ຂ່າວຕ່າງປະເທດລາຍງານໃນວັນທີ 22 ມີນາ ຜ່ານມາ, ທ່ານ ໂພນ ອາຕັງກາ ເອຍຈີ ລັດຖະມົນຕີກະຊວງຄຸ້ມຄອງທີ່ດິນກາເມີຣູນ ກ່າວວ່າ: ໄດ້ຮຽກຮ້ອງໃຫ້ອຳນາດການປົກຄອງເອົາໃຈໃສ່ຄຸ້ມຄອງສານເຄມີທີ່ເປັນອັນຕະລາຍໃຫ້ດີທີ່ສຸດ ທັງຮັບປະກັນໃຫ້ສະຖານທີ່ເຮັດວຽກຮັບປະກັນຄວາມປອດໄພຫຼັງຈາກໂຮງງານເຫຼັກກ້າລະເບີດເຮັດໃຫ້ມີຜູ້ບາດເຈັບ 19 ຄົນ.

ເຫດລະເບີດເກີດຂຶ້ນພາຍໃນເຕົາຫຼອມໂລຫະຂອງບໍລິສັດເຫຼັກ ອາເຊໂຮ ເມຕານ ຊານ ທີ່ຕັ້ງຢູ່

ສູນກາງການຄ້າທີ່ເມືອງດູອານລາ ຊຶ່ງເຮັດໃຫ້ໄຟລຸກໄໝ້ຂຶ້ນຢ່າງໄວວາ. ທ່ານລັດຖະມົນຕີກ່າວໃນລະຫວ່າງການຢ້ຽມຢາມໂຮງງານວ່າ: ການລະເບີດໄດ້ເຮັດໃຫ້ມີຜູ້ບາດເຈັບ 19 ຄົນ, ນີ້ແມ່ນເຫດການທີ່ຮ້າຍແຮງ ແຕ່ແພດໝໍກໍ່ໄດ້ເອົາໃຈໃສ່ປິ່ນປົວເຂົາເຈົ້າ ແລະ ລັດຖະບານເອງກໍຈະໃຫ້ການຊ່ວຍເຫຼືອໂຮງງານເຊັ່ນກັນ.

ທ່ານ ດູດ ສຸຈິດ ຜູ້ອຳນວຍການໃຫຍ່ໂຮງງານດັ່ງກ່າວເວົ້າວ່າ: ພວກເຮົາຈະປັບປຸງມາດຕະການກ່ຽວກັບຄວາມປອດໄພທັນທີທີ່ຍາມໃດໂຮງງານເປີດເຮັດວຽກອີກຄັ້ງໜຶ່ງ. ພວກເຮົາຈະເອົາໃຈໃສ່ດ້ານຄວາມປອດໄພຂອງກຳມະກອນພວກເຮົາ. ສ່ວນສາເຫດຂອງການລະເບີດຍັງຢູ່ໃນໄລຍະການສືບສວນຢູ່.