ວິທະຍຸກະຈາຍສຽງຫວຽດນາມລາຍງານ, ກອງປະຊຸມສະມາຄົມທຸລະກິດຂະໜາດກາງ ແລະ ນ້ອຍ ຄັ້ງທີ IV ໄດ້ເປີດຂຶ້ນຢູ່ນະຄອນຫຼວງຮ່າໂນ້ຍ ໃນວັນທີ 23 ມີນາ ຜ່ານມານີ້, ຕະຫຼອດໄລຍະ 5 ປີ ຜ່ານມາ ສະມາຄົມໄດ້ປະສົບຜົນສຳເລັດທີ່ໜ້າຊື່ນຊົມ, ປັດຈຸບັນສະມາຄົມທຸລະກິດຂະໜາດກາງ ແລະ ນ້ອຍ ໄດ້ກວມເອົາ 97% ຂອງປະຊາຄົມທຸລະກິດທົ່ວປະເທດ, ກວມລວມຍອດຜະລິດຕະພັນພາຍໃນ ຫຼື GDP ຂອງຊາດ 45%, ປະກອບສ່ວນໃຫ້ກັບງົບປະມານແຫ່ງລັດ 30% ແລະ ກວມເອົາມູນຄ່າການສົ່ງອອກຂອງຊາດເຖິງ 30%.

ທ່ານ ເລມິງຄາຍ ຮອງນາຍົກລັດຖະມົນຕີຫວຽດນາມ ກ່າວຄຳເຫັນໃນກອງປະຊຸມ ວ່າ: ລັດຖະບານຫວຽດນາມ ຈະເພີ່ມການສະໜັບສະໜູນການເຮັດທຸລະກິດເພື່ອຊ່ວຍເຂົາເຈົ້າໃຫ້ມີການເຕີບໂຕຕໍ່ໄປ, ທ່ານ ກ່າວອີກວ່າ: ພວກເຮົາຕ້ອງເພີ່ມທະວີການນຳໃຊ້ເຕັກໂນໂລຊີ ແລະ ວິທະຍາສາດ, ພັດທະນາການປະດິດສ້າງລະບົບນິເວດ, ເພີ່ມທະວີການເຊື່ອມຕໍ່ກັນລະຫວ່າງຄວາມຕ້ອງການ ແລະ ການສະໜອງແຮງງານ, ຍົກລະດັບຊັບພະຍາກອນມະນຸດ, ລັດຖະບານຈະໃຫ້ການສະໜັບສະໜູນການພັດທະນາຂະ ແໜງການເອກະຊົນ ໂດຍສະເພາະແມ່ນຂະແໜງການການຜະລິດທີ່ນຳໃຊ້ເຕັກໂນໂລຊີ,ເຕັກໂນໂລຊີຂໍ້ມູນຂ່າວສານ, ສ້າງຕ່ອງໂສ້ການສະໜອງ ແລະ ຕ່ອງໂສ້ມູນຄ່າທັງພາຍໃນປະເທດ ແລະ ສາກົນ.

ໃນກອງປະຊຸມໄດ້ຄັດເລືອກຄະນະບໍລິຫານຊຸດໃໝ່, ທ່ານ ຫງວຽນວັນເທິນ ໄດ້ຮັບເລືອກຕັ້ງໃຫ້ເປັນປະທານສະມາຄົມທຸລະກິດຊຸດທີ IV ອີກຄັ້ງໜຶ່ງ.