ຫ້ອງການສາທາລະນະສຸກເມືອງພຽງ ແຂວງໄຊຍະບູລີ ເປີດຂະບວນອະນາໄມເພື່ອປ້ອງກັນພະຍາດໄຂ້ຍຸງລາຍຂຶ້ນເມື່ອບໍ່ດົນມານີ້ ທີ່ຫ້ອງປະຊຸມບ້ານຫົວນາ ໂດຍມີ ທ່ານ ບຸນຕ້ອງ ປັນຍາຄຳ ຮອງເຈົ້າເມືອງໆພຽງ ຜູ້ຊີ້ນຳວຽກງານວັດທະນະທຳ-ສັງຄົມຂອງເມືອງ, ມີບັນດາຄະນະຫ້ອງການສາທາລະນະສຸກເມືອງ, ເລຂາໜ່ວຍພັກບ້ານ ນາຍບ້ານເຂດນາຊິງ, ພະນັກງານຈາກຫ້ອງການສາທາລະນະສຸກເມືອງພ້ອມດ້ວຍປະຊາຊົນເຂົ້າຮ່ວມ.

ພິທີໄດ້ຮັບຟັງການຜ່ານບົດສະຫຼຸບການເຄື່ອນໄຫວ ແລະ ຄວບຄຸມຕ້ານການລະບາດພະຍາດໄຂ້ຍຸງລາຍໃນໄລຍະ 1 ປີຜ່ານມາ ໂດຍຖືເອົາວຽກງານອະນາໄມກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ ຖືເອົາການປິ່ນປົວ ແລະ ສະໜອງການບໍລິການສຸຂະພາບຢ່າງທົ່ວເຖິ່ງ, ມີຄຸນນະພາບ, ຍຸຕິທຳ ແລະ ສະເໝີພາບເປັນສຳຄັນ ຊຶ່ງໃນໄລຍະຜ່ານມາຫ້ອງການສາທາລະນະສຸກເມືອງໄດ້ຊຸກຍູ້ໃຫ້ປະຊາຊົນບັນດາເຜົ່າສ້າງຂະບວນການອະນາໄມທໍາລາຍແຫຼ່ງເພາະພັນຂອງຍຸງລາຍເພື່ອກໍາຈັດຕົວອ່ອນເຝົ້າລະວັງການລະບາດພະຍາດດ້ວຍການຕິດຕາມການກວດໜອນນໍ້າຍຸງລາຍຢູ່ແຕ່ລະເຂດທຸກໆ 8 ຄໍ່າ ແລະ 15 ຄໍ່າ, ຖ້າບ້ານໃດເກີດການລະບາດແມ່ນອາທິດລະຄັ້ງ ໂຄສະນາເຜີຍແຜ່ຂໍ້ມູນຂ່າວສານຄວາມຮູ້ພື້ນຖານ, ສະພາບການລະບາດຂອງໄຂ້ຍຸງລາຍໃຫ້ມວນຊົນຮັບຮູ້ ເປັນຕົ້ນແມ່ນການປະຕິບັດຕາມ 5 ປ ທີ່ກະຊວງສາທາລະນະສຸກໄດ້ວາງອອກດ້ວຍການອອກຂ່າວທາງໂທລະໂຄ່ງຂອງເມືອງ, ຂອງບ້ານ ແລະ ການເຮັດສຸຂະສຶກສາໂດຍກົງກັບປະຊາຊົນຢູ່ຂັ້ນບ້ານ ເພື່ອເປັນບ່ອນອີງໃຫ້ແກ່ການປຸກລະດົມການມີສ່ວນຮ່ວມ ຮຽກຮ້ອງໃຫ້ທຸກຄົນຮັບຮູ້ວ່າວຽກງານກັນ ແລະ ຄວບຄຸມການລະບາດຂອງພະຍາດໄຂ້ຍຸງລາຍແມ່ນໜ້າທີ່ ແລະ ຄວາມຮັບຜິດຊອບຂອງທຸກຄົນ ໂດຍການເປັນເຈົ້າການເລີ່ມຕົ້ນຈາກບຸກຄົນ ແລະ ຄອບຄົວ.

ໃນໂອກາດນີ້, ທ່ານ ບຸນຕ້ອງ ປັນຍາຄຳ ໄດ້ກ່າວເປີດຂະບວນການຢ່າງເປັນທາງການພ້ອມທັງຮຽກຮ້ອງມາຍັງປະຊົນບັນດາເຜົ່າໃຫ້ພ້ອມກັນສ້າງຂະບວນການເຮັດອະນາໄມກໍາຈັດໜອນນໍ້າຍຸງລາຍ ເພື່ອບໍ່ໃຫ້ມີຍຸງນໍາເຊື້ອ ເອົາໃຈໃສ່ປະຕິບັດຕາມ 5 ປ ທີ່ກະຊວງສາທາລະນະສຸກໄດ້ວາງອອກຢ່າງເຂັ້ມງວດ.

ຂ່າວ-ພາບ: ວົງສະຫວັນ ສຸທິໂວຫານ