ໂດຍ: ບຸນອູ້ມ

ການທ່ອງທ່ຽວພົວພັນກັບສິ່ງແວດລ້ອມ, ການທ່ອງທ່ຽວຮຽກຮ້ອງໃຫ້ມີຊັບພະຍາກອນທຳມະຊາດທີ່ຫຼາກຫຼາຍເພື່ອແນໃສ່ເຕີບໂຕທີ່ສໍາຄັນ ແມ່ນນ້ຳ ແລະ ດິນ, ທັງໝົດແມ່ນສ່ວນໜຶ່ງຂອງສິ່ງແວດລ້ອມການທ່ອງທ່ຽວປະກອບມີ: ການທ່ອງທ່ຽວວັດທະນະທໍາ, ການທ່ອງທ່ຽວສິ່ງແວດລ້ອມ ແລະ ການທ່ອງທ່ຽວຊົນນະບົດ;

ທ່ານ ນາງ ແສງໂສດາ ວັນທານຸວົງ ຮອງຫົວໜ້າກົມໂຄສະນາການທ່ອງທ່ຽວ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ກ່າວໃນງານຈັດກິດຈະກຳສົ່ງເສີມປູກຈິດສຳນຶກ ແລະ ໂຄສະນາເຜີຍແຜ່ການປົກປັກຮັກສາສິ່ງແວດລ້ອມເພື່ອການທ່ອງທ່ຽວທີ່ຍືນຍົງ ເມື່ອບໍ່ດົນມານີ້ວ່າ: ການທ່ອງທ່ຽວແມ່ນ ໜຶ່ງໃນອຸດສາຫະກໍາທີ່ພັດທະນາໄວທີ່ສຸດໃນໂລກ, ອຸດສາຫະກໍາໄດ້ສົ່ງຜົນກະທົບທັງທາງບວກ ແລະ ທາງລົບຕໍ່ສິ່ງແວດລ້ອມ ຖ້າຫາກທຸກຄົນເຂົ້າໃຈແນວຄິດຕົວຈິງໃນການປົກປັກຮັກສາສິ່ງແວດລ້ອມ ແລະ ຄວາມຍືນຍົງ. ສະນັ້ນ, ຄວາມຈຳເປັນໃນການອະນຸລັກສິ່ງແວດລ້ອມ ແນໃສ່ເຮັດໃຫ້ການທ່ອງທ່ຽວຍືນຍົງທີ່ກ່ຽວຂ້ອງກັບຜູ້ທີ່ໄປຢ້ຽມຢາມສະຖານທີ່ແຫຼ່ງທ່ອງທ່ຽວ, ປັດຈຸບັນ ມີບັນຫາມົນລະພິດທາງອາກາດ, ນ້ຳ ແລະ ດິນ. ສ່ວນໃຫຍ່ຂອງການໃຊ້ລົດ, ໃຊ້ນໍ້າມັນເຊື້ອໄຟ, ການເຜົາໄໝ້, ການທ່ອງທ່ຽວສາມາດເປັນມິດກັບສິ່ງແວດລ້ອມໄດ້ຖ້າຫາກມີການວາງແຜນ, ມີການຄຸ້ມຄອງ ແລະ ເອົາໃຈໃສ່ການປະຕິບັດເປັນຢ່າງດີ. ທັງສອງຂົງເຂດໄດ້ສົມທົບກັນເປັນຮູບແບບລວມ ແລະ ສາມາດເຮັດວຽກຮ່ວມກັນເພື່ອຜົນດີຂອງທັງສອງ.

ການພັດທະນາການທ່ອງທ່ຽວສະແດງໃຫ້ເຫັນການພົວພັນຊຶ່ງກັນ ແລະ ກັນກັບສິ່ງແວດລ້ອມເພາະວ່າດ້ານສິ່ງແວດລ້ອມຂອງການທ່ອງທ່ຽວປະກອບສ່ວນຢ່າງຫຼວງຫຼາຍໃນຄວາມສໍາເລັດ, ພວກເຮົາສາມາດແບ່ງການທ່ອງທ່ຽວແບບພິເສດອອກເປັນສາມສ່ວນຄື: ການທ່ອງທ່ຽວວັດທະນະທຳ ແມ່ນກຸ່ມຍ່ອຍຂອງການທ່ອງທ່ຽວທີ່ກ່ຽວຂ້ອງເຖິງວັດທະນະທຳ, ຊີວິດການເປັນຢູ່ຂອງປະຊາຊົນໃນເຂດນັ້ນ, ປະຫວັດສາດຂອງຄົນ,ສະຖາປັດຕະຍະກຳຂອງເຂົາເຈົ້າ ແລະ ອື່ນໆ. ການທ່ອງທ່ຽວດ້ານສິ່ງແວດລ້ອມ ຫຼື ການທ່ອງທ່ຽວທຳມະຊາດເປັນການເປີດໂອກາດໄປທ່ຽວຊົມເຂດທຳມະຊາດທີ່ບໍ່ມີສິ່ງລົບກວນ, ທັດສະນີຍະພາບທີ່ສວຍງາມ ແລະ ຊົມພືດພັນ ແລະ ສັດປ່າ. ການທ່ອງທ່ຽວຊົນນະບົດ ສະແດງໃຫ້ເຫັນສິລະປະຊີວິດການເປັນຢູ່ຂອງຊົນນະບົດ, ວັດທະນະທຳ, ມໍລະດົກຊົນນະບົດຂອງປະເທດ, ໄດ້ສ້າງຜົນປະໂຫຍດໃຫ້ແກ່ປະຊາຄົມທ້ອງຖິ່ນໃນດ້ານເສດຖະກິດ ແລະ ສັງຄົມ.

ທ່ານ ນາງ ແສງໂສດາ ວັນທານຸວົງ ຍັງໄດ້ກ່າວຕື່ມອີກວ່າ: ອຸດສາຫະກຳທ່ອງທ່ຽວສາມາດມີບົດບາດສຳຄັນໃນການພັດທະນາສິ່ງແວດລ້ອມ. ພາລະບົດບາດເຫຼົ່ານີ້ລວມມີການປົກປັກຮັກສາສິ່ງແວດລ້ອມທີ່ພາກສ່ວນກ່ຽວຂ້ອງໃນອຸດສາຫະກໍາການທ່ອງທ່ຽວມີສ່ວນຮ່ວມໃນການຟື້ນຟູ ແລະ ອະນຸລັກຊັບພະຍາກອນທໍາມະຊາດຊີວະພາບ ແລະ ຍືນຍົງ ມີຄວາມຈຳເປັນທີ່ຈະຮັກສາໃຫ້ຢູ່ໃນສະພາບທຳມະຊາດ. ອຸດສາຫະກໍາການທ່ອງທ່ຽວ ແລະ ການທ່ອງທ່ຽວ ສາມາດຊ່ວຍພັດທະນາ ແລະ ເປັນເຄື່ອງມືທີ່ເປັນປະໂຫຍດສໍາລັບການຂະຫຍາຍຄວາມຮູ້ກ່ຽວກັບບັນຫາສິ່ງແວດລ້ອມໃຫ້ທຸກຄົນແມ່ນສາມາດໃກ້ຊິດກັບສິ່ງແວດລ້ອມ. ທັງເປັນການກະຕຸ້ນການທ່ອງທ່ຽວເຊັ່ນ: ທໍາມະຊາດ, ວັດທະນະທໍາ, ປະຫວັດສາດ ລວມທັງການທ່ອງທ່ຽວກະສິກໍາ ຊຶ່ງມີທ່າແຮງສ້າງແຮງຈູງໃຈຂອງນັກທ່ອງທ່ຽວໃນການເດີນທາງ.

ການທ່ອງທ່ຽວ, ຍັງປະກອບສ່ວນລາຍຮັບສຳຄັນໃຫ້ແກ່ລັດຖະບານ ແລະ ອໍານາດການປົກຄອງທ້ອງຖິ່ນ, ບັນດາຜູ້ປະກອບການທຸລະກິດດ້ານບໍລິການ ບໍລິສັດທ່ອງທ່ຽວ, ໂຮງແຮມ, ຮ້ານອາຫານ ແລະ ສ່ວນບຸກຄົນອື່ນໆ. ທຸກຄົນເລືອກການເດີນທາງ ແລະ ການທ່ອງທ່ຽວເປັນການພັກຜ່ອນຂອງເຂົາເຈົ້າ. ການເດີນທາງແມ່ນວິທີທີ່ດີທີ່ຈະຮຽນຮູ້ກ່ຽວກັບໂລກ. ນອກຈາກນີ້, ຍັງສອນໃຫ້ຮູ້ຫຼາຍສິ່ງທີ່ໜ້າສົນໃຈກ່ຽວກັບວັດທະນະທໍາຂອງຊາດທີ່ແຕກຕ່າງກັນ ຊຶ່ງການທ່ອງທ່ຽວພົວພັນກັບສິ່ງແວດລ້ອມ, ການທ່ອງທ່ຽວຮຽກຮ້ອງໃຫ້ມີຊັບພະຍາກອນທຳມະຊາດທີ່ຫຼາກຫຼາຍເພື່ອແນໃສ່ເຕີບໂຕທີ່ສໍາຄັນແມ່ນນ້ຳ ແລະ ດິນ, ທັງໝົດແມ່ນສ່ວນໜຶ່ງຂອງສິ່ງແວດລ້ອມ.