ໃນວັນທີ 21 ມີນາ ຜ່ານມາ ທີ່ໂຮງໝໍມິດຕະພາບ ໄດ້ຈັດພິທີມອບ-ຮັບລົດສຸກເສີນ (Ambulance) 1 ຄັນມູນຄ່າ 60.000 ໂດລາ ໃຫ້ແກ່ໂຮງໝໍມິດຕະພາບ ເພື່ອນໍາໃຊ້ໃນການນໍາສົ່ງຄົນເຈັບສຸກເສີນ, ເປັນກຽດກ່າວມອບໂດຍທ່ານ ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດ (ສນຊ), ເຂົ້າຮ່ວມເປັນກຽດມີທ່ານ ອ໋ອດ ພົງສະຫວັນ ຮອງປະທານ ສນຊ (ບໍ່ປະຈໍາການ) ພ້ອມດ້ວຍຄະນະ, ກ່າວຮັບໂດຍທ່ານ ສອນໄຊ ລາດຊະວົງ ຄະນະພັກກະຊວງສາທາລະນະສຸກ ຜູ້ອໍານວຍການໂຮງໝໍມິດຕະພາບ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.

ໂອກາດນີ້, ທ່ານ ສອນໄຊ ລາດຊະວົງ ໄດ້ສະແດງຄວາມຂອບໃຈເປັນຢ່າງຍິ່ງ ຕໍ່ຄະນະນໍາສູນກາງແນວລາວສ້າງຊາດ ທີ່ນຳລົດມາມອບໃຫ້ໂຮງໝໍມິດຕະພາບໃນຄັ້ງນີ້ ເພື່ອນໍາໃຊ້ເຂົ້າໃນວຽກງານສາທາລະນະສຸກ. ໂດຍການສະໜັບສະໜູນຈາກບໍລິສັດ ຊີເຄແອວ ໄທກຼຸບ (CKL Group Thailand).

ຂ່າວ-ພາບ: ສຸວັນລີ