ກົມໂຄສະນາການທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ສູນອາຊຽນ-ເກົາຫຼີ ຈັດສຳມະນາກ່ຽວກັບທ່າອ່ຽງ ແລະ ກະແສນັກທ່ອງທ່ຽວເກົາຫຼີ ພາຍຫຼັງການແຜ່ລະບາດຂອງພະຍາດໂຄວິດ-19 ຂຶ້ນໃນວັນທີ 20 ເມສາ ນີ້ ທີ່ແຂວງຫຼວງພະບາງ ໂດຍການເປັນປະທານຂອງ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ມີ ທ່ານ ກິມ ເຮຢົງ ເລຂາທິການໃຫຍ່ ສູນອາຊຽນ-ເກົາຫຼີ, ທ່ານ ນາງ ມະນີສາຄອນ ທຳມະວົງໄຊ ຮອງຫົວໜ້າກົມໂຄສະນາການທ່ອງທ່ຽວ, ມີວິທະຍາກອນຈາກປະເທດ ເກົາຫຼີ, ພ້ອມດ້ວຍພະແນກການທີ່ກ່ຽວຂ້ອງ ແລະ ພາກທຸລະກິດພາຍໃນແຂວງຫຼວງພະບາງ ເຂົ້າຮ່ວມ.

ການສຳມະນາຄັ້ງນີ້, ເປັນກາລະໂອກາດອັນສຳຄັນ ໃນການສົ່ງເສີມຮ່ວມມືດ້ານວຽກງານການທ່ອງທ່ຽວ ລະຫວ່າງ ລາວ-ເກົາຫຼີ ໃຫ້ນັບມື້ນັບເຂັ້ມແຂງ ແລະ ກວ້າງຂວາງຍິ່ງຂຶ້ນ, ທັງເປັນເວທີສົນທະນາແລກປ່ຽນບົດຮຽນ ແລະ ຄຳຄິດຄຳເຫັນເພື່ອສ້າງຄວາມເຂົ້າໃຈ ລະຫວ່າງພາກລັດ ແລະ ພາກເອກະຊົນ ຂອງທັງສອງປະເທດ ເພື່ອພ້ອມກັນຄົ້ນຄວ້າເບິ່ງສະພາບຄວາມຕ້ອງການຕົວຈິງ, ຊອກຫາວິທີການທີ່ ເໝາະສົມ ແລະ ສອດຄ່ອງ ເພື່ອອຳນວຍຄວາມສະດວກ ແລະ ເຮັດໃຫ້ການທ່ອງທ່ຽວລາວ-ເກົາຫຼີ ນັບມື້ນັບມີທ່າແຮງ ແລະ ຂະຫຍາຍຕົວຂຶ້ນ.

ທ່ານ ອຸ່ນທວງ ຂາວພັນ ໃຫ້ຮູ້ວ່າ: ວຽກງານການທ່ອງທ່ຽວ ເປັນຂະແໜງການໜຶ່ງທີ່ມີຄວາມສຳຄັນ ແລະ ມີບົດບາດຕໍ່ການພັດທະນາເສດຖະກິດ-ສັງຄົມຂອງຫຼາຍປະເທດໃນທົ່ວໂລກ ກ່ອນມີການແຜ່ລະບາດຂອງພະຍາດໂຄວິດ-19, ເຖິງວ່າຫຼາຍປະເທດຈະໄດ້ຮັບຜົນກະທົບຫຼາຍພຽງໃດກໍຕາມ, ແຕ່ພາຍຫຼັງທີ່ທົ່ວໂລກສາມາດສະກັດກັ້ນ ແລະ ຜ່ອນຜັນບັນດາມາດຕະການຂອງການແຜ່ລະບາດພະຍາດດັ່ງກ່າວ, ອັນໄດ້ເຮັດໃຫ້ການທ່ອງທ່ຽວກັບມາຟື້ນຕົວໄວຢ່າງເຫັນໄດ້ຊັດເຈນທີ່ສຸດ ຂອງທຸກປະເທດໃນໂລກ.

ສຳລັບ ສປປ ລາວ, ລັດຖະບານ ໄດ້ເອົາໃຈໃສ່ ແລະ ເຫັນຄວາມສໍາຄັນຂອງວຽກງານການທ່ອງທ່ຽວສະເໜີມາ ໂດຍສະເພາະພາຍຫຼັງການແຜ່ລະບາດຂອງພະຍາດໂດວິດ-19 ໂດຍໄດ້ກຳນົດ ວຽກງານການທ່ອງທ່ຽວເປັນວຽກງານບຸລິມະສິດໃນການກະຕຸ້ນ, ຊຸກຍູ້ເສດຖະກິດຂອງຊາດ ໃນການປະກອບສ່ວນເຂົ້າພັດທະນາສ້າງອາຊີບ, ສ້າງວຽກເຮັດງານທຳ ໃຫ້ແກ່ປະຊາຊົນບັນດາເຜົ່າໃນຂອບເຂດທົ່ວປະເທດ. ພ້ອມນີ້, ສປປ ລາວ ໄດ້ມີການເປີດກວ້າງການພົວພັນ-ຮ່ວມມືກັບກັບບັນດາປະເທດໃນປະຊາຄົມອາຊຽນ, ອາຊີປາຊີຟິກ ແລະ ສາກົນ. ສປປ ລາວ ແລະ ສ ເກົາຫຼີ ມີສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອສະໜິດແໜ້ນມາແຕ່ດົນນານ ໂດຍໄດ້ມີການຮ່ວມມືກັນທາງດ້ານທຸລະກິດ, ການຊ່ວຍເຫຼືອກັນໃນການພັດທະນາບ້ານຕ່າງໆ, ການເດີນທາງທ່ອງທ່ຽວລະຫວ່າງ ປະເທດພາຍຫຼັງທີ່ ສປປ ລາວ ໄດ້ເປີດປະເທດຢ່າງເຕັມຮູບແບບ. ມາຮອດເດືອນທັນວາ ປີ 2022 ໄດ້ມີນັກທ່ອງທ່ຽວສາກົນເຂົ້າມາ

1.294.365 ຄົນ (ມີກຸ່ມນັກທ່ອງທ່ຽວຈາກບັນດາປະເທດອາຊຽນ ຄື: ນັກທ່ອງທ່ຽວຈີນ ແລະ ນັກທ່ອງທ່ຽວເກົາຫຼີ). ນັກທ່ອງທ່ຽວເກົາຫຼີ ແມ່ນກຸ່ມຕະຫຼາດໃຫຍ່ຂອງຈໍານວນນັກທ່ອງທ່ຽວທີ່ເຂົ້າມາທ່ຽວ ສປປ ລາວ ຫຼາຍທີ່ສຸດ, (ສໍາລັບໂຕເລກນັກທ່ອງທ່ຽວເກົາຫຼີ ໄລຍະ 2 ເດືອນຕົ້ນປີ 2023 ນີ້, ມີຈຳນວນ 34.326 ເທື່ອຄົນ) ຊຶ່ງຮູບແບບການທ່ອງທ່ຽວຂອງນັກທ່ອງທ່ຽວເກົາຫຼີ ແມ່ນຈະມາເປັນກຸ່ມໃຫຍ່(ເກົາຫຼີ ຟີເວີ), ມີການບອກຕໍ່ໆໂຄສະນາເປັນວົງກວ້າງ, ມີການມາທ່ອງທ່ຽວຍາວຕໍ່ເນື່ອງໃນທຸກໆລະດູການ ແລະ ມີນັກຮ້ອງ, ນັກສະແດງຈາກເກົາຫຼີ ມາສ້າງກິດຈະກຳຕ່າງໆ ທີ່ເປັນສີສັນໃຫ້ການທ່ອງທ່ຽວຂອງ ສປປ ລາວ ຊຶ່ງສະຖານທີ່ທ່ອງທ່ຽວຍອດນິ ຍົມແມ່ນ ເມືອງວັງວຽງ ແຂວງວຽງຈັນ ແລະ ແຂວງຫຼວງພະບາງ.

ຂ່າວ-ພາບ: ວຽງສະຫວັນ