ເດືອນເມສາປີນີ້, ສປປ ລາວ ມີອັດຕາເງິນເຟີ້ລວມ ຢູ່ທີ່ລະດັບ 39,9% ຊຶ່ງມີທ່າອຽງສືບຕໍ່ຕໍ່າລົງ ແຕ່ຫຼາຍລາຍການສິນຄ້າຍັງມີລາຄາເພີ່ມຂຶ້ນ ເຖິງວ່າຈະບໍ່ໄດ້ຮັບຜົນຈາກການເພີ່ມຂຶ້ນຂອງລາຄານໍ້າມັນ ແຕ່ສິນຄ້າໂດຍລວມຍັງສືບຕໍ່ເພີ່ມຂຶ້ນ ເນື່ອງຈາກເທດສະການປີໃໝ່ລາວ ທີ່ມີຄວາມຕ້ອງການຫຼາຍຂຶ້ນ.

ອີງຕາມບົດລາຍງານ ສະພາບອັດຕາເງິນເຟີ້ ປະຈໍາເດືອນເມສາ 2023 ຂອງສູນສະຖິຕິແຫ່ງຊາດກະຊວງແຜນການ ແລະ ການລົງທຶນ ໄດ້ເຜີຍແຜ່ທາງເວັບໄຊເມື່ອວັນທີ 5 ພຶດສະພາ ນີ້ວ່າ: ອັດຕາເງິນເຟີ້ລວມຂອງ ສປປ ລາວ ໃນ ເດືອນເມສາ 2023 ຢູ່ໃນລະດັບ 39,9% ຊຶ່ງເຫັນວ່າຢູ່ໃນທ່າອ່ຽງ ທີ່ສືບຕໍ່ຕ່ໍາລົງເລັກນ້ອຍເມື່ອທຽບໃສ່ ສາມເດືອນຕົ້ນປີຜ່ານມາ (ອັດຕາເງິນເຟີ້ເດືອນມັງກອນ, ກຸມພາ ແລະ ມີນາ 2023 ຢູ່ໃນລະດັບ 40,3%; 41,3% ແລະ 41,0% ຕາມລໍາດັບ). ເມື່ອສັງເກດຕາມໝວດສິນຄ້າ, ໝວດທີ່ມີອັດຕາເງິນເຟີ້ ສູງກວ່າໝູ່ແມ່ນ ໝວດສະບຽງອາຫານ ແລະ ເຄື່ອງດື່ມບໍ່ມີທາດເຫຼົ້າ ເພີ່ມຂຶ້ນ 52,2%, ໝວດຮັກສາສຸຂະພາບ ແລະ ຢາ ເພີ່ມຂຶ້ນ 42,5%, ໝວດຮ້ານອາຫານ ແລະ ໂຮງແຮມ ເພີ່ມຂຶ້ນ 37,4%, ໝວດເຄື່ອງໃຊ້ໃນເຮືອນ ເພີ່ມຂຶ້ນ 34,2%, ຄົມມະນາຄົມ ແລະ ຂົນສົ່ງ ເພີ່ມຂຶ້ນ 32,7%, ໝວດທີ່ພັກອາໄສ, ນໍ້າປະປາ, ໄຟຟ້າ ແລະ ເຊື້ອເພີງຫຸງຕົ້ມ ເພີ່ມຂຶ້ນ 26,6%, ໝວດເຫຼົ້າ ແລະ ຢາສູບ ເພີ່ມຂຶ້ນ 26,2%.

ບົດລາຍງານຍັງໃຫ້ຮູ້ວ່າ: ເຖິງແມ່ນວ່າ ອັດຕາເງິນເຟີ້ລວມມີທ່າອ່ຽງຕ່ໍາລົງເມື່ອທຽບກັບໄລຍະສາມເດືອນຕົ້ນປີ, ແຕ່ຫຼາຍລາຍການ ສິນຄ້າຍັງມີລາຄາສືບຕໍ່ເພີ່ມຂຶ້ນເມື່ອທຽບກັບເດືອນຜ່ານມາ ຊຶ່ງໂດຍລວມເພີ່ມຂຶ້ນ 1,7%. ໃນນັ້ນ, ລາຄາຊີ້ນໝູ ເພີ່ມຈາກ 76.349 ກີບ/ກິໂລ ມາເປັນ 78.449 ກີບ/ກິໂລ, ລາຄາຊີ້ນງົວປະເພດ 1 ເພີ່ມຈາກ 105.725 ກີບ/ກິໂລ ມາເປັນ 108.221 ກີບ/ກິໂລ, ໄກ່ພັນປອກເພີ່ມຈາກ 62.712 ກີບ/ໂຕ ມາເປັນ 65.255 ກີບ/ໂຕ, ປານິນລ້ຽງ ເພີ່ມຈາກ 43.460 ກີບ/ກິໂລ ມາເປັນ 45.627 ກີບ/ກິໂລ ແລະ ລາຄາເຝີເພີ່ມຈາກ 22.739 ກີບ/ຖ້ວຍ ມາເປັນ 23.353 ກີບ/ຖ້ວຍ. ນອກຈາກນັ້ນ, ຫຼາຍປະເພດສິນຄ້າ ຍົກເວັ້ນນໍ້າມັນ ລ້ວນແຕ່ມີລາຄາເພີ່ມຂຶ້ນ.

ສະພາບການເພີ່ມຂຶ້ນຂອງລາຄາສິນຄ້າໃນເດືອນເມສາ 2023 ເຖິງແມ່ນວ່າ ບໍ່ໄດ້ຮັບຄວາມກົດດັນຈາກການເພີ່ມຂຶ້ນຂອງລາຄານ້ໍາມັນກໍຕາມ (ນໍ້າມັນລາຄາຫຼຸດລົງເມື່ອທຽບກັບເດືອນຜ່ານມາ), ແຕ່ລາຄາສິນຄ້າໂດຍລວມຍັງສືບຕໍ່ເພີ່ມຂຶ້ນເນື່ອງຈາກເປັນໄລຍະເທດສະການປີໃໝ່ລາວ ທີ່ມີຄວາມຕ້ອງການຫຼາຍຂຶ້ນ ສົ່ງຜົນເຮັດໃຫ້ຫຼາຍລາຍການສິນຄ້າ ມີລາຄາເພີ່ມຂຶ້ນ ແລະ ພ້ອມກັນນັ້ນ ກໍແມ່ນໄດ້ຮັບຄວາມກົດດັນຈາກການອ່ອນຄ່າຂອງເງິນກີບ ທີ່ຍັງສືບຕໍ່ອ່ອນຄ່າ ຊຶ່ງເຮັດໃຫ້ລາຄາສິນຄ້ານໍາເຂົ້າຍັງສືບຕໍ່ເພີ່ມຂຶ້ນ.

(ຂ່າວ-ພາບ: ສຸກສະຫວັນ)