ ເພື່ອສ້າງໃຫ້ສະມາຊິກຊາວໜຸ່ມ-ເຍົາວະຊົນ ມີນໍ້າໃຈຮັກຊາດ, ຮັກບ້ານເກີດເມືອງນອນ, ເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມຫ້າວຫັນຕື່ນຕົວສະໝັກໃຈຢູ່ສະເໝີໃນການປະກອບສ່ວນເຂົ້າໃນພາລະກິດປະຕິວັດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດ.

ໃນພິທີຍັງໄດ້ມອບໃບຢັ້ງຢືນ 4 ບຸກ ຂອງຊາວໜຸ່ມ ແລະ 3 ດີ 4 ຮູ້ ຂອງເຍົາວະຊົນ ໃຫ້ແກ່ຄະນະຊາວໜຸ່ມປະຊາຊົນ ປະຕິວັດລາວ ພ້ອມທັງຕີຄ້ອງ ເປີດປ້າຍປະກາດໃຫ້ ເມືອງສາມັກຄີໄຊ ກາຍເປັນເມືອງ 4 ບຸກ ແລະ 3 ດີ 4 ຮູ້ ປະຈໍາປີ 2022.

(ຂ່າວ-ພາບ: ແສງສຸວັນ).