ທ່ານ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ໄດ້ໃຫ້ຮູ້ວ່າ: ປັດຈຸບັນ ວຽກງານສາທາລະນະສຸກ ມີ 4 ຕົວຊີ້ບອກ ທີ່ຍັງບໍ່ທັນບັນລຸຄື: ນໍ້າໜັກຫຼຸດມາດຕະຖານ, ລວງສູງບໍ່ໄດ້ມາດຕະຖານ, ການສັກຢາປ້ອງກັນ ພະຍາດໄອໄກ່, ຄໍຕີບ, ບາດທະຍັກ, ອັກເສບຕັບຊະນິດບີ, ອັກເສບປອດ (ແພນຕ້າ 3) ບໍ່ບັນລຸ 95% ແລະ ການເກີດລູກຢູ່ສະຖານທີ່ບໍລິການຂອງແພດໝໍຍັງບໍ່ບັນລຸ 82%, ສະນັ້ນ ເພື່ອບັນລຸຕົວຊີ້ບອກດັ່ງກ່າວ ໃນປີ 2023 ສາທາລະນະສຸກ ຈຶ່ງໄດ້ມີແຜນການຍຸດທະສາດເຊື່ອມສານຮ່ວມກັນກັບບັນດາຫຼາຍຂະແໜງການກ່ຽວຂ້ອງ.

ວຽກງານທີ່ຕ້ອງໄດ້ປະຕິບັດຄື: ວຽກງານໂພຊະນາການ ຕ້ອງມີສ່ວນຮ່ວມກັບຫຼາຍໆຂະ ແໜງການ ເປັນຕົ້ນການຊອກຫາອາຫານທີ່ມີຫຼາກຫຼາຍໝວດໝູ່ ໂດຍມີພາກສ່ວນກະສິກໍາເຂົ້າມາມີສ່ວນຮ່ວມເພື່ອໃຫ້ຄົວເຮືອນມີຊີ້ນ, ມີປາ, ມີຜັກກິນ; ວຽກງານຂະແໜງສຶກສາກໍຕ້ອງໄດ້ປ່ຽນແປງພຶດຕິກຳໃຫ້ນັກຮຽນພາຍໃນໂຮງຮຽນໃຫ້ເຂົາເຈົ້າໄດ້ຮັບປະທານອາຫານກາງເວັນທີ່ມີຫຼາກຫຼາຍໝວດໝູ່ເຊັ່ນກັນ. ພ້ອມກັນນັ້ນ, ຕ້ອງໄດ້ສ້າງພຶດຕິກຳນິໄສອັນດີ ໃນການປະຕິບັດສຸຂະອະນາໄມເຊັ່ນ: ໂຮງຮຽນຕ້ອງມີວິດຖ່າຍ, ມີນໍ້າໃຊ້ສະອາດ, ເພື່ອສ້າງເປັນພຶດຕິກຳທີ່ດີໃຫ້ເຂົາເຈົ້າໄດ້ນຳໄປໃຊ້ ແລະ ນໍາໄປລະດົມຄົນຢູ່ໃນເຮືອນຂອງຕົນໄດ້ມີສຸຂະພາບທີ່ດີ. ໃນນັ້ນ, ກະຊວງແຜນການ ແລະ ການລົງທຶນຕ້ອງໄດ້ລະດົມທຶນ, ການຈັດສັນອາຫານ, ງົບປະມານເພື່ອຕອບສະໜອງໃຫ້ແຕ່ລະພາກສ່ວນໄດ້ເຂົ້າມາມີສ່ວນຮ່ວມ. ສະນັ້ນ, ຄະນະກຳມະການໃນວຽກງານດັ່ງກ່າວຖືວ່າໄດ້ໃຫ້ຄຳໝັ້ນສັນຍາຮ່ວມກັນໃນກອງປະຊຸມວຽກງານໂພຊະນາການທົ່ວປະເທດໃນເດືອນຜ່ານມາ.

