ໃນວັນທີ 22 ມີນາ ຜ່ານມາ, ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະ ກິລາ (ສສກ) ໄດ້ລົງເຄື່ອນໄຫວເຮັດວຽກຢູ່ແຂວງເຊກອງ ເພື່ອຕິດຕາມ, ກວດກາ ແລະ ຊຸກຍູ້ວຽກງານສຶກສາທິການ ແລະ ກິລາ ໂດຍໄດ້ພົບປະໂອ້ລົມຄະນະພັກ-ຄະນະນໍາ ກໍຄືຜູ້ບໍລິຫານການສຶກສາໃນທົ່ວແຂວງ.

ໃນການພົບຄັ້ງນີ້, ທ່ານ ຄໍາໄພ ສິມມາວັດ ຫົວໜ້າພະແນກສຶກສາທິການ ແລະ ກິລາແຂວງ ໄດ້ລາຍງານວ່າ: ປັດຈຸບັນ ທົ່ວແຂວງມີໂຮງຮຽນທັງພາກລັດ ແລະ ເອກະຊົນທັງໝົດ 300 ແຫ່ງ. ໃນນີ້, ໂຮງຮຽນລ້ຽງເດັກ-ອະນຸບານ 33 ແຫ່ງ (ເອກະຊົນ 4 ແຫ່ງ), ໂຮງຮຽນປະຖົມ 219 ແຫ່ງ (ເອກະຊົນ 2 ແຫ່ງ), ໂຮງຮຽນມັດທະຍົມຕອນຕົ້ນ 31 ແຫ່ງ (ມັດທະຍົມຕອນຕົ້ນສົງ), ໂຮງຮຽນມັດທະຍົມຕອນປາຍ 1 ແຫ່ງ ແລະ ມັດທະຍົມສົມບູນ 16 ແຫ່ງ, ມີອາຄານຮຽນ 527 ຫຼັງ, ມີຫ້ອງຮຽນ 1.337 ຫ້ອງ, ມີຄູສອນທັງພາກລັດ ແລະ ເອກະຊົນທັງໝົດ 1.906 ຄົນ ຍິງ 1.029 ຄົນ, ມີນັກຮຽນທັງໝົດ 35.645 ຄົນ ຍິງ 17.412 ຄົນ, ມີໂຮງຮຽນເຕັກນິກວິຊາຊີບແບບປະສົມແຂວງ 1 ແຫ່ງ, ຈັດຕັ້ງການຮຽນ-ການສອນຢູ່ 9 ສາຂາ, ມີພະນັກງານບໍລິຫານ ແລະ ຄູສອນທັງໝົດ 73 ຄົນ ຍິງ 25 ຄົນ, ມີຫ້ອງຮຽນ 15 ຫ້ອງ, ມີນັກຮຽນທັງໝົດ597 ຄົນ ຍິງ 239 ຄົນ; ມີສູນການສຶກສານອກໂຮງຮຽນ 3 ແຫ່ງ, ເຮັດໜ້າທີ່ຈັດຕັ້ງການຮຽນ ການສອນມັດທະຍົມຕອນຕົ້ນ-ຕອນປາຍບໍາລຸງ ແລະ ອົບຮົມວິຊາຊີບຂັ້ນພື້ນຖານໃຫ້ແກ່ປະຊາຊົນ, ຊາວໜຸ່ມ ແລະ ປະລະການຮຽນໃນສາຍສາມັນ. ພ້ອມນີ້ ກໍໄດ້ເອົາໃຈໃສ່ປະຕິບັດ 2 ວາລະແຫ່ງຊາດໂດຍສະເພາະແມ່ນການແກ້ໄຂບັນຫາຢາເສບຕິດ ທົ່ວແຂວງໄດ້ຮັບຮອງໂຮງຮຽນປອດຢາເສບຕິດໄດ້ຈໍານວນ 176 ແຫ່ງ. ສ່ວນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແມ່ນໄດ້ເຮັດໃຫ້ໜີ້ສິນຈາກການນໍາໃຊ້ນໍ້າ, ໃຊ້ໄຟຟ້າ ແລະ ການບໍລິການຕ່າງໆຂອງບາງໂຮງຮຽນຫຼຸດລົງ, ການຈັດເກັບລາຍຮັບດ້ານວິຊາການ ແລະ ຄ່າບໍລິການຕ່າງໆ ສາມາດຕອບສະໜອງໜ້າວຽກຂອງຕົນເອງ, ປັບປຸງກົນໄກ ແລະ ມາດຕະການໃນການສ້າງແຜນງົບປະມານ, ການຈັດສັນງົບປະມານທີ່ໄດ້ຮັບອະນຸມັດໃຫ້ແຕ່ລະພາກສ່ວນ ຕາມບຸລິມະສິດກິດຈະກໍາຢ່າງຖືກຕ້ອງສອດຄ່ອງກັບແຜນພັດທະນາການສຶກສາ ແລະ ກິລາ.

ໃນໂອກາດນີ້, ທ່ານ ນາງ ຂັນທະລີ ສີຣິພົງພັນ ໄດ້ມີຄໍາເຫັນຊີ້ນໍາໃຫ້ຜູ້ບໍລິຫານການສຶກສາເອົາໃຈໃສ່ຫຼາຍບັນຫາ ເປັນຕົ້ນໃຫ້ສືບຕໍ່ສຶກສາອົບຮົມນໍາພາການເມືອງແນວຄິດ, ຄຸນທາດການເມືອງ, ຄຸນສົມບັດສິນທໍາປະຕິວັດ ໃຫ້ສະມາຊິກພັກ, ພະນັກງານຄູ- ອາຈານໃຫ້ເປັນປົກກະຕິ, ເລິກເຊິ່ງ ແລະ ກວ້າງຂວາງ, ເອົາໃຈໃສ່ການສັບຊ້ອນໂຄຕ້າລັດຖະກອນຄູໃຫ້ເບິ່ງຮອບດ້ານ ແລະ ວຽກງານອື່ນໆ ເພື່ອພັດທະນາວຽກງານການສຶກສາພາຍໃນແຂວງໃຫ້ນັບມື້ດີຂຶ້ນ.

(ຂ່າວ-ພາບ: ເຊກອງ)