ກອງປະຊຸມສາມັນຄົບຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ (ສຊປລ) ຄັ້ງທີ 4 ສະໄໝທີ VIII ເປີດຂຶ້ນຢ່າງເປັນທາງການ ໃນວັນທີ 23 ມີນາ ນີ້ ທີ່ຫ້ອງປະຊຸມຫ້ອງວ່າການແຂວງອຸດົມໄຊ ໂດຍການເປັນປະທານຂອງ ສະຫາຍ ມອນໄຊ ລາວມົວຊົ່ງ ກຳມະການສຳຮອງສູນກາງພັກ ເລຂາຄະນະບໍລິຫານງານ ສຊປລ, ເປັນກຽດເຂົ້າຮ່ວມມີ ສະຫາຍ ບຸນຄົງ ຫຼ້າຈຽມພອນ ກຳມະການສຳຮອງ ສູນກາງພັກ ເລຂາພັກແຂວງ ເຈົ້າແຂວງອຸດົມໄຊ, ມີແຂກຖືກເຊີນ ແລະ ພາກສ່ວນກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມຄັ້ງນີ້, ເພື່ອເປັນການສະຫຼຸບຕີລາຄາການເຄື່ອນໄຫວວຽກງານຂອງຄະນະບໍລິຫານງານຊາວໜຸ່ມທົ່ວປະເທດໃນໄລຍະຜ່ານມາ, ດ້ານດີ, ດ້ານອ່ອນ, ຜົນງານ ແລະ ບົດຮຽນທີ່ຖອດຖອນໄດ້, ພ້ອມທັງຜ່ານທິດທາງແຜນການໃນຕໍ່ໜ້າ. ໃນກອງປະຊຸມ, ບັນດາຜູ້ແທນເຂົ້າໄດ້ຮັບຟັງການສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານ ສຊປລ ຄັ້ງທີ 3 ສະໄໝທີ 8, ບົດສະຫຼຸບຕີລາຄາການຈັດຕັ້ງປະຕິບັດ 2 ວາລະແຫ່ງຊາດ ໃນຂົງເຂດຄະນະຊາວໜຸ່ມ ປະຊາຊົນປະຕິວັດລາວ (ຄຊປປ ລາວ), ບົດສຳຫຼວດການນຳພາລວມຂອງຂອງຄະນະບໍລິຫານງານ ສູນກາງຊາວ ໜຸ່ມປະຊາຊົນ ປະຕິວັດລາວໃນ 1 ປີຜ່ານມາ, ພ້ອມນັ້ນກໍຈະໄດ້ທາບທາມ ແລະ ຮັບຮອງເອົາກຳມະການ ຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ ສະໄໝທີ 8 ທີ່ວາງລົງ.

ໃນໂອກາດນີ້, ສະຫາຍ ບຸນຄົງ ຫຼ້າຈຽມພອນ ໄດ້ສະເໜີໂດຍຫຍໍ້ກ່ຽວກັບສະພາບລວມຂອງແຂວງອຸດົມໄຊ ໂດຍສະເພາະແມ່ນດ້ານທ່າແຮງ, ທີ່ຕັ້ງພູມສັນຖານ, ສະຖານທີ່ທ່ອງທ່ຽວ, ຖະໜົນຫົນທາງໃນການໄປ-ມາ ໄດ້ສະດວກສະບາຍ, ພ້ອມດຽວກັນ ສະຫາຍ ມອນໄຊ ລາວມົວຊົ່ງ ໄດ້ໂອ້ລົມ ຕໍ່ກອງປະຊຸມວ່າ: ກອງປະຊຸມຄັ້ງນີ້ສຸດທີ່ມີຄວາມໝາຍຄວາມສໍາຄັນຫຼາຍ ທີ່ຈະໄດ້ຄົ້ນຄວ້ານໍາສະເໜີບັນດາວຽກງານຕ່າງໆ ຊຶ່ງເປັນວຽກງານທີ່ສຳຄັນພື້ນຖານທີ່ພວກເຮົາຈະໄດ້ພ້ອມກັນຕີລາຄາໝາກຜົນໃນການຈັດຕັ້ງປະຕິບັດໃນໄລຍະຜ່ານມາ ແລະ ພ້ອມກັນວາງທິດທາງແຜນການຈຸດສຸມທີ່ສຳຄັນເພື່ອແກ້ໄຂໃຫ້ໄດ້ຮັບດີກ່ວາເກົ່າ.

(ຂ່າວ: ແສງອາທິດ)