ປ່າສະຫງວນແຫ່ງຊາດນ້ຳຫ້າເປັນປ່າໄມ້ເຂດຮ້ອນ ຕັ້ງຢູ່ພາກຕາເວັນຕົກຂອງເມືອງຫຼວງນໍ້າທາແຂວງຫຼວງນໍ້າທາ, ທິດຕາເວັນອອກຂອງເມືອງສິງ ແລະ ທິດເໜືອຂອງເມືອງວຽງພູຄາ ຊຶ່ງມີເນື້ອທີ່ກວ້າງຂວາງເຖິງ 222.400 ເຮັກຕາ ແລະ ຢູ່ຫ່າງຈາກເທດສະບານ ປະມານ 26 ກິໂລຕາແມັດ. ປ່າສະຫງວນແຫ່ງຊາດນ້ຳຫ້າຖືກຂະໜານນາມວ່າ ເປັນມໍລະດົກອາຊຽນ ຍ້ອນຄວາມອຸດົມສົມບູນທາງດ້ານປ່າໄມ້ ແລະ ຊີວະນາໆພັນ ຊຶ່ງປະກອບມີເນື້ອທີ່ປ່າດົກໜາ ກວມ 30%, ປ່າດົງດິບ 60% ແລະ ພື້ນທີ່ດິນກະສິກໍາ 10% ພ້ອມທັງມີສັດປ່າລ້ຽງລູກດ້ວຍນ້ຳນົມ 38 ສາຍພັນ, ສັດປ່າທີ່ຫາຍາກຈໍານວນ 22 ສາຍພັນ ແລະ ນົກ 288 ສາຍພັນ. ໃນປີ ຄ.ສ 1999 ອົງການທ່ອງທ່ຽວແຫ່ງຊາດໄດ້ສົມທົບກັບຫ້ອງການທ່ອງທ່ຽວແຂວງ ໂດຍໄດ້ຮັບການສະໜັບສະໜູນທຶນຊ່ວຍເຫຼືອຈາກປະເທດນິວຊີແລນ ເພື່ອພັດທະນາການທ່ອງທ່ຽວແບບອະນຸລັກປະຊາຊົນມີສ່ວນຮ່ວມ ໃນນາມໂຄງການທ່ອງທ່ຽວອະນຸລັກນ້ຳຫ້າ. ຜ່ານໄລຍະເວລາການພັດທະນາພຽງ 3 ປີ ປ່າສະຫງວນແຫ່ງຊາດນ້ຳຫ້າກໍໄດ້ກາຍເປັນແຫຼ່ງທ່ອງທ່ຽວທີ່ມີຊື່ສຽງຈົນມາຮອດທຸກມື້ນີ້ ແລະ ໄດ້ກາຍເປັນຕົວແບບຂອງການພັດທະນາການທ່ອງທ່ຽວແບບທັດສະນະສຶກສາທີ່ຕິດພັນກັບການອະນຸລັກຢູ່ປະເທດເຮົາ.

ຂໍ້ມູນຈາກ: ກົມໂຄສະນາການທ່ອງທ່ຽວກະຊວງ ຖວທ