ໃນວັນທີ 27 ມີນານີ້, ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ພ້ອມຄະນະ ໄດ້ພົບປະໂອ້ລົມການນຳຂອງແຂວງ ທີ່ຫ້ອງວ່າການແຂວງ, ເຂົ້າຮ່ວມມີທ່ານ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ມີບັນດາຫົວໜ້າກົມ ແລະ ຄະນະປະຈຳພັກແຂວງເຂົ້າຮ່ວມ.

      ທ່ານ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງບໍ່ແກ້ວ ໄດ້ລາຍງານສະພາບການຈັດຕັ້ງປະຕິບັດແຜນການກະກຽມດຳເນີນກອງປະຊຸມກາງສະໄໝຂອງອົງຄະນະພັກແຂວງແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງແມ່ນໄດ້ສຸມໃສ່ດ້ານແບບແຜນການນຳພາ ແລະ ວິທີເຮັດວຽກ ໄດ້ຕັ້ງໜ້ານຳພາຊີ້ນຳຕາມກົດລະບຽບພັກຕາມ 5 ຫຼັກການ 3 ທິດນຳໃນການປັບປຸງກໍ່ສ້າງພັກ, ຫັນເປັນແຜນດຳເນີນງານ, ຂໍ້ກຳນົດລະບອບແບບແຜນໃນການເຄື່ອນໄຫວນຳພາຂອງຄະນະບໍລິຫານງານພັກແຂວງ, ເອົາໃຈໃສ່ນຳພາປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ, ຄົ້ນຄວ້າຕົກລົງບັນຫາຍຸດທະສາດທີ່ສຳຄັນໃນການປັບປຸງແບບແຜນໃນການເຮັດວຽກໃຫ້ເປັນເອກະພາບກັນຢ່າງຕັ້ງໜ້າ ແລະ ພ້ອມກັນຈັດຕັ້ງປະຕິບັດໃຫ້ສຳເລັດ, ດ້ານແຜນພັດທະນາເສດຖະກິດ-ສັງຄົມ ໄດ້ເອົາໃຈໃສ່ຊຸກຍູ້-ສົ່ງເສີມການພັດທະນາຖະກິດເປັນປົກກະຕິເຮັດໃຫ້ເສດຖະກິດຂະຫຍາຍຕົວໃນລະດັບ 3,3% ລວມຍອດຜະລິດຕະພັນໃນ GDP 3.545,41 ຕື້ກີບ ທຽບໃສ່ແຜນການປີປະຕິບັດໄດ້ 98,33% ສະເລ່ຍລາຍຮັບໃສ່ຫົວຄົນ 1.010,66 ໂດລາຕໍ່ຄົນຕໍ່ປີ. ປີ 2022 ແຂວງບໍ່ແກ້ວໄດ້ໂຄງການລົງທຶນຂອງລັດ 118 ໂຄງການ, ມູນຄ່າ 26 ຕື້ 663,28 ລ້ານກີບ ປະຕິບັດໄດ້ 100%.

      ໂອກາດນີ້, ທ່ານ ບຸນທອງ ຈິດມະນີ ໄດ້ມີຄຳເຫັນຊີ້ນຳ ເພື່ອເປັນການໃຫ້ທິດຊີ້ນຳໃນການຈັດຕັ້ງປະຕິບັດວຽກງານໃຫ້ຖືກຕ້ອງຕາມຄວາມເປັນຈິງ ໂດຍສະເພາະແມ່ນວຽກງານການເມືອງແນວຄິດໃນຖັນແຖວພັກ-ພະນັກງານໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ສືບຕໍ່ເອົາໃຈໃສ່ປະຕິບັດແຜນພັດທະນາເສດຖະກິດ-ສັງຄົມ ຖືເອົາທ່າແຮງບົ່ມຊ້ອນຂອງແຂວງເປັນບຸລິມະສິດໃນການສ້າງສາພັດທະນາແຂວງບໍ່ແກ້ວໃຫ້ຄວາມຈະເລີນຮຸ່ງເຮືອງເທື່ອລະກ້າວ.

ຂ່າວ: ບຸນຈັນ ມະນີໄຊ  - ພາບ: ຄໍາພັນ ແກ້ວມະນີ