ທ່ານ ພອນປະເສີດ ອຸນາພົມ ໄດ້ກ່າວວ່າ: ສຳລັບ ຕົວຊີ້ວັດຂອງການສັກຢາ ແລະ ການຝາກທ້ອງ ແລະ ເກີດລູກນຳແພດໝໍ ໄດ້ເລັ່ງໃສ່ຍຸດທະສາດສຸຂະພາບຈະເລີນພັນຂອງແມ່, ເດັກນ້ອຍ, ເດັກນ້ອຍເກີດໃໝ່ ແລະ ໄວໜຸ່ມ ເພື່ອໄປຈັດຕັ້ງປະຕິບັດຢູ່ໃນຂະບວນການຂອງແຕ່ລະກົມກອງ, ໂຮງໝໍ ໂດຍໄດ້ເຊື່ອມສານເຂົ້າຫາກັນ ໃນໂຄງການ 5 ດີ, 1 ພໍໃຈ ຂອງກົມປິ່ນປົວ ຕ້ອງໄດ້ປັບປຸງການບໍລິການແນໃສ່ເຮັດໃຫ້ທຸກຄົນ ໄດ້ເຂົ້າເຖິງການບໍລິການໂດຍເອົາຄົນເປັນຈຸດໃຈກາງ, ເມື່ອມີແມ່ ຫຼື ມີລູກເຂົ້າມາໃຊ້ບໍລິການໂຮງໝໍ ການເຊື່ອມສານເຂົ້າຫາກັນຕ້ອງໃຫ້ມັນເດັ່ນ, ຄົບວົງຈອນໃຫ້ໄດ້. ໃນນັ້ນຢູ່ຊຸມຊົນຕ້ອງໄດ້ສ້າງ ອາສາສະໝັກແພດບ້ານ (ອສບ) ໃຫ້ເຂົ້າມາມີສ່ວນຮ່ວມຫຼາຍຂຶ້ນເພື່ອເຮັດໃຫ້ວຽກງານດັ່ງກ່າວສາມາດຖືກກັ່ນກອງຢູ່ໃນຂັ້ນຮາກຖານ ແລະ ຫຼຸດພົ່ນອອກຈາກການມີແມ່ສ່ຽງໄພ. ພ້ອມນີ້, ໂຮງໝໍນ້ອຍ ກັບ ອສບ ຈະຕ້ອງມີການປະສານງານກັນ ໃນການເກັບກໍ້າເປົ້າໝາຍ ແລະ ເຮັດການກັ່ນກອງແມ່ຍິງຖືພາໃຫ້ໄດ້ໂດຍແນະນໍາຂະເຈົ້າໃຫ້ເຂົ້າມາເຖິງການບໍລິການຝາກທ້ອງ, ເກີດລູກຢູ່ໃນສະຖານທີບໍລິການ ຖ້າເຮັດໄດ້ກໍຈະເຮັດໃຫ້ອັດຕາການການຝາກທ້ອງ, ການເກີດລູກ ຢູ່ສະຖານທີ່ ບໍລິການ ຫຼື ໂຮງໝໍເພີ່ມຂຶ້ນ.

ທ່ານ ພອນປະເສີດ ອຸນາພົມ ກ່າວຕື່ມວ່າ: ປັດຈຸບັນ ມີໂຄງການກ່ຽວກັບການໃຫ້ຄໍາປຶກສາແກ່ຄູ່ແຕ່ງງານ ໂດຍໄດ້ຮັບການສະໜັບສະໜູນຈາກອົງການ UAFPA ໃນການຈັດຕັ້ງປະຕິບັດວຽກງານດັ່ງກ່າວ ໂດຍສະເພາະຜູ້ທີ່ແຕ່ງງານໃໝ່, ຄູ່ຜົວເມຍຕ້ອງໄດ້ໄປຈົດທະບຽນຢູ່ຫ້ອງການພາຍໃນເມືອງຂອງຕົນ. ຫຼັງຈາກນັ້ນ, ຈຶ່ງສາມາດໄປຟັງການໃຫ້ຄຳປຶກສາຈາກແພດໝໍເພື່ອໃຫ້ເຂົ້າໃຈວ່າເອົາກັນໄປແລ້ວຊິມີຫຍັງເກີດຂຶ້ນກັບຄອບຄົວ, ຖ້າຢາກໄດ້ລູກຈະປະຕິບັດແນວໃດ, ບໍ່ຢາກໄດ້ລູກຈະປະຕິບັດແນວໃດ, ໄດ້ລູກແລ້ວຈະສ້າງພູມຄຸ້ມກັນໃຫ້ເຂົາເຈົ້າຄືແນວໃດ, ການໄປຝາກທ້ອງ, ຈະໄປເກີດລູກຢູ່ສະຖານທີ່ບໍລິການຄືແນວໃດ ເພື່ອໃຫ້ຮູ້ແຕ່ເບື້ອງຕົ້ນແລ້ວຍັງເປັນການສ້າງບົດບາດຍິງ-ຊາຍ ລະຫວ່າງຜົວ-ເມຍໃຫ້ເຂົ້າໃຈບັນຫາຄອບຄົວ ແລະ ໃນຕໍ່ໜ້າຄາດວ່າ ຈະສ້າງໃຫ້ຄູ່ຜົວ-ເມຍກໍຄືຜູ້ເປັນແມ່ ຍ່າງເຂົ້າມາບໍລິການຢູ່ໂຮງໝໍ ຫຼື ສະຖານທີ່ ບໍລິການ ໃຫ້ຫຼາຍຂຶ້ນ ເພື່ອຫຼຸດຜ່ອນການໄປເຄື່ອນທີ່ບໍລິການຂອງແພດໝໍ, ສາມາດກຸ້ມຕົນເອງ ແລະ ແນໃສ່ທິດຍື່ນຍົງ.