ເມື່ອບໍ່ດົນມານີ້, ທ່ານ ບຸນພະລັງ ວິໄລສັກ ຮອງເຈົ້າເມືອງປາກລາຍ ຜູ້ຊີ້ນໍາຂົງເຂດວັດທະນະທໍາສັງຄົມ-ຍຸຕິທໍາ ແລະ ຕຸລາການຂັ້ນເມືອງ ພ້ອມດ້ວຍທີມງານໄດ້ເຄື່ອນໄຫວຕິດຕາມຊຸກຍູ້ການຮຽນ-ການສອນຢູ່ໂຮງຮຽນ ມ.ສ ນໍ້າພູນ ເມືອງປາກລາຍ ແຂວງໄຊຍະບູລີ ໂດຍການຕ້ອນຮັບຂອງທ່ານ ຄໍາພັນ ພົມມະຈັນ ຜູ້ອໍານວຍການໂຮງຮຽນ ມ.ສ ນໍ້າພູນ, ມີຄູ-ອາຈານ, ນາຍບ້ານ, ສະມາຄົມພໍ່ແມ່ນັກຮຽນເຂົ້າຮ່ວມ.

ທ່ານ ຄໍາພັນ ພົມມະຈັນ ກ່າວວ່າ: ໂຮງຮຽນ ມ.ສ ນໍ້າພູນ ປະກອບມີຄູ-ອາຈານ 41 ຄົນ ຍິງ 19 ຄົນ, ມີນັກຮຽນທັງໝົດ 619 ຄົນ ຍິງ 297 ຄົນ, ໃນໄລຍະຜ່ານມາໂຮງຮຽນໄດ້ຖືເອົາການສຶກສາອົບຮົມການເມືອງແນວຄິດໃຫ້ແກ່ຄູ-ອາຈານ ແລະ ນັກຮຽນຢ່າງເປັນປົກກະຕິ ໂດຍສະເພາະແມ່ນນໍາເອົາແຜນພັດທະນາການສຶກສາໃນແຕ່ລະໄລຍະ, ມະຕິ, ຄໍາສັ່ງ, ຂໍ້ກໍານົດ, ກົດລະບຽບຕ່າງໆເຮັດໃຫ້ຄູ-ອາຈານ, ນັກຮຽນໄດ້ຮັບຮູ້-ເຂົ້າໃຈຕໍ່ແນວທາງນະໂຍບາຍຂອງວຽກງານການສຶກສາຫຼາຍຂຶ້ນ.

ໃນໂອກາດດັ່ງກ່າວ, ທ່ານ ບຸນພະລັງ ວິໄລສັກ ໄດ້ຮຽກຮ້ອງໃຫ້ຄູ-ອາຈານ, ອໍານາດການປົກຄອງບ້ານ ສະມາຄົມພໍ່ແມ່ນັກຮຽນ ຈົ່ງສືບຕໍ່ສຶກສາອົບຮົມການເມືອງແນວຄິດໃຫ້ຄູ-ອາຈານ ແລະ ນັກຮຽນມີຄວາມໜັກແໜ້ນສະກັດກັ້ນທຸກປະກົດການຫຍໍ້ທໍ້ພາຍໃນໂຮງຮຽນ ເປັນຕົ້ນນັກຮຽນດື້ດ້ານ, ບໍ່ປະຕິບັດຕາມກົດລະບຽບຂອງໂຮງ ຮຽນ, ບໍ່ຢາກຮຽນໜັງສື, ຂາດໂຮງຮຽນ, ເຂົ້າຮ້ານກິນດື່ມ, ທ່ຽວກາງຄືນ, ພົວພັນສັງຄົມ ແລະ ພົວພັນຢາເສບຕິດສືບຕໍ່ສົມທົບກັບທຸກພາກສ່ວນ ເພື່ອປຸກລະດົມນັກຮຽນທີ່ປະລະການຮຽນໃຫ້ເຂົ້າມາໃຫ້ຄົບຕາມຫຼັກສູດ, ສຸມໃສ່ການຮຽນ-ການສອນໃຫ້ມີຄຸນນະພາບສ້າງໃຫ້ໄດ້ຄູປະສົບການ, ຝຶກຝົນຫຼໍ່ຫຼອມໃຫ້ມີນັກຮຽນດີ, ຮຽນເກັ່ງເພີ່ມຂຶ້ນ. ພ້ອມກັນປົກປັກຮັກສາພັດທະນາໂຮງຮຽນໃຫ້ມີຄວາມສະອາດສວຍງາມ. ຈາກນັ້ນຍັງໄດ້ມອບຄອມພິວເຕີໂນດບຸກພ້ອມເຄື່ອງປິນເຕີ້ໃຫ້ໂຮງຮຽນ ມ.ສ ນໍ້າພູນ 1 ໜ່ວຍ, ຊີມັງ 1 ໂຕນໃຫ້ໂຮງຮຽນປະຖົມທ່ານາ ເພື່ອປະກອບສ່ວນເຂົ້າໃນການຮຽນ-ການສອນ-ສ້ອມແປງໂຮງຮຽນຕື່ມອີກ.

ຂ່າວ-ພາບ: ກ່າ ຄຸດທະວົງສັກ