ເນື່ອງໃນໂອກາດວັນສ້າງພັກປະຊາຊົນ ປະຕິວັດລາວ ຄົບຮອບ 68 ປີ (ວັນທີ 22 ມີນາ 1955-22 ມີນາ 2023) ໄດ້ໝູນວຽນມາອີກວາລະໜຶ່ງ ສະຫາຍ ນາງ ວະໄລລັກ ອະໄພ ຫົວໜ້າສູນຂໍ້ມູນຂ່າວສານການເມືອງ ແລະ ການປົກຄອງ ສະຖາບັນການເມືອງການປົກຄອງແຫ່ງຊາດ (ສມປຊ) ໄດ້ກ່າວວ່າ: ຂ້າພະເຈົ້າ ຮູ້ສຶກປື້ມປິຕິຍິນດີເປັນຢ່າງຍິ່ງ ທີ່ເຫັນໄດ້ການເຕີບໃຫຍ່ຂະຫຍາຍຕົວຂອງພັກເຮົາ, ຊຶ່ງກ່ອນໜ້ານີ້ 68 ປີ ປະເທດຊາດ ແລະ ປະຊາຊົນຂອງພວກເຮົາ ຍັງຕົກຢູ່ພາຍໃຕ້ລະບອບລ່າເມືອງຂຶ້ນ ແລະ ລະບອບສັກດິນາທີ່ຫຼ້າສະໄໝ ເຮັດໃຫ້ປະເທດຊາດຂອງພວກເຮົາຕົກຢູ່ພາຍໃຕ້ການບົງການທາງການເມືອງຈາກພາຍນອກ, ຂາດຄວາມເປັນເອກະລາດ ທີ່ຄົນພາຍໃນຊາດຕ້ອງກໍານົດຊາຕາກໍາຂອງຊາດຕົນ ເຮັດໃຫ້ປະຊາຊົນລາວ ບັນດາເຜົ່າຂາດຄວາມເປັນເຈົ້າຂອງປະເທດຊາດ.

ຕໍ່ກັບສະພາບການທີ່ບ້ານເມືອງກໍາລັງຕົກຢູ່ໃນຄວາມມືດມົນຢູ່ນັ້ນ, ໂດຍໄດ້ຮັບແສງສະຫວ່າງຈາກລັດທິມາກ-ເລນິນ ທີ່ປະທານໂຮ່ຈິມິນ ໄດ້ນໍາເຂົ້າມາ, ພັກປະຊາຊົນລາວ (ພັກປະຊາຊົນ ປະຕິວັດລາວ ໃນປັດຈຸບັນ) ກໍໄດ້ຮັບການສ້າງຕັ້ງຂຶ້ນ ໂດຍສືບທອດພາລະກິດຈາກພັກກອມມູນິດອິນດູຈີນ ຊຶ່ງແມ່ນພັກການເມືອງທີ່ກ້າວໜ້າແຫ່ງຍຸກສະໄໝຂອງຊົນຊັ້ນກໍາມະກອນ, ເປັນພັກການເມືອງທີ່ປະກອບສ້າງສະຕິປັນຍາ ແລະ ແສງສະຫວ່າງທາງຈິດວິນຍານໃຫ້ກັບຊົນຊັ້ນກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າໃຫ້ມີຄວາມຕື່ນຕົວທາງການເມືອງ.

ນັບແຕ່ມື້ພັກໄດ້ຮັບການສ້າງຕັ້ງຂຶ້ນມາ ພັກເຮົາໄດ້ນໍາເອົາຄວາມມຸ່ງມາດປາຖະໜາຂອງປະຊາຊົນລາວບັນດາເຜົ່າ ແລະ ກົດເກນວິທະຍາສາດແຫ່ງຍຸກສະໄໝ ມາບູລະນະເປັນແນວທາງການເມືອງຂອງພັກ, ເມື່ອພັກເຮົາໄດ້ມີແນວທາງການເມືອງອັນຖືກຕ້ອງ ສອດຄ່ອງກັບຄວາມມຸ່ງມາດປາຖະນາ ແລະ ແນວຄິດຈິດໃຈຂອງປະຊາຊົນລາວບັນດາເຜົ່າຄືແນວນີ້ແລ້ວ ພັກເຮົາໄດ້ເຕີບໃຫຍ່, ຂະຫຍາຍຕົວ ແລະ ເຂັ້ມແຂງ ຈົນສາມາດນໍາພາປວງຊົນລາວປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາ ສະທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ຊຶ່ງໄດ້ນໍາເອົາຄວາມເປັນເອກະລາດແຫ່ງຊາດ ແລະ ຄວາມເປັນເຈົ້າຂອງປະເທດຊາດຢ່າງແທ້ຈິງມາສູ່ປະຊາຊົນລາວບັນດາເຜົ່າ.

ເມື່ອປົດປ່ອຍປະເທດຊາດສໍາເລັດແລ້ວ ພັກເຮົາໃນຖານະພັກກໍາອໍານາດໃນລະບອບປະຊາທິປະໄຕປະຊາຊົນ ໄດ້ນໍາພາປະຊາຊົນລາວບັນດາເຜົ່າປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ຊຶ່ງພັກເຮົາໄດ້ປະເຊີນໜ້າກັບສິ່ງທ້າທາຍທົດສອບ ຫຼາຍອັນພັນແນວ ເປັນຕົ້ນແມ່ນກໍາລັງການຜະລິດຫຼ້າຫຼັງ, ປະຖົມປະຖານ ພື້ນຖານການຜະລິດຍັງອ່ອນນ້ອຍ ບວກກັບພວກອິດທິກໍາລັງປໍລະປັກຍັງສືບຕໍ່ປະຕິບັດກົນອຸບາຍທີ່ຫວັງມ້າງເພທຳລາຍລະບອບໃໝ່ຂອງພວກເຮົາ, ພັກເຮົາໄດ້ມີໄຫວພິບການນໍາພາ ໂດຍໄດ້ນໍາພາປ່ຽນແປງໃໝ່ທີ່ມີຫຼັກການຂອງພັກ, ເປີດກວ້າງການຮ່ວມມືກັບທຸກປະເທດໃນພາກພື້ນ ແລະ ໃນໂລກ ບົນພື້ນຖານຫຼັກການຢູ່ຮ່ວມກັນໂດຍສັນຕິ: ສັນຕິພາບ, ເອກະລາດ, ມິດຕະພາບ, ການຮ່ວມມືແບບສະເໝີຕົ້ນສະເໝີປາຍ ຕ່າງຝ່າຍຕ່າງມີປະໂຫຍດ. ຕະຫຼອດໄລຍະ 68 ປີ ທີ່ຜ່ານມາພັກເຮົາ ໄດ້ນໍາເອົາຄວາມເປັນເອກະລາດມາສູ່ປະເທດຊາດ, ສ້າງໃຫ້ປະເທດຊາດເຮົາມີຄວາມສະຫງົບ, ປະຊາຊົນຍູ່ຖ່າງທຳມາຫາກິນ ແລະ ສ້າງສາບ້ານຊ່ອງຂອງຕົນ, ຖານະບົດບາດຂອງປະເທດເຮົາໄດ້ຮັບການຍອມຮັບ, ຍົກສູງໃນເວທີສາກົນ ແລະ ມີເພື່ອນມິດເພີ່ມຂຶ້ນຢ່າງບໍ່ຢຸດຢັ້ງ. ອັນນັ້ນ, ມັນໄດ້ສ້າງຄວາມເອກອ້າງທະນົງໃຈໃຫ້ພວກເຮົາທີ່ມີພັກນໍາພາເຕົ້າໂຮມຄວາມສາມັກຄີປະຊາຊົນລາວບັນດາເຜົ່າໃຫ້ເປັນປຶກແຜ່ນແໜ້ນໜາ ກາຍເປັນກໍາລັງແຮງສັງລວມຂອງຊາດ.

ໃນປັດຈຸບັນ, ສະພາບການໃນພາກພື້ນ ແລະ ໃນໂລກກໍາລັງປະເຊີນໜ້າກັບສິ່ງທ້າທາຍທົດສອບຫຼາຍສິ່ງ ຫຼາຍຢ່າງ ເປັນຕົ້ນແມ່ນບັນຫາທາງດ້ານເສດຖະກິດ, ພະຍາດລະບາດ, ຄວາມຂັດແຍ່ງທາງດ້ານການເມືອງໃນໂລກ ແລະ ພາກພື້ນ, ການຂົ່ມຂູ່ທາງດ້ານການທະຫານ ແລະ ມີການປະທະກັນໃນບາງຂົງເຂດໃນໂລກ, ແຕ່ປະເທດຊາດຂອງພວກເຮົາຍັງມີສະຫງົບ, ການພົວພັນຮ່ວມມືໃນພາກພື້ນ ແລະ ໃນໂລກເປັນປົກກະຕິ, ການໄປມາຫາສູ່ ແລະ ຄ້າຂາຍກັບປະເທດອ້ອມຂ້າງທີ່ຊາຍແດນຕິດຈອດກັບປະເທດເຮົານັບມື້ນັບຍິ່ງຂະຫຍາຍຕົວຂຶ້ນ.

ສິ່ງເຫຼົ່ານີ້ບໍ່ແມ່ນສິ່ງບັງເອີນ, ບໍ່ແມ່ນສິ່ງທີ່ເກີດຂຶ້ນຕາມທໍາມະຊາດ ແຕ່ຫາກເກີດຂຶ້ນຍ້ອນມີການນໍາພາທີ່ດີ ບໍລິຫານຈັດການທີ່ດີ ມີຄວາມສະຫຼາດສ່ອງໃສ, ມີໄຫວພິບໃນການນໍາພາ, ພັກເຮົາເດັດຂາດບໍ່ນໍາພາປະເທດຊາດ ແລະ ປະຊາຊົນ ເຂົ້າສູ່ພາວະທີ່ສ່ຽງໄພ ສິ່ງເຫຼົ່ານີ້, ເຮັດໃຫ້ປະຊາຊົນປື້ມປິຕິ ແລະ ຕື້ນຕັນໃຈຕໍ່ພັກທີ່ເຮັດພາລະບົດບາດຂອງຕົນໃນການນໍາພາປະເທດຊາດ ແລະ ປະຊາຊົນເຕີບໃຫຍ່ເຂັ້ມແຂງຂຶ້ນເລື້ອຍໆ.

ຂ້າພະເຈົ້າ ຂໍອວຍພອນໃຫ້ພັກເຮົາຈົ່ງເຕີບໃຫຍ່ເຂັ້ມແຂງ ແບກຫາບພາລະໜ້າທີ່ອັນໜັກໜ່ວງໃຫ້ບັນລຸຜົນ, ຂໍອວຍພອນການນໍາພັກ-ລັດ ຈົ່ງມີພະລານາໄມທີ່ສົມບູນ, ສືບຕໍ່ນໍາພາປະຕິບັດແນວທາງຂອງພັກໃຫ້ບັນລຸຜົນສໍາເລັດຍິ່ງໆຂຶ້ນ.