ໃນວັນທີ 27 ມີນາ ນີ້, ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະທານປະທດ ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມການນຳແຂວງຈຳປາສັກ ທີ່ຫ້ອງວ່າການແຂວງ, ໂອກາດນີ້ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ ພ້ອມດ້ວຍການນຳແຂວງ ໄດ້ໃຫ້ການຕ້ອນຮັບ ແລະ ລາຍງານສະພາບການພັດທະນາເສດຖະກິດ - ສັງຄົມຂອງແຂວງວ່າ: ດ້ານເສດຖະກິດມະຫາພາກ ປີ 2022 ເສດຖະກິດຂອງແຂວງ ໂດຍລວມໄດ້ດຳເນີນໄປຕາມຄາດໝາຍ ແລະ ແຜນທີ່ວາງໄວ້, ສາມາດສ້າງມູນຄ່າລວມຍອດຜະລິດຕະພັນພາຍໃນປະຕິບັດໄດ້ 30.362,8 ຕື້ກີບ, ທຽບໃສ່ແຜນປະຕິບັດໄດ້ລື່ນແຜນ 28,3% ແຜນ 23,670,34 ຕື້ກີບ ອັດຕາການຂະຫຍາຍຕົວຢູ່ໃນລະດັບ 5,95% (GDP), ສະເລ່ຍຕໍ່ຫົວຄົນໄດ້ 2.774 ໂດລາ ຕໍ່ຄົນ ຫຼື ເທົ່າກັບ 39,9 ລ້ານກີບຕໍ່ຄົນ (ແຜນ 3.134 ໂດລາ), ເຮັດໃຫ້ໂຄງປະກອບເສດຖະກິດ: ຂະແໜງກະສິກຳ-ປ່າໄມ້ ກວມ 32,76%, ຂະແໜງອຸດສາຫະກໍາ ກວມ 24,09% ແລະ ຂະແໜງບໍລິການ ກວມ 43,15% ຂອງ GDP. ການລົງທຶນທັງໝົດເພື່ອການພັດທະນາ. ສາມາດລະດົມຂົນຂວາຍຈາກທຸກແຫຼ່ງທຶນ ໄດ້ 10.309,54 ຕື້ກີບ (ແຜນ 7.687,46 ຕື້ກີບ), ທຽບໃສ່ແຜນປີປະຕິບັດໄດ້ລື່ນແຜນ 34%, ໃນນັ້ນ, ການລົງທຶນຂອງລັດ 68,85 ຕື້ກີບ ກວມ 0,67%, ທຶນຊ່ວຍເຫຼືອ (ODA) ມູນຄ່າ 356,57 ຕື້ກີບ ກວມ 3,46%, ການລົງທຶນພາຍໃນ-ຕ່າງປະເທດມູນ ຄ່າ 5.444,8 ຕື້ກີບ ກວມ 52,81% ແລະ ສິນເຊື່ອທະນາຄານ 4.438,87 ຕື້ກີບ ກວມ 43,06% ຂອງການລົງທຶນທັງໝົດ.

ການເກັບລາຍຮັບງົບປະມານ: ໄດ້ສຸມໃສ່ຈັດຕັ້ງປະຕິບັດແຜນງົບປະມານແຫ່ງລັດປີ 2022 ບົນພື້ນຖານໂຕເລກ ຄາດໝາຍທີ່ສະພາປະຊາຊົນແຂວງຮັບຮອງ ດ້ວຍການເພີ່ມທະວີການນຳພາ ຄຸ້ມຄອງ ແລະ ຕ້ານການຮົ່ວໄຫຼ ຂອງລາຍຮັບງົບປະມານແຫ່ງລັດ.

ຜ່ານການຈັດຕັ້ງປະຕິບັດ ເຮັດໃຫ້ການຈັດເກັບລາຍຮັບປີ 2022 ບັນລຸໄດ້ 1.842,47 ຕື້ກີບ, ທຽບໃສ່ແຜນດັດແກ້ ເທົ່າກັບ 115,79%, ທຽບໃສ່ໄລຍະດຽວປີກ່ອນ ເພີ່ມຂຶ້ນ 35,75%, ທຽບໃສ່ແຜນ 5 ປີ ຄັ້ງທີ IX ເພີ່ມຂຶ້ນ 42,35%,

ໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ໃຫ້ກຽດໂອ້ລົມ ເພື່ອຊຸກຍູ້ໃຫ້ກຳລັງໃຈຕໍ່ການນຳພາ ຂອງອົງຄະນະພັກແຂວງ ໃນການຊີ້ນຳ-ນຳພາ ແລະ ປະຕິບັດແຜນພັດທະນາເສດຖະກິດ-ສັງຄົມ ຢູ່ແຂວງຈຳປາສັກໃຫ້ສືບຕໍ່ກ້າວຂຶ້ນ, ການເມືອງມີສະຖຽນລະພາບ, ສັງຄົມມີຄວາມສະຫງົບເປັນລະບຽບຮຽບຮ້ອຍ ຈາກນັ້ນ ປະທານປະເທດ ຍັງໄດ້ລົງພື້ນທີ່ຕິດຕາມຊຸກຍູ້ໂຄງການພັດທະນາແຄມຂອງ ທີ່ຕັ້ງຢູ່ນະຄອນປາກເຊ, ຢ້ຽມຊົມແຫຼ່ງທ່ອງທ່ຽວພູສ່າເຫຼົ້າ ເມືອງໂພນທອງຕື່ມອີກ.

ຂ່າວ-ພາບ: ເກດສະໜາ ແກ້ວສຸວັນນະແສງ