ທ່ານ ບຸນທົງ ຖິ່ນດອນໂຂງ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງເຊກອງໃຫ້ຮູ້ວ່າ: ແຕ່ນີ້ຮອດປີ 2025 ພະແນກ ຖວທ ແຂວງຈະສຸມໃສ່ພັດທະນາວຽກງານຖະ ແຫຼງຂ່າວ-ສື່ມວນຊົນໃຫ້ມີຄຸນນະພາບ, ກາຍເປັນກະບອກສຽງທີ່ແຫຼມຄົມໃນການໂຄສະນາເຜີຍແຜ່ແນວທາງ, ແຜນນະໂຍບາຍຂອງພັກ, ກົດໝາຍຂອງລັດ ແລະ ການສະເໜີຂໍ້ມູນ-ຂ່າວສານໃຫ້ມີ​ຫຼາຍ​ຮູບ​ຫຼາຍ​ສີ, ວ່ອງໄວ, ຖືກຕ້ອງທັນເຫດ​ການເພື່ອໃຫ້ປະຊາຊົນ ກໍຄືສັງຄົມໄດ້ຮັບຮູ້ຢ່າງທົ່ວເຖິງ.

ທ່ານໃຫ້ຮູ້ອີກວ່າ: ໃນໄລຍະຜ່ານມາ ຄະນະພັກ-ຄະນະນໍາຂອງແຂວງ ກໍຄືພະແນກ ຖວທ ແຂວງ ຍາມໃດກໍເປັນຫ່ວງເປັນໃຍ ແລະ ໄດ້ເອົາໃຈໃສ່ພັດທະນາວຽກງານຖະແຫຼງຂ່າວ-ສື່ມວນຊົນ, ປະຕິບັດບັນດາແຜນງານ, ໂຄງ​ການບຸລິມະສິດ ເປັນຕົ້ນແມ່ນໂຄງການ​ກໍ່​ສ້າງ​ອາ​ຄານ​ວິ​ທະ​ຍຸ-ໂທ​ລະ​ພາບ​ຫຼັງໃໝ່, ໂຄງ​ການ​ຕິດ​ຕັ້ງ ແລະ ຂະ​ຫຍາຍລະບົບ​ໂທ​ລະໂຄ່ງຂັ້ນບ້ານ, ​ໂຄງການປັບ​ປຸງ ແລະ ພັດ​ທະ​ນາ​ບຸກ​ຄະ​ລາ​ກອນ, ອຸ​ປະ​ກອນ​ເຕັກ​ນິກ ແລະ ພາ​ຫະ​ນະ​ຮັບ​ໃຊ້​ຕ່າງໆ ເພື່ອ​ຮັບ​ປະ​ກັນ​ໃຫ້​ແກ່​ການ​​ປະ​ຕິ​ບັດ​ໜ້າ​ທີ່​ການ​ເມືອງ, ເປັນ​ກະ​ບອກ​ສຽງ​ໂຄສະນາເຜີຍແຜ່ແນວທາງນະໂຍບາຍຂອງພັກ, ກົດໝາຍຂອງລັດ ແລະ ​ຂໍ້​ມູນ-ຂ່າວ​ສານຕ່າງໆ​ໃຫ້​​ສັງ​ຄົມ​ໄດ້ຮັບຮູ້​ຢ່າງວ່ອງ​ໄວ ແລະ ກວ້າງ​ຂວາງກວ່າ​ເກົ່າ. ພ້ອມນີ້ເອົາໃຈໃສ່ກໍ່ສ້າງພະນັກງານສື່ມວນຊົນດ້ວຍຮູບການຕ່າງໆເຊັ່ນ: ສົ່ງໄປ​ຮຽນ​ທິດ​ສະ​ດີການ​ເມືອງໄລ​ຍະ​ສັ້ນ 3 ເດືອນ 1 ສະຫາຍ, ​ຮຽນວິຊາສະເພາະຊັ້ນສູງໄລຍະ 2 ປີ 1 ສະຫາຍ, ຮຽນ​ພາ​ສາ​ຫວຽດ​ນາມໄລ​ຍະ 9 ເດືອນ 1 ສະ​ຫາຍ ຍິງ 1 ສະຫາຍ, ເຂົ້າຮ່ວມກອງປະຊຸມຝຶກ​ອົບ​ຮົມ​, ​ກອງ​ປະຊຸມພົບ​ປະແລກປ່ຽນ​​ບົດຮຽນ​ດ້ານ​ວຽກ​ງານ​ຖະ​ແຫຼ​ງຂ່າວ-ສື່​ມວນ​ຊົນຢູ່​ພາຍ​ໃນ​ປະ​ເທດ ແລະ ຕ່າງ​ປະ​ເທດ 25 ຄັ້ງ ຈໍານວນ 50 ​ເທື່ອ​ຄົນ.

ທ່ານ ບຸນທົງ ຖິ່ນດອນໂຂງ ກ່າວຕື່ມອີກວ່າ: ເພື່ອສືບຕໍ່ພັດທະນາວຽກງານຖະແຫຼງຂ່າວ-ສື່ມວນຊົນໃຫ້ມີຄຸນນະພາບສູງຂຶ້ນ ພະແນກ ຖວທ ແຂວງ ໄດ້ສຸມໃສ່​ພັດທະນາ​ ແລະ ຍົກລະດັບຄວາມຮູ້ຂອງບຸກຄະ​ລາກອນ​​ໃຫ້​ສູງຂຶ້ນ ຕິດພັນກັບການຂະຫຍາຍ​ພື້ນຖານ​ໂຄ່ງ​ລ່າງ​, ປັບປຸງ​ວຽກ​ງານໄອທີ (IT)​ ແລະ ​ປ່ຽນ​ຖ່າຍລະບົບ​ເຕັກ​ນິກ​ໃຫ້​ມີ​ຄວາມ​ທັນ​ສະ​ໄໝ (ຈາກ​ລະບົບ​ອານາ​ລ໋ອກ​ໄປ​ສູ່​ລະບົບ​ດີ​ຈີ​ຕອນ) ​ໃຫ້​ໄດ້​ໃນ​ຂອບ​ເຂດ​ທົ່ວ​ແຂວງ ​ແລະ ​ສາມາດ​ເຊື່ອມ​ໂຍງ​ກັບ​ສາກົນ​ ເພື່ອ​ເປັນ​ສູນ​ກາງ​ໃນ​ການ​ບໍລິການ​ຜະລິດ​ຕະພັນ​ສື່​ມວນ​ຊົນ​; ພັດ ທະນາຮູບແບບການຂຽນ, ການສະເໜີຂ່າວ​ໃຫ້​ມີ​ຫຼາຍ​ຮູບ​ຫຼາຍ​ສີ, ວ່ອງ​ໄວ, ຖືກຕ້ອງ ແລະ ທັນເຫດ​ການ; ປະກອບ​ພາຫະນະ, ອຸປະກອນ​ ​ແລະ ງົບປະມານຮັບ​ໃຊ້​ທີ່​ຈໍາ​ເປັນ​ເຂົ້າ​ໃນ​ການເຄື່ອນໄຫວວຽກ​ງານຂ່າວໃຫ້ ເໝາະສົມ ແນ​ໃສ່​ສ້າງ​ພື້ນຖານ​ໃຫ້​ແກ່​ການ​ເຄື່ອນ​ໄຫວ​ວຽກ​ງານ​ດັ່ງກ່າວ ​ລົງ​ເລິກ​ເຖິງ​ຮາກ​ຖານ​ການ​ຜະລິດ ​ແລະ ​ແທດ​ເຖິງ​ຂະ​ບວນການ​ວຽກ​ງານ​ຕົວ​ຈິງຂອງ​ສັງຄົມ; ຂະຫຍາຍ ​ແລະ ຕິດ​ຕັ້ງ​ລະບົບ​ໂທລະ​ໂຄ່ງ​ໃຫ້​ບ້ານ​ເຂດ​ຊາຍ​ແດນ, ​ເຂດ​ຫ່າງ​​ໄກ​ສອກຫຼີກ ແລະ ​ເຂດ​ຈຸດ​ສຸມ​ພັດທະນາ​ຕ່າງໆຂອງແຂວງໃຫ້ທົ່ວເຖິງ.

ຂ່າວ-ພາບ: ສັນຍາ