ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ (22/3/1955-22/3/2023) ສະຫາຍ ຄຳສະຫວັນ ໂຄດໄຊ ຄະນະປະຈຳພັກ ຮອງເຈົ້າເມືອງໄຊເສດຖາ ນະຄອນຫຼວງວຽງຈັນ ໄດ້ສະແດງທັດສະນະຕໍ່ວັນດັ່ງກ່າວວ່າ: ພັກເຮົາກໍາເນີດເກີດຂຶ້ນຈາກຂະບວນການຕໍ່ສູ້ຂອງປະຊາຊົນບັນດາເຜົ່າ ຕ້ານການຮຸກຮານຈາກຈັກກະພັດລ່າເມືອງຂຶ້ນ, ເພື່ອປົດປ່ອຍຊາດ ນໍາພາປະເທດຊາດກ້າວຂຶ້ນຕາມເສັ້ນທາງສັງຄົມນິຍົມ.

ພັກເຮົາສືບທອດມາຈາກພັກກອມມູນິດອິນດູຈີນ ໂດຍຢຶດໝັ້ນລັດທິມາກ-ເລນິນ, ແນວຄິດ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວບັນດາເຜົ່າ, ນໍາພາຂະບວນການຕໍ່ສູ້ຂອງປະຊາຊົນບັນດາເຜົ່າ ທຸກຊົນຊັ້ນຜ່ານເສັ້ນທາງຢ່າງລະອິດລະອ້ຽວ, ຍືດເຍື້ອຍາວນານ, ແຕ່ໃນທີ່ສຸດກໍສາມາດຍາດໄຊຊະນະໄດ້, ຈາກໄຊຊະນະນີ້ ສູ່ໄຊຊະນະໃໝ່ ທີ່ໃຫຍ່ຫຼວງກວ່າເກົ່າ, ສາມາດນໍາພາປະຊາຊົນອອກຈາກແອກປົກຄອງຂອງພວກສັກດີນາລ່າເມືອງຂຶ້ນ, ກາຍເປັນພັກກໍາອໍານາດ ແລະ ນໍາພາປະຊາຊົນກ້າວສູ່ໄລຍະຂອງການປະຕິບັດສອງໜ້າທີ່ຍຸດທະສາດ: ປົກປັກຮັກສາ ແລະ ສ້າງສາພັດທະນາປະເທດຊາດ, ເຮັດໃຫ້ປະເທດຊາດຂອງພວກເຮົາ ມີສະຖຽນລະພາບທາງດ້ານການເມືອງ, ເສດຖະກິດ-ສັງຄົມ ໄດ້ຮັບການພັດທະນາ ຢ່າງຕໍ່ເນື່ອງ, ຖານະບົດບາດ ຊື່ສຽງຂອງ ສປປ ລາວ ນັບມື້ນັບພົ້ນເດັ່ນຂຶ້ນ ໃນເວທີພາກພື້ນ ແລະ ສາກົນ.

ຕະຫຼອດໄລຍະເວລາ 68 ປີ ພັກເຮົາມີບົດບາດຕັດສິນຂະບວນວິວັດການຕໍ່ສູ້ປົດປ່ອຍຊາດ, ໂດຍນໍາເອົາເອກະລາດອິດສະລະພາບ, ຄວາມສະເໝີພາບ, ເປັນເຈົ້າຕົນເອງ ແລະ ຄວາມສົມບູນພູນສຸກ ມາສູ່ປະຊາຊົນ ທັງນໍາພາປົກປັກຮັກສາ ແລະ ສ້າງສາພັດທະນາປະເທດຊາດ.

ຂ້າພະເຈົ້າເປັນຄົນຮຸ່ນໜຸ່ມ ມີຄວາມເອກອ້າງທະນົງໃຈ ແລະ ພາກພູມໃຈເປັນຢ່າງຍິ່ງ ທີ່ເຫັນຜົນງານອັນຍິ່ງໃຫຍ່ຂອງພັກ. ຂ້າພະເຈົ້າພ້ອມດ້ວຍໝູ່ຄະນະນໍາຂອງ ເມືອງໄຊເສດຖາ ຈະນໍາປະຊາຊົນສືບຕໍ່ເສີມຂະຫຍາຍມູນເຊື້ອອັນສະຫງ່າອົງອາດຂອງພັກ, ເສີມຂະຫຍາຍຄວາມສາມັກຄີ, ປຸກລະດົມນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ເຊີດຊູຈິດໃຈເອກະລາດ, ເປັນເຈົ້າຕົນເອງ ສ້າງຄວາມເຂັ້ມແຂງດ້ວຍຕົນເອງ, ຜັນຂະຫຍາຍມະຕິຄໍາສັ່ງຂອງພັກ ແລະ ລັດໃຫ້ສໍາເລັດ ກ້າວຂຶ້ນຕາມເສັ້ນທາງສັງຄົມນິຍົມທີ່ພັກວາງອອກ ຢ່າງໜັກແໜ້ນ.

ໃນໂອກາດທີ່ມີຄວາມໝາຍສຳຄັນນີ້, ຂ້າພະເຈົ້າ ຕາງໜ້າໃຫ້ ຄະນະພັກ, ອໍານາດການປົກຄອງ ແລະ ປະຊາຊົນ ເມືອງໄຊເສດຖາ ນະຄອນຫຼວງວຽງຈັນ ຂໍສະແດງຄວາມຮູ້ບຸນຄຸນ ແລະ ເຊື່ອໝັ້ນຢ່າງ ໜັກແໜ້ນຕໍ່ການນຳພາຂອງພັກ ພ້ອມທັງຈະສຸມທຸກສະຕິປັນຍາ ຄວາມຮູ້ດຄວາມສາມາດຂອງຕົນ ເພື່ອພາລະກິດປະຕິວັດ ແລະ ຂໍອວຍພອນໄຊອັນປະເສີດມາຍັງການນໍາພັກ-ລັດ ທຸກຂັ້ນ ຈົ່ງມີສຸຂະພາບເຂັ້ມແຂງ ສືບຕໍ່ນໍາພາປະເທດຊາດກ້າວຂຶ້ນຢ່າງບໍ່ຢຸດຢັ້ງ.