ຫ້ອງການສາທາລະນະສຸກ ເມືອງໄຊຍະບູລີ ແຂວງໄຊຍະບູລີ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດການສະກັດກັ້ນ ແລະ ຄວບຄຸມໄຂ້ຍຸງລາຍ ປີ 2022 ແລະ ວາງທິດທາງແຜນການ ປີ 2023 ຂຶ້ນໃນວັນທີ 23 ມີນາ ນີ້ ທີ່ຫ້ອງປະຊຸມພະແນກສາທາລະນະສຸກແຂວງ ໂດຍການເປັນປະທານຂອງທ່ານ ນາງ ພິລາວັນ ອົງແກ້ວ ຄະນະປະຈໍາພັກເມືອງ ຮອງເຈົ້າເມືອງໄຊຍະບູລີ ຜູ້ຊີ້ນໍາວຽກງານຂົງເຂດວັດທະນະທຳ-ສັງຄົມ ທັງເປັນຫົວໜ້າຄະນະກຳມະການຕ້ານ ແລະ ຄວບຄຸມໄຂ້ຍຸງລາຍຂັ້ນເມືອງ ແລະ ພາກສ່ວນກ່ຽວຂ້ອງພາຍໃນເມືອງເຂົ້າຮ່ວມຢ່າງພ້ອມພຽງ.

ໃນກອງປະຊຸມ, ທ່ານ ພັນ ພອນສະຫວັດ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງ ໄດ້ລາຍງານສະພາບການຈັດຕັ້ງປະຕິບັດການຕ້ານ ແລະ ຄວບຄຸມພະຍາດໄຂ້ຍຸງລາຍໃນໄລຍະປີ 2022 ຜ່ານມາ ແລະ ທິດທາງແຜນການສືບຕໍ່ໃນ ປີ 2023 ທ່ານໃຫ້ຮູ້ວ່າ: ໃນໄລຍະ ປີ 2022 ຜ່ານມາ ຄະນະພັກ, ອົງການປົກຄອງເມືອງ ໂດຍສະເພາະຄະນະກໍາມະການຕ້ານ ແລະ ຄວບຄຸມພະຍາດໄຂ້ຍຸງລາຍຂັ້ນເມືອງ ໄດ້ສຸມໃສ່ຊີ້ນໍາ, ນໍາພາຈັດຕັ້ງປະຕິບັດແຜນການວາງໄວ້ ມີຜົນສໍາເລັດຫຼາຍດ້ານ, ສຸມໃສ່ໂຄສະນາສຸຂະສຶກສາປະຕິບັດ 5 ປ ຢູ່ແຕ່ລະບ້ານ, ສໍານັກງານ, ອົງການ ແລະ ສຸມໃສ່ຕອບໂຕ້ເວລາມີການລະບາດເກີດຂຶ້ນຫຼາຍຄັ້ງ ເຮັດໃຫ້ສາມາດຄວບຄຸມບໍ່ໃຫ້ມີການລະບາດກວ້າງຂວາງ ດ້ານວິຊາການກໍໄດ້ປະສານສົມທົບກັບພະແນກສາທາລະນະສຸກແຂວງ, ໂຮງໝໍແຂວງໄຊຍະບູລີ ອົບຮົມຍົກລະດັບຄວາມຮັບຮູ້ໃຫ້ພະນັກງານແພດໝໍ ວິທີການຕ້ານລະບາດ, ການຄວບຄຸມ ໜອນນໍ້າຍຸງລາຍ, ການຄວບຄຸມກໍລະນີເປັນໄຂ້ຍຸງລາຍ, ປະຊຸມປັບປຸງລະບົບການເຝົ້າລະວັງ, ການລາຍງານ ພ້ອມທັງຕິດຕາມຊຸກຍູ້ ແລະ ຈັດຕັ້ງປະຕິບັດຕົວຈິງເປັນປົກກະຕິຕໍ່ເນື່ອງ ສາມາດຄວບຄຸມກໍລະນີລະບາດ ແລະ ແກ້ໄຂກໍລະນີເຈັບເປັນບໍ່ໃຫ້ມີການເສຍຊີວິດ. ນັບແຕ່​ເດືອນ​ 1-12 ປີ 2022 ທົ່ວເມືອງໄຊຍະບູລີ ມີພະຍາດໄຂ້ຍຸງເກີດຂຶ້ນ 168 ກໍລະນີ, ມີ 40 ບ້ານ, ບ້ານທີ່ເກີດກໍລະນີຫຼາຍກວ່າໝູ່ແມ່ນບ້ານບຸ່ງ 23 ກໍລະນີ, ບ້ານນາຍາວ 16 ກໍລະນີ, ນາໄຮ 15 ກໍລະນີ, ບ້ານດອນເງິນ 12 ກໍລະນີ, ບ້ານວັງຂາມ 8 ກໍລະນີ, ລ້ອງປໍ 8 ກໍລະນີ ແລະ ບ້ານອື່ນໆ.

(ຂ່າວ-ພາບ: ລັດດາວອນ ແກ້ວໄພທູນ